Kwestin

?I stret blong ol Kristin oli bonem bodi blong man we i ded?

I no gat wan vas we i talem se fasin ya i no stret.

Baebol i tokbaot sam man we oli ded, nao ol man oli bonem olgeta, no oli tekem ol bun blong olgeta mo oli bonem. (Jos. 7:25; 2 Kron. 34:4, 5) Maet hemia i blong soemaot se i no stret blong man i berem olgeta. Be taem ol man oli bonem bodi blong man, hemia i no minim oltaem se hem i no stret blong oli berem hem.

Stori blong King Sol mo trifala boe blong hem, i soemaot samting ya. Fofala ya oli ded taem oli stap faet wetem ol man Filistia. Wan long ol boe ya hemia Jonatan. Hem i gudfala fren blong Deved mo hem i givhan bigwan long hem. Taem ol man Isrel blong taon ya Jabes long Gilead oli harem nius ya, ol strong man blong olgeta oli go tekem bodi blong king wetem bodi blong trifala boe blong hem, oli go bonem. Biaen oli karem bun blong olgeta mo oli go berem. Sam taem i pas, Deved i prea long God blong hem i blesem ol man Isrel ya from samting we oli mekem.—1 Saml. 31:2, 8-13; 2 Saml. 2:4-6.

Baebol i talem se God bambae i mekem dedman i laef bakegen. Hemia i min se bambae hem i givimbak laef long man we i ded. Nating sipos ol man oli bin bonem dedbodi blong hem, no oli mekem wan narafala samting long hem, be Jehova i naf blong mekem hem i laef bakegen wetem wan niufala bodi. Yu traem tingbaot trifala man Hibru we King Nebukadnesa i wantem se oli bonem trifala. Trifala i no fraet long faea ya from we trifala i bilif se God bambae i mekem trifala i laef bakegen. (Dan. 3:16-18) Hemia i sem mak long ol man blong God long ol rabis kalabus bifo, we ol soldia oli kilim olgeta oli ded, mo oli bonem bodi blong olgeta. Mo plante man blong Jehova oli ded taem bom i bosta, mo ol man oli no moa faenem bodi blong olgeta. Nating se i olsem, bambae oli laef bakegen.—Rev. 20:13.

Jehova i no nidim blong hivimap evri haf blong bodi blong man we i ded, blong mekem hem i laef bakegen. Yumi kasem save samting ya, taem yumi tingbaot olsem wanem hem i mekem ol tabu Kristin oli laef bakegen. Hem i mekem oli laef bakegen wetem wan spirit bodi blong go laef long heven, sem mak olsem we hem i mekem long Jisas. Jisas i “laef bakegen long spirit.” Ol tabu Kristin ya oli no go long heven wetem bodi we oli laef wetem long wol ya.—1 Pita 3:18, NW; 1 Kor. 15:42-53; 1 Jon 3:2.

Yumi bilif se man bambae i laef bakegen, i no from we ol man oli bonem bodi blong hem, no oli mekem wan narafala samting long bodi blong hem, nogat. Be yumi bilif olsem, from we yumi save se God i naf mo i wantem tumas blong mekem ol promes blong hem oli kamtru. (Wok 24:15) Maet yumi no kasem save gud se hem i mekem ol dedman bifo oli laef bakegen olsem wanem, mo bambae hem i mekem olsem wanem long fiuja. Nating se i olsem, yumi trastem Jehova. Hem “i soemaot finis” se bambae hem i mekem olsem, taem hem i mekem Jisas i laef bakegen.—Wok 17:31; Luk 24:2, 3.

Ol Kristin oli mas tingting gud fastaem, bifo we oli mekem desisen blong bonem bodi blong man we i ded. Oli mas tingbaot sipos ol man long ples blong olgeta oli stap folem fasin ya finis no nogat. Oli mas tingbaot tingting blong ol man ples blong olgeta, mo oli mas faenemaot sipos loa blong kantri i no putum tabu long fasin ya. (2 Kor. 6:3, 4) Be ol man wanwan mo ol famle oli mas mekem desisen sipos oli wantem se oli bonem bodi blong man we i ded, no nogat.