Baebol I Ansa

?I tru se Baebol i Tok blong God?

Ating yu agri se Baebol i spesel from we hem i Tok blong God. Ol man oli printim plante milian Baebol long plante handred lanwis. Waes we i stap long Baebol, i gat paoa blong jenisim fasin blong man i kam gud moa.—Ridim 1 Tesalonaeka 2:13; 2 Timoti 3:16.

Yumi save se Baebol i kam long God, from we hem i tru, taem i talem ol samting we bambae oli hapen long fiuja. I no gat man i save mekem samting ya. Yu traem tingbaot buk blong Aesea. Ol man oli faenem wan olfala skrol blong hem long wan hol blong ston, klosap long Ded Si. Ol man oli raetem skrol ya bitim wan handred yia, bifo we Jisas i bon long wol. Skrol ya i talem se bambae i no moa gat man i stap long taon blong Babilon. Toktok ya i kamtru plante yia afta we Jisas i gobak long heven.—Ridim Aesea 13:19, 20; 2 Pita 1:20, 21.

?Oli raetem Baebol olsem wanem?

I tekem moa long 1,600 yia blong raetem Baebol. I gat samwe long 40 man oli raetem, mo ol tok we oli raetem oli laenap gud mo oli stanap long wan stamba tok nomo. ?Olsem wanem samting ya i save hapen? God i lidim olgeta, nao oli raetem tingting blong hem.—Ridim 2 Samuel 23:2.

Samtaem God i yusum ol enjel, ol vison, mo ol drim blong toktok long ol man we oli raetem Baebol. Plante taem, God nao i lidim olgeta blong oli raetem tingting blong hem.—Ridim Revelesen 1:1; 21:3-5.