!Ded i No En Blong Evri Samting!

Betani i wan smol vilej we i stap 3 kilometa longwe long Jerusalem. (Jon 11:18) Sam wik bifo Jisas i ded, wan samting i hapen long vilej ya. Gudfala fren blong Jisas, Lasaros, i sik bigwan nao hem i ded.

Taem Jisas i harem nius ya, hem i talem long ol disaepol blong hem se Lasaros i stap slip, mo bambae hem i go wekemap hem. (Jon 11:11) Be ol disaepol oli no kasem save long tok blong hem. Ale Jisas i talem klia long olgeta se: “Lasaros i ded.”—Jon 11:14.

Fo dei afta, Jisas i kamtru long Betani, mo hem i go leftemap tingting blong Mata, sista blong Lasaros. Ale Mata i talem se: “Masta, sipos yu bin stap long ples ya, bambae brata blong mi i no save ded.” (Jon 11:17, 21) Jisas i ansa se: “Mi nao, mi stamba blong laef bakegen long ded. Mi nao mi stamba blong laef. Man we i bilif long mi, nating we bambae i ded, hem bambae i mas laef.”—Jon 11:25.

Blong soemaot se tok ya i tru, Jisas i go klosap long hol blong ston we oli putum Lasaros long hem, mo i singaot bigwan se: “!Lasaros! !Yu kamaot!” (Jon 11:43) Ol man oli sapraes bigwan taem Lasaros i kamaot.

Bifo we Lasaros i ded, Jisas i mekem tu dedman i laef bakegen. Wan long tufala, hemia smol gel blong Jaeras. Taem gel ya i ded, Jisas i talem se gel ya i stap slip.—Luk 8:52.

I gud blong makem se taem Lasaros mo gel blong Jaeras, tufala i ded, Jisas i talem se tufala i stap slip. I stret nomo we hem i talem olsem. ?From wanem? Taem man i slip ded, hem i no moa save harem no filim wan samting, mo hem i no moa save harem nogud. (Prija 9:5; Yu luk bokis ya “Ded i Olsem Slip.”) Ol disaepol blong Jisas oli kasem save se ol dedman oli stap slip nomo. Wan buk (Encyclopedia of Religion and Ethics) i talem se: “Long tingting blong ol man blong Jisas, ded i olsem slip nomo, mo gref i olsem ples blong spel . . . blong olgeta we oli holemstrong long bilif gogo oli ded.”a

Yumi harem gud tumas taem yumi save se ol dedman oli stap slip nomo, mo oli no stap harem nogud. Samting ya i mekem se yumi no moa fraet long ded.

?SIPOS WAN MAN I DED, HEM I SAVE LAEF BAKEGEN?

Yumi laekem blong slip long naet. ?Be hu i wantem slip blong olwe? ?I gat wan promes we i talem se ol dedman bambae oli laef bakegen, olsem Lasaros?

Taem klosap Job i ded, hem i askem se: “?Sipos wan man we i strong gud i ded, hem i save laef bakegen?”—Job 14:14, NW.

Job hem wan i ansa long kwestin ya, taem hem i toktok long God, i se: “Sipos yu yu singaot mi mi kam, mi bambae mi harem yu. Yu nao yu mekem mi, mo long taem ya, bambae yu save glad long mi.” (Job 14:15) Job i save se Jehova i wantem tumas blong mekem hem i laef bakegen. ?Olsem wanem? ?Job i stap drim nomo? Nogat.

God i givim paoa long Jisas blong hem i winim ded. Yumi luksave samting ya taem Jisas i mekem ol dedman oli laef bakegen. Baebol tu i talem se Jisas i “gat paoa blong mekem ol dedman oli laef bakegen.” (Revelesen 1:18) Taswe, Jisas bambae i mekem ol dedman oli laef bakegen.

Baebol i tokbaot promes ya blong laef bakegen plante taem. Wan enjel i talem long profet Daniel se: ‘Bambae yu yu ded, be bambae yu laef bakegen blong kasem pei blong yu long en blong ol dei ya.’ (Daniel 12:13) Jisas i talem long ol Sadusi we oli no bilif long laef bakegen, se: “Yufala i rong olgeta, from we yufala i no save tok blong Baebol, mo yufala i no save paoa blong God tu.” (Matiu 22:23, 29) Aposol Pol i talem se: “Mi putum tingting blong mi long God blong luk . . . we God bambae i mekem olgeta man we oli ded oli laef bakegen, ol man we oli stret, wetem ol man we oli no stret.”—Ol Wok 24:15.

?WETAEM BAMBAE OLI LAEF BAKEGEN?

?Wetaem ol man we oli stret mo olgeta we oli no stret, bambae oli laef bakegen? Enjel i talem long Daniel se bambae hem i laef bakegen ‘long en blong ol dei ya.’ Mo Mata tu i bilif se Lasaros bambae i laef bakegen ‘long las dei.’—Jon 11:24.

Baebol i soemaot se “las dei” i joen wetem taem ya we Kraes i rul long Kingdom blong God. Pol i raetem se: “Kraes i mas rul fastaem, gogo God i winim olgeta enemi blong Kraes, i putum olgeta oli stap daon, aninit long leg blong Kraes. Mo laswan blong ol enemi ya we God bambae i winim olgeta, hemia ded.” (1 Korin 15:25, 26) Taswe, i stret nomo we yumi prea blong Kingdom blong God i kam, mo blong God i mekem samting we hem i wantem, i kamtru long wol.b

Job i save gud se God i wantem tumas blong mekem ol dedman oli laef bakegen. Taem dei ya i kamtru, ded bambae i finis olgeta. Mo neva bakegen ol man bambae oli asaskem se: ‘?Ded i en blong evri samting?’