‘Yu Mekem Rod Blong Yu i Stret,’ Blong Yu Gohed Gud

LONG yia 537 bifo Kraes, ol man blong God oli aot long Babilon mo oli wokbaot i gobak long Jerusalem. Jehova i talem long olgeta se: ‘!Yufala i mas go wokem wan rod blong ol man bambae oli wokbaot long hem blong kamhom bakegen! !Rod ya i mas wan bigwan, we i stret gud, mo i no mas gat ol ston long hem!’ (Aes. 62:10) Olgeta we oli faswan blong aot, maet oli berem ol bigbigfala hol long rod ya, mo oli karemaot ol samting we oli blokem rod. Oli mekem olsem blong givhan long ol narafala brata mo sista blong olgeta we oli stap wokbaot i kam biaen long olgeta.

Yumi save yusum rod ya olsem wan pijatok. Jehova i wantem se olgeta man blong hem oli folem wan rod we bambae i givhan long olgeta, blong oli mekem ol defdefren wok long ogenaesesen blong hem. Be hem i no wantem se ol samting we oli no impoten, oli blokem olgeta, nao oli no moa folem rod ya. Jehova i talem se: ‘Yu mekem rod blong yu i stret, mo bambae ol rod blong yu oli strong.’ (Prov. 4:26) Nomata se yu yangfala no nogat, be advaes ya i save givhan long yu.

YU MEKEM OL GUDFALA DESISEN

Maet yu harem sam man oli tokbaot wan yangfala, se: ‘!Hem bambae i go skul ovasi ya!’ no ‘!Hem bambae i holem wan gudfala wok ya!’ Ol yangfala oli gat paoa, oli kwik blong kasem save samting, mo oli wantem win long laef blong olgeta. Taswe, Baebol i tru taem hem i talem se: “Oltaem yumi glad blong luk ol yangfala, from we bodi blong olgeta i strong.” (Prov. 20:29) Wan yangfala we i yusum paoa mo save blong hem blong mekem wok blong Jehova, hem i save mekem ol wok long ogenaesesen blong Jehova mo hem i save harem gud from.

Maet yu luksave se ol man blong wol oli tinghae long ol samting we ol yangfala oli mekem. Taem wan yangfala Witnes i wok gud long skul, ol tija mo ol fren blong hem oli fosem hem blong hem i go long hae skul. Sipos wan yangfala Witnes i plei gud long wan spot, maet ol man oli fosem hem blong hem i joen long wan tim. ?Wan samting olsem i hapen long yu finis? ?Yu yu save wan yangfala we samting olsem i hapen long hem? ?Wanem i save givhan long wan Kristin blong hem i mekem ol gudfala desisen?

Ol tijing blong Baebol oli save givhan long ol yangfala, blong oli folem wan gudfala rod. Prija 12:1 i talem se: “God i mekem yumi, mo naoia we yufala i yangfala yet, oltaem yufala i mas tingbaot hem.” ?Yu yu save mekem wanem blong yu ‘tingbaot God ya we i mekem yu’?

Yu traem tingbaot Erika we i stap long Wes Afrika. Hem i laekem plei futbol tumas. Taem hem i no gat 15 yia yet, ol haeman blong futbol oli jusum hem blong i plei long wan bigfala tim blong futbol long Wes Afrika. Samting ya i min se oli save jusum hem enitaem blong i go kasem trening long Yurop, mo blong i kam wan man blong plei futbol. ?Be sipos hem i mekem olsem, bambae hem i ‘tingbaot God ya we i mekem hem’? ?Yufala ol yangfala, yufala i save lanem wanem long stori ya?

Taem Erik i stap skul yet, hem i stat blong stadi wetem ol Witnes blong Jehova. Hem i lanem se Jehova bambae i stretem olgeta trabol long wol. Mo hem i kasem save se i impoten blong hem i yusum taem mo paoa blong hem, blong mekem samting we God i wantem. Ale hem i lego spot. Biaen hem i baptaes mo i gohed blong mekem ol samting we God i wantem. Sam yia biaen, hem i kam wan man blong givhan, mo afta hem i go long Skul Blong Ol Brata We Oli No Mared.

Sipos Erik i kam wan man blong plei futbol, bambae hem i gat haenem mo i kam rij. Be hem i kasem save se Baebol i talem tru nomo, se: “Ol rijman oli stap ting se olting blong olgeta i save blokem olgeta oli stap gud, olsem we bigfala stonwol we i goraon long taon i blokemgud hem.” (Prov. 18:11) Yes, sipos wan man i ting se ol sas samting oli save blokem hem long ol trabol, man ya i stap drim nomo. Mo tu, ol man we oli stap traehad blong kam rijman, plante taem oli “stap mekem ol samting we olgeta tu oli harem nogud tumas from.”—1 Tim. 6:9, 10.

Plante yangfala oli glad tumas taem oli mekem wok blong fultaem paenia. Erik i talem se: “Mi mi joenem wan bigfala tim blong ol man blong Jehova we oli prij fultaem. !Tim ya i beswan! Rod ya nomo i save mekem man i glad mo i win gud long laef blong hem. Mi mi talem tangkiu long Jehova from we hem i soemaot rod ya long mi.”

?Olsem wanem long yu? I moa gud yu mekem wok blong paenia i bitim we yu wantem kam rijman long wol ya. Hemia i olsem we yu mekem ‘rod blong yu’ i strong long fored blong Jehova.—Yu ridim bokis ya “Ol Blesing We Yu No Save Kasem Long Yunivesiti.”

YU TEKEMAOT OL SAMTING WE OLI BLOKEM ROD BLONG YU

Wan man mo woman blong hem, tufala i visitim Betel blong Amerika, nao tufala i luk se ol brata mo sista long ples ya oli glad we oli glad. Biaen, sista ya i raetem se: “Mitufala i stap bisi tumas long ol wok blong mitufala.” Ale, tufala i jenisim sam samting blong tufala i gat moa taem blong mekem ol wok blong Jehova.

Be tufala i harem se ol samting we tufala i wantem jenisim oli bigwan tumas. Ale wan taem, tufala i ridim vas blong dei we i tokbaot Jon 8:31, mo tufala i storian long hem. Vas ya i talem se: “Sipos yufala i obei long ol tok ya blong mi, yufala i prapa man blong mi.” Ale tufala i talem se: “Nomata wanem samting we yumitu lego blong mekem laef blong yumitu i no fasfas, be hemia i no blong nating.” Tufala i salem bigfala haos blong tufala, tufala i lego sam narafala samting we oli no impoten, mo tufala i muv i go long wan kongregesen we i nidim moa pablisa blong prij. Naoia tufala i paenia, mo tufala i givhan tu blong bildim ol Haos Kingdom mo blong mekem ol wok long ol asembli blong tri dei. ?Tufala i harem olsem wanem? Tufala i talem se: “Mitufala i sapraes from we mitufala i glad moa naoia, mo mitufala i mekem samting we ogenaesesen blong Jehova i pulum yumi blong yumi mekem.”

YU GOHED BLONG WOKBAOT LONG ROD BLONG TRUTOK

Solomon i raetem se: “Yu mas lukluk i go stret nomo long rod ya we yu stap long hem, mo tingting blong yu i mas strong.” (Prov. 4:25) Wan man we i draevem trak, hem i mas lukluk rod blong hem nomo. Long sem fasin, yumi tu yumi mas tingbaot ol wok blong Jehova nomo, mo yumi mas traehad blong kasem ol wok ya. Blong mekem olsem, yumi mas ronwe long ol pleplei mo ol samting we oli save blokem yumi.

?Wanem sam wok we maet yu wantem mekem? Wan gudfala wok hemia fultaem paenia. Wan narawan, hemia blong joen long wan kongregesen long ples blong yu, we i no gat plante pablisa long hem. Sipos no, maet i gat plante pablisa long wan kongregesen, be i no gat plante elda mo man blong givhan. ?Yu yu save givhan long ol kongregesen olsem? I gud yu toktok wetem eria elda, blong luk sipos yu save givhan. Sipos yu wantem go long wan narafala kantri blong givhan long ol brata, yu traem faenemaot sam moa save long saed blong ol kongregesen we oli nidim help.b

I gud yumi tingbaot bakegen stori long Aesea 62:10. Sam man Isrel oli wok had blong mekemgud rod we i go long Jerusalem, mo oli tekemaot ol samting we oli blokem rod ya. Olsem nao, ol man blong God oli save wokbaot gud nomo kasem Jerusalem. Sipos yu wantem mekem wok blong Jehova, yu mas gohed. Jehova bambae i givhan long yu blong yu save mekem wok blong hem. Taem yu stap tekemaot ol samting we oli blokem yu, i gud yu gohed blong askem waes long Jehova. Ale, bambae yu luk se hem i save givhan long yu blong yu ‘mekem rod blong yu i stret.’—Prov. 4:26.