Yumi Stap Long Levelples We Jehova i Protektem Yumi Long Hem

1, 2. ?Wanem tru faet ya we bambae i kamtru i no longtaem? ?Bambae yumi no mekem wanem long Amagedon?

LONG 30 Oktoba 1938, plante milian man long Yunaeted Stet oli lesin long wan program long radio. Program ya i wan stori we ol man oli aktem. Man we i aktem se hem i stap talemaot nius, i talem se ol laef samting we oli stap long planet ya Mars, oli kavremap evri ples long wol mo oli spolem gud hem. Plante man we oli lesin long program ya, oli no luksave se hemia wan stori nomo we oli aktem. Oli ting se wan tru faet i stat, nao oli fraet we oli fraet. Ale sam man oli mekem sam samting blong traem protektem olgeta.

² Be bambae i gat wan tru faet i hapen i no longtaem. Plante man oli no rere from faet ya. Faet ya hemia Amagedon. Hem i faet we God bambae i mekem blong spolem rabis wol ya. Faet ya hem i no wan stori nomo, be bambae hem i mas kamtru from we God i talemaot long yumi long Baebol. (Rev. 16:14-16) Yumi no nid blong faet long Amagedon from we Jehova bambae i yusum paoa blong hem long wan spesel fasin blong sevem yumi.

3. ?Bambae yumi stadi long wanem profet tok? ?From wanem profet tok ya i impoten long yumi tede?

³ Profet tok long Sekaraea japta 14 i tokbaot plante samting we bambae oli hapen long faet blong Amagedon. Sekaraea i raetem profet tok ya 2,500 yia finis, be hem i impoten tumas long yumi tede. (Rom 15:4) Hem i tokbaot ol samting we oli hapen long ol man blong God stat long taem we Kraes i rul long heven long 1914. Mo hem i tokbaot ol samting we bambae oli hapen i no longtaem. Mo hem i tokbaot tu wan “bigfala levelples” mo “gudfala wota.” (Sek. 14:4, 8) Long stadi ya, bambae yumi lanem se bigfala levelples ya i minim wanem, mo olsem wanem Jehova i save protektem ol man blong hem long levelples ya. Bambae yumi lanem tu se gudfala wota ya hem i wanem, mo hem i save mekem i gud long yumi olsem wanem. Taem yumi kasem save long samting ya, bambae yumi luksave se yumi nidim wota ya. Be i no hemia nomo, bambae yumi wantem blong dring long hem tu. Naoia i gud yumi lukluk gud long profet tok ya.—2 Pita 1:19, 20.

“DEI BLONG HAE GOD” I STAT

4. (1) ?Wetaem “dei blong Hae God” i stat? (2) Plante yia bifo long 1914, ?ol tabu Kristin oli stap talemaot wanem? ?Ol lida blong politik mo ol lida blong jos oli mekem wanem?

⁴ Profet tok long Sekaraea japta 14, i stat olsem: “Dei blong Hae God i stap kam klosap we hem bambae i jajem olgeta man.” (Ridim Sekaraea 14:1, 2.) ?Wanem ya dei blong Hae God? Hem i sem mak wetem “dei ya blong Masta.” Hem i stat long 1914, taem Jisas i kam King long Kingdom blong God long heven. (Rev. 1:10; 11:15) Plante yia bifo long 1914, ol tabu Kristin oli stap talemaot se “taem blong ol man we oli no laen blong Isrel” bambae i finis long 1914. Oli talemaot tu se stat long taem ya, bambae i gat plante trabol long wol i bitim bifo. (Luk 21:24) ?Olsem wanem? ?Ol man oli lesin long tok blong ol Kristin ya? Nogat. Ol lida blong politik mo ol lida blong jos oli jikim ol Kristin ya mo oli agensem olgeta. Be taem oli mekem olsem, oli stap jikim God mo oli agensem hem stret, from we ol tabu Kristin ya oli wok long nem blong Kingdom blong God.—Hib. 12:22, 28.

5, 6. (1) ?Ol enemi blong ol man blong God oli mekem wanem? (2) ?Hu ya ‘narahaf we bambae i stap nomo long taon’?

⁵ Sekaraea i talemaot samting we ol enemi blong ol man blong God bambae oli mekem. Hem i talem se bambae “oli holem taon ya” Jerusalem, we hem i pija blong Kingdom blong God. Ol tabu Kristin we oli stap yet long wol, oli haf blong Kingdom ya. (Fil. 3:20) Long faswan bigfala faet long wol, ol enemi oli “holem” ol tabu Kristin we oli lidim wok blong Jehova long wol, mo oli putum olgeta long kalabus, long Amerika. Oli mekem i no stret long ol tabu Kristin ya mo oli mekem i strong long olgeta. Oli blokem ol buk blong olgeta, mo oli traem blong stopem wok blong prij. I olsem we ol enemi oli go insaed long ol haos long taon, mo oli “tekemaot olting” blong ol man.

⁶ Nating se ol strong enemi oli spolem ol man blong God, mo oli talem sam giaman toktok long saed blong olgeta, be oli no save spolem tru wosip. I gat sam long ol tabu Kristin we oli stanap strong. Sekaraea i talem se olgeta ya oli ‘narahaf we bambae i stap nomo long taon ya.’

7. ?Ol tabu Kristin bifo oli soemaot wanem eksampol long yumi?

⁷ ?Olsem wanem? ?Afta long faswan bigfala faet, ol enemi oli no moa agensem ol man blong God? Nogat. Fasin agens we Sekaraea i tokbaot i gohed nomo. (Rev. 12:17) Long nambatu bigfala faet long wol, ol enemi oli agensem bigwan ol Kristin brata mo sista blong yumi. Nating se i olsem, ol Kristin ya oli holemstrong long God. Eksampol blong olgeta i givhan long yumi blong yumi stanap strong taem ol samting oli traem yumi. Maet ol famle blong yumi oli agensem yumi, no maet ol fren long wok mo long skul oli jikim yumi from bilif blong yumi. (1 Pita 1:6, 7) Nomata weples yumi stap long hem, yumi no seksek nating long ol enemi blong yumi, be yumi holemstrong long Jehova. (Fil. 1:27, 28) ?Be olsem wanem yumi save stap sef long wol ya we ol man oli no laekem yumi?—Jon 15:17-19.

JEHOVA I MEKEM WAN “BIGFALA LEVELPLES”

8. (1) ?Long Baebol, samtaem hil i minim wanem? (2) ?“Hil blong ol tri ya Olif” hem i pija blong wanem?

⁸ Yumi save se “taon ya,” hem i pija blong Kingdom blong God. ?Be “Hil blong ol tri ya Olif afsaed long Jerusalem” hem i pija blong wanem? ?Hil ya bambae “i split long medel” olsem wanem? ?Mo bambae hem i kam tu hil olsem wanem? (Ridim Sekaraea 14:3-4.) Sekaraea i talem tu se: “Nao, bambae yufala i ronwe i go long levelples blong ol hil ya blong mi, from we levelples blong ol hil ya i kasem Ajel. Mo yufala i mas ronwe olsem we yufala i mekem long taem blong King Usia blong Juda bifo, taem graon i seksek. Mo God blong mi Jehova bambae i kam, mo olgeta tabu man bambae oli kam wetem hem.” (Sek. 14:5, NW) ?From wanem Jehova i kolem tufala hil ya se ‘ol hil blong mi’? Long Baebol, samtaem hil i minim ol kingdom no gavman. Mo plante taem Baebol i talem se hil blong God bambae i blesem mo i protektem ol man. (Sam 72:3, NW; Aes. 25:6, 7) Taswe, hil blong ol tri ya olif, hem i pija blong hae rul blong Jehova, antap long olgeta samting we hem i mekem.

9. ?I minim wanem se hil blong tri ya olif “i split long medel”?

⁹ Sekaraea i talem se hil blong ol tri ya olif “i split long medel.” ?Hemia i minim wanem? Hem i min se Jehova i stanemap wan narafala rul. Namba tu rul ya hemia Kingdom blong Mesaea we Jisas Kraes i King long hem. Kingdom ya tu i blong Jehova, taswe hem i kolem tufala hil ya se ol hil blong hem.—Sek. 14:4.

10. ?“Bigfala levelples” long medel blong tufala hil ya, i pija blong wanem?

¹⁰ Sekaraea i talem se taem Jehova i stanap long hil blong ol tri ya olif, hil ya i split, wan haf i go long not mo narahaf i go long saot. Mo taem hil ya i split, hem i mekem wan “bigfala levelples.” ?Levelples ya hem i wanem? Hem i pija blong fasin blong God blong protektem ol man. Ol man blong Jehova oli sef aninit long rul blong hem mo long rul blong Pikinini blong hem. Hemia i sem mak olsem ol man oli sef taem oli stap long wan levelples long medel blong tu hil. Jehova bambae i neva letem ol man oli spolem tru wosip. ?Wetaem hil blong ol tri ya olif i split? Hemia long 1914, taem Jisas i stat blong rul long heven. Sekaraea i talem tu se ol man blong Jehova bambae oli ronwe i go long “bigfala levelples.” ?Wetaem samting ya i stat blong hapen?

OL MAN BLONG GOD OLI STAT BLONG RONWE I GO LONG LEVELPLES

11, 12. (1) ?Wetaem ol man blong God oli stat blong ronwe i go long levelples? (2) ?Wanem i soemaot se Jehova i protektem ol man blong hem?

¹¹ Jisas i givim woning long ol man blong hem i se: “Bambae olgeta man oli no laekem yufala nating, oli agens long yufala, from we yufala i holem nem blong mi.” (Mat. 24:9) Taem ol las dei oli stat long 1914, fasin agens ya i kam strong moa. Long taem blong faswan bigfala faet, ol enemi oli agensem strong ol tru Kristin, be oli no save spolem fulwan tru wosip. Long 1919, ol man blong God oli fri long Bigfala Babilon, hemia ol giaman skul. (Rev. 11:11, 12)a Long yia ya nao ol man blong God oli stat blong ronwe i go long levelples ya.

¹² Stat long 1919, Jehova i gohed blong protektem ol man blong hem long evri ples long wol. Blong plante yia, ol gavman oli traem blokem ol Witnes blong Jehova blong oli no moa prij, mo oli putum tabu long ol buk blong olgeta tu. Fasin ya i stap gohed yet long sam kantri. Be Jehova i no letem ol gavman ya oli spolem tru wosip. Nomata wanem samting we ol gavman oli save mekem, be Jehova bambae i gohed blong yusum bigfala paoa blong hem blong protektem ol man blong hem.—Dut. 11:2.

13. ?Yumi save mekem wanem blong yumi stap long levelples we Jehova i protektem yumi long hem? ?From wanem i impoten tumas we yumi stap long levelples ya?

¹³ Sipos yumi holemstrong long Jehova oltaem, yumi stap long levelples we Jehova i protektem yumi long hem. Jehova mo pikinini blong hem Jisas, bambae tufala i protektem yumi. Bambae Jehova i neva letem eni man no eni samting i ‘pulumaot yumi long han blong hem.’ (Jon 10:28, 29) Jehova i givim evri samting we yumi nidim, blong yumi stap tru long rul blong hem mo rul blong Pikinini blong hem. Bigfala trabol i stap kam klosap tumas, taswe bambae yumi nidim moa we Jehova i givhan long yumi. From samting ya, i impoten tumas we yumi stap long levelples ya.

“TAEM BLONG FAET” BLONG HEM I KAMTRU

14, 15. Long dei ya we Jehova i spolem ol enemi blong hem, ?wanem bambae i hapen long olgeta man we oli stap afsaed long levelples ya?

¹⁴ Naoia we en blong rabis wol ya i klosap, Setan bambae i strong moa blong agensem ol man blong Jehova. Biaen, bambae Jehova i faet mo i spolem olgeta enemi blong ol man blong hem. Hemia nao “taem blong faet” blong hem we Sekaraea i tokbaot. Faet ya i bitim ol narafala faet, from we bambae hem i soemaot klia se Jehova i wan strong man blong faet.—Sek. 14:3.

¹⁵ Long dei we Jehova i spolem ol enemi blong hem, ?wanem bambae i hapen long ol man we oli stap afsaed long levelples we Jehova i protektem yumi long hem? Sekaraea i talem se: “Taem dei ya i kamtru, bambae i no moa gat gudfala laet. Ol samting bambae oli kolkol tumas nao oli kam strong.” (Sek. 14:6, NW) Hemia i min se Jehova bambae i no glad long olgeta. Sekaraea i talem tu se ‘ol hos wetem ol hafkas dongki, mo ol kamel, mo ol dongki, mo ol narafala anamol’ bambae oli “kolkol tumas nao oli kam strong.” Hemia i min se ol tul blong faet blong olgeta bambae oli blong nating nomo. Sekaraea i talem se Jehova bambae i panisim ol enemi blong hem wetem “wan rabis sik.” Ol ae mo tang blong olgeta “bambae i roten.” Yumi no save sipos hem i wan tru sik. Be yumi save se bambae ol enemi ya oli no moa naf blong spolem yumi mo oli no moa save tok agensem God. (Sek. 14:7, 12, 15) Olgeta “king blong wol wetem ol soldia blong olgeta” bambae oli tekem saed blong Setan. Be nomata weples oli stap long hem, Jehova bambae i spolem olgeta. (Rev. 19:19-21) Long taem ya, ol dedbodi blong ol man ya we Jehova i kilim olgeta, “bambae oli finisim olgeta ples long wol.”—Jer. 25:32, 33.

16. ?Wanem ol kwestin we yumi wanwan i mas askem? ?Yumi mas mekem wanem long taem blong bigfala trabol?

¹⁶ Taem i gat wan faet, evri man oli harem nogud, wetem olgeta ya tu we oli win long faet. Long taem blong bigfala trabol, maet yumi tu yumi harem nogud. Maet yumi no moa gat kakae. Maet yumi lusum olting blong yumi. Maet yumi no moa fri olsem tede. Sipos yumi gotru long ol trabol taem ya, ?bambae yumi mekem wanem? ?Bambae yumi fraet mo yumi seksek? ?Bambae tingting blong yumi i foldaon, nao yumi no moa save wanem blong mekem? ?Bambae yumi no moa mekem wok blong Jehova? Long taem blong bigfala trabol, yumi mas holemstrong long Jehova mo yumi mas trastem se bambae hem i protektem yumi. Hemia i olsem we yumi stap long levelples we Jehova i protektem yumi long hem.—Ridim Habakuk 3:17, 18.

‘BAMBAE GUDFALA WOTA I RON I GO’

17, 18. (1) ?“Gudfala wota” i pija blong wanem? (2) ?“Ded Si” mo “Mediterenian Si” oli pija blong wanem? (3) ?Tingting blong yumi i mas strong blong mekem wanem?

¹⁷ Afta long Amagedon, “gudfala wota” bambae i ron i kamaot long Kingdom ya we Kraes i rul long hem. “Gudfala wota” ya hem i pija blong olgeta samting we Jehova i givim long ol man, blong oli save kasem laef we i no save finis. “Ded Si” i pija blong olgeta man we oli stap slip long beregraon. “Mediterenian Si” i fulap long ol laef samting, taswe hem i pija blong “bigfala hip blong ol man” we bambae oli pastru long Amagedon. (Ridim Sekaraea 14:8, 9; Rev. 7:9-15) Bigfala hip blong man wetem olgeta we bambae oli laef bakegen, bambae oli dring long “gudfala wota” we i kamaot long ‘wan bigfala reva we i wota blong laef.’ Ale, olgeta evriwan bambae oli kam stret gud olgeta mo oli laef olwe.—Rev. 22:1, 2.

¹⁸ Taem Jehova i spolem rabis wol ya, bambae hem i protektem yumi, nao yumi go insaed long niufala wol blong hem we stret fasin nomo i stap long hem. Nating se ol man oli no laekem yumi, be yumi mekem tingting blong yumi i strong se bambae yumi sapotem Kingdom blong Jehova, mo bambae yumi stap oltaem long levelples we hem i protektem yumi long hem.