?From wanem God i letem man i spolem narafala?

Baebol i tokbaot sam man we oli stap spolem ol man we oli no strong. Maet yu tingbaot stori blong King Ehab we i rul long Isrel, long ol yia 900 bifo Kraes. Hem i wantem plantesen blong Nabot. Ale, hem i letem woman blong hem, Jesebel, blong i mekem rod blong kilim i ded Nabot mo ol pikinini blong hem. (1 King 21:1-16; 2 King 9:26) ?From wanem God i letem king ya i mekem olsem?

Tingbaot wan risen we i impoten tumas: God i no save giaman. (Taetas 1:2) ?Risen ya i joen olsem wanem wetem ol nogud samting we man i mekem? God i givim woning long Adam mo Iv se sipos tufala i agensem hem, bambae tufala i ded. Tok blong God i tru, from we stat long taem ya, ol man oli stap ded. Mo fas man we i ded long wol, hemia Ebel. Hem i ded from we Ken i spolem hem.—Jenesis 2:16, 17; 4:8.

Baebol i tokbaot ol man stat long taem ya, i se: “Sam man oli gat paoa, mo ol narafala man oli stap aninit long olgeta, oli stap harem nogud.” (Prija 8:9) ?Olsem wanem? ?Tok ya i tru? Jehova i givim woning long ol man Isrel se bambae oli krae i go long hem, from we king blong olgeta i spolem olgeta. (1 Samuel 8:11-18) Waes King Solomon tu i spolem ol man blong hem. (1 King 11:43; 12:3, 4) Be ol king we oli rabis, olsem Ehab, oli mekem i strong moa long ol man. Ale, yu tingbaot: Sipos God i blokem ol man we oli gat paoa blong oli no spolem ol narafala, bambae i olsem we hem i stap mekem tok blong hem i kam wan giaman tok.

Tingbaot ol tok ya blong Setan, hem i talem se ol man oli mekem wok blong God blong kasem samting nomo. (Job 1:9, 10; 2:4) Sipos God i blokem ol man blong hem, blong ol narafala oli no spolem olgeta, hemia bambae i olsem we tok blong Setan i tru. Mo sipos God i blokem evri man long wol, nao i no moa gat man i spolem narafala, hemia tu bambae i olsem we tok blong God i giaman nomo. ?From wanem? From we bambae ol man oli ting se oli save rulum gud ol narafala, ale oli no moa nidim God. Be Baebol i talem se yumi nidim God. (Jeremaea 10:23) Yumi nidim Kingdom blong God. Taem Kingdom ya i kam, bambae hem i finisim ol man we oli stap mekem i no stret long ol narafala.

?Be olsem wanem? ?Hemia i min se God i no save mekem wan samting nating? Nogat. God i mekem tu samting: Faswan, hem i mekem fasin ya blong spolem man i kam long klia ples. Yu traem tingbaot. Baebol i tokbaot evri rabis samting we Jesebel i mekem long Nabot. Mo Baebol i soemaot se Setan i stamba blong ol rabis wok ya, be hem i stap haedem hem. (Jon 14:30; 2 Korin 11:14) God i stap givhan long yumi blong yumi no mekem ol rabis fasin, taem hem i talemaot se Setan nao i stap spolem ol man mo hem i stamba blong ol rabis fasin. Long rod ya, God i lukaot gud long yumi blong yumi save laef olwe.

Nambatu, hemia se God i mekem strong promes se rabis fasin ya bambae i finis. Yumi trastem se wan dei, bambae hem i panisim olgeta man nogud, olsem we hem i mekem long Ehab mo Jesebel. (Ol Sam 52:1-5) Mo tu, God i promes se klosap nao, bambae hem i finisim ol trabol we ol man blong hem oli kasem from rabis fasin blong ol narafala.a Nabot mo ol pikinini blong hem bambae oli laef bakegen long paradaes long wol, we bambae stret fasin nomo i stap long hem.—Ol Sam 37:34.