Jisas i Gat Tingting Daon Mo i Kaen

1. ?From wanem yumi save kam klosap long Jehova taem yumi folem fasin blong Jisas?

PLANTE taem yumi traem blong folem fasin blong ol man we yumi laekem olgeta. Long olgeta man we oli laef, Jisas nao i beswan man we yumi save folem fasin blong hem. ?From wanem? Jisas i talem se: “Man we i luk mi, hem i luk Papa blong mi.” (Jon 14:9) Jisas i talem tok ya, from we hem i folem gud ol fasin blong Papa blong hem. Taswe, taem yumi lanem ol fasin blong Jisas, hemia i olsem we yumi lanem ol fasin blong Jehova. Mo taem yumi folem fasin blong Jisas, yumi kam klosap moa long Jehova we i bigfala Masta blong heven mo wol. !Hemia wan bigfala ona we yumi gat!

2, 3. (1) ?From wanem Jehova i tokbaot stori blong laef blong Jisas? ?Jehova i wantem se yumi mekem wanem? (2) ?Bambae yumi tokbaot wanem long stadi ya, mo long nekis stadi?

² Long Baebol, Jehova i tokbaot stori blong laef blong Jisas, long yumi. ?From wanem? From we hem i wantem se yumi save Pikinini blong hem, blong bambae yumi save folem ol fasin blong hem. (Ridim 1 Pita 2:21.) Long Baebol, eksampol we Jisas i soem long yumi, i olsem rod we yumi save folem. ?Hemia i minim wanem? Jehova i wantem se yumi folem rod we Pikinini blong hem i soemaot, hemia i min se yumi folem evri fasin we Jisas i mekem. Jisas i stret gud olgeta, taswe Jehova i save se yumi no naf blong mekem evri samting we oli stret olsem hem. Nating se i olsem, Hem i wantem se yumi traehad blong folem ol fasin blong Jisas.

³ I gud yumi stadi long ol gudfala fasin blong Jisas. Long stadi ya, bambae yumi tokbaot se Jisas i gat tingting daon mo i kaen. Long nekis stadi, bambae yumi tokbaot se Jisas i gat strong tingting mo hem i gat fasin luksave. Taem yumi tokbaot ol fasin ya wanwan, bambae yumi ansa long trifala kwestin ya: ?Ol fasin ya wanwan oli minim wanem? ?Olsem wanem Jisas i soemaot ol fasin ya? ?Olsem wanem yumi save folem ol fasin blong hem?

JISAS I GAT TINGTING DAON

4. ?I minim wanem blong gat tingting daon?

⁴ ?Tingting daon i minim wanem? Plante man we oli flas oli ting se tingting daon i wan fasin we i soemaot se man i no strong, no hem i no gat strong tingting. ?Be yu ting se i tru? Blong talem stret, sipos yumi wantem gat tingting daon, yumi mas gat strong tingting. Man we i gat tingting daon, i defren long man we i flas mo i tinghae long hem wan. Long Baebol, tok ya “tingting daon” oli tanem i kam ‘mekem tingting i stap daon.’ (Filipae 2:3) Blong gat tingting daon, fastaem yumi mas tingbaot fasin we yumi wan yumi gat. Eksampol, wan diksonari blong Baebol i talem se: “Tingting daon i givhan long yumi blong luksave se yumi stap daon long fes blong God.” Mo tu, sipos yumi gat tingting daon, bambae yumi no tingbaot se yumi gud moa long narafala. (Rom 12:3) I no isi long wan sinman blong soemaot fasin ya. Be yumi save lanem blong gat tingting daon, sipos yumi tingting dip long ol gudfala fasin blong Jehova, mo yumi folem eksampol blong Jisas.

5, 6. (1) ?Hu ya Mikael jif blong ol enjel? (2) ?Olsem wanem Mikael i soemaot se hem i gat tingting daon?

⁵ ?Olsem wanem Jisas i soemaot se hem i gat tingting daon? Oltaem Pikinini blong God i gat tingting daon, taem hem i stap long heven olsem wan enjel, mo taem hem i kam long wol olsem wan man we i stret gud. I gud yumi luk sam eksampol.

⁶ Ol fasin blong hem. Buk blong Jud i tokbaot laef blong Jisas fastaem long heven, bifo we hem i kam long wol. (Ridim Jud 9.) Mikael, we hemia Jisas, jif blong ol enjel, hem ‘i no agri wetem Setan’ mo “i stap rao” wetem hem from “bodi blong Moses.” Taem Moses i ded, Jehova i haedem bodi blong hem, mo i berem long wan ples we i no gat man i save faenem. (Dutronome 34:5, 6) Maet Setan i wantem pulum ol man Isrel blong oli yusum bodi blong Moses, blong mekem wosip long hem. Mikael i gat strong tingting blong stopem eni samting we Setan i wantem mekem. Wan buk i talem se tufala tok ya, ‘no agri’ mo “rao” oli save minim “wan rao we i strong, mo man i save pas long kot from.” Hemia i mekem yumi tingbaot se “Mikael, i ‘faet strong agensem raet blong Setan blong tekem bodi’ blong Moses.” Be jif ya blong ol enjel, i save se paoa blong hem i smol nomo. Taswe, hem i pasem kes ya long Jehova we hem nao i Bigfala Jaj, mo hem nomo i gat raet blong jajem Setan. !Hemia wan gudfala fasin we i soemaot se Jisas i gat tingting daon!

7. ?Olsem wanem Jisas i soemaot tingting daon long ol toktok mo ol samting we hem i mekem?

⁷ Taem Jisas i stap long wol, ol toktok mo ol samting we hem i mekem, oli soemaot se hem i gat tingting daon. Ol toktok blong hem. Jisas i neva leftemap hem wan. Be oltaem hem i leftemap nem blong Papa blong hem. (Mak 10:17, 18; Jon 7:16) Jisas i neva tok daonem ol disaepol blong hem, olsem se oli nating nomo. Be hem i respektem olgeta, mo hem i soemaot se hem i trastem olgeta, taem hem i talem ol gudfala toktok long olgeta from ol gudfala fasin we oli gat. (Luk 22:31, 32; Jon 1:47) Ol samting we hem i mekem. Jisas i jusum blong gat wan laef we i no fasfas wetem plante samting. (Matiu 8:20) Hem i glad nomo blong mekem ol wok we ol narafala oli ting nating long olgeta. (Jon 13:3-15) Hem i soemaot se hem i gat tingting daon taem hem i obei gud long papa blong hem. Hemia wan narafala eksampol we yumi save folem. (Ridim Filipae 2:5-8.) Jisas i no olsem ol man we oli flas mo oli no laekem blong obei long narafala. Hem i gat tingting daon, mo hem i mekem evri samting we Jehova i talem, go kasem we hem i ded. I tru nomo se Jisas i wan man we “tingting blong hem i stap daon.”—Matiu 11:29.

YUMI MAS GAT TINGTING DAON OLSEM JISAS

8, 9. ?Olsem wanem yumi save soemaot se yumi gat tingting daon?

⁸ ?Olsem wanem yumi save folem fasin blong Jisas blong gat tingting daon? Ol fasin blong yumi. Taem yumi putum tingting blong yumi i stap daon, yumi luksave sam samting we yumi no gat raet blong mekem. Taswe, yumi no gat raet blong jajem ol narafala. Yumi no mas tok nogud long olgeta, no kros long olgeta from ol samting we oli mekem. (Luk 6:37; Jemes 4:12) Tingting daon bambae i givhan long yumi blong yumi no “tinghae tumas long yumi wan.” Hemia i min se, yumi no tinghae tumas long yumi wan, nao yumi harem se yumi gud moa long ol narafala we oli no gat janis blong mekem wan wok olsem yumi. (Prija 7:16) Ol elda we oli gat tingting daon, oli no ting se oli gud moa long ol brata mo sista. Be oli ‘luk ol narafala man olsem we oli gud moa long olgeta,’ hemia i min se oli tingbaot ol narafala olsem se oli moa impoten i bitim olgeta.—Filipae 2:3; Luk 9:48.

⁹ Yu traem tingbaot Brata W. J. Thorn, we i wok olsem eria elda stat long yia 1894. Afta plante yia we hem i mekem wok ya, hem i go long betel long New York, mo i mekem wok ya blong lukaot long ol faol long fam. Taem Brata Thorn i gat tingting ya se hem i sud mekem wan wok we i moa impoten, hem i talem long hem wan se: “!Ei! Yu yu wan smol das nomo. ?Yu flas from wanem?” (Ridim Aesea 40:12-15.) !Hemia wan nambawan fasin blong soemaot tingting daon!

10. ?Olsem wanem yumi save soemaot se yumi gat tingting daon, long ol toktok mo ol samting we yumi mekem?

¹⁰ Ol toktok blong yumi. Sipos tingting blong yumi i stap daon, bambae toktok blong yumi i soemaot samting ya. (Luk 6:45) Taem yumi storian wetem narafala, bambae yumi no tokbaot ol wok blong yumi mo ol samting we yumi nomo yumi stap mekem. (Ol Proveb 27:2) Be, bambae yumi talem ol gudfala tok long ol brata mo sista blong yumi, from ol gudfala wok mo ol gudfala fasin blong olgeta. (Ol Proveb 15:23) Ol samting we yumi mekem. Ol Kristin we oli gat tingting daon, oli no traem blong gat haenem long wol ya. Be oli jusum blong gat wan laef we i no fasfas, mo oli mekem ol wok we i daon. Olsem nao, oli save mekem moa long wok blong Jehova. (1 Timoti 6:6, 8) Samting we i moa impoten se, yumi save soemaot se yumi gat tingting daon, taem yumi obei. Yumi mas gat tingting daon blong yumi save “obei long ol tok blong olgeta we oli lukaot” long kongregesen, mo blong folem ol advaes we ogenaesesen blong Jehova i givim blong lidim yumi.—Hibru 13:17.

JISAS I KAEN

11. ?Man we i kaen hem i olsem wanem?

¹¹ ?Man we i kaen hem i olsem wanem? Tok ya “kaen” i min se man i no mekem i strong tumas long narafala mo i kea long narafala. Fasin ya kaen, hem i joen wetem lav, mo i sem mak long fasin blong soemaot sore mo blong givhan long man. Baebol i tokbaot ‘kaen fasin,’ ‘fasin sore,’ mo “lav.” (Luk 1:78; 2 Korin 1:3; Filipae 1:8) Wan buk i talem se, taem yumi kaen long man, hemia i no jes wan filing nomo blong soemaot se yumi sore long hem. Buk ya i talem tu se, taem yumi kaen, yumi “soemaot se yumi kea long narafala, mo yumi wantem givhan long hem.” Hemia i min se yumi tekem aksen blong mekem wan samting we bambae i jenisim laef blong ol narafala. Kaen fasin i wan fasin we i pusum wan man blong givhan long narafala blong mekem sam jenis long laef blong hem.

12. ?Wanem i soemaot se Jisas i kaen mo i sore long narafala? ?Fasin ya i pusum hem blong mekem wanem?

¹² ?Olsem wanem Jisas i soemaot se hem i kaen? Ol filing mo ol samting we hem i mekem. Jisas i kaen mo i gat sore long narafala. Taem hem i luk Meri mo ol narafala oli stap krae from we Lasaros i ded, hem tu i krae. (Ridim Jon 11:32-35.) Mo tu, Jisas i sore long pikinini blong wan wido woman, nao i mekem hem i laef bakegen. Sem fasin ya nao i pusum Jisas blong mekem Lasaros i laef bakegen. (Luk 7:11-15; Jon 11:38-44) Samting we Jisas i mekem blong soemaot se hem i kaen, maet i givhan long Lasaros blong gat janis ya blong laef long heven. Bifo long samting ya, Jisas i soemaot se hem i “kaen” long wan bigfala hip blong man we oli kam long hem, ale “hem i stat tijim olgeta long plante samting.” (Mak 6:34) !Samting we Jisas i mekem i jenisim laef blong olgeta we oli stap folem ol tijing blong hem! Jisas i kaen, be fasin ya i no jes wan filing nomo. Jisas i soemaot fasin ya taem hem i mekem samting blong givhan long narafala.—Matiu 15:32-38; 20:29-34; Mak 1:40-42.

13. ?Olsem wanem Jisas i toktok kaen long ol narafala? (Yu luk pija long stat blong stadi.)

¹³ Hem i toktok kaen. Jisas i gat sore, mo fasin ya i pusum hem blong toktok kaen long ol narafala, speseli long ol man we oli harem nogud. Matiu i talem bakegen ol tok blong Aesea, blong tokbaot Jisas. Aesea i talem se: “Hem bambae i no save mekem i strong tumas long ol man we oli no strong, mo bambae i no save spolem olgeta we oli no gat paoa.” (Aesea 42:3; Matiu 12:20) ?Tok ya i minim wanem? Jisas i toktok long fasin we i mekem ol man oli harem gud. Hem i talem ol tok we oli leftemap tingting blong “ol man we tingting blong olgeta i foldaon olgeta.” (Aesea 61:1) Hem i singaot ol man we oli ‘stap hadwok tumas, mo oli stap karem ol hevi samting,’ blong oli kam long hem, olsem nao oli save ‘faenem pis long laef blong olgeta.’ (Matiu 11:28-30) Hem i pulum ol disaepol blong hem blong oli tingbaot se, God i kaen mo hem i stap tingbaot ol wanwan man we oli mekem wosip long hem. Hemia i minim tu, ol ‘pikinini,’ no olgeta we ol man oli luk olgeta olsem se oli no impoten.—Matiu 18:12-14; Luk 12:6, 7.

YUMI MAS KAEN OLSEM JISAS

14. ?Olsem wanem yumi save soemaot se yumi kaen long narafala?

¹⁴ ?Olsem wanem yumi save folem fasin blong Jisas blong kaen long man? Ol filing blong yumi. Baebol i talem se yumi mas ‘gat sore long ol man mo yumi mas mekem i gud long olgeta,’ nating se maet samtaem yumi harem se i had blong mekem. Hemia i olsem “niufala laef ya” we i olsem prapa klos blong yumi we Jehova i wantem se olgeta Kristin oli mas putum. (Ridim Kolosi 3:9, 10, 12.) ?Olsem wanem yu save kaen long narafala? Baebol i talem se: ‘Yufala i talemaot olgeta tingting blong yufala.’ (2 Korin 6:11-13) Taem narafala i talemaot ol tingting blong hem, mo samting we hem i stap wari long hem, yu mas lesin gud. (Jemes 1:19) I gud yu askem se: ‘Sipos mi kasem sem trabol ya, ?bambae mi harem olsem wanem? ?Wanem samting we mi nidim?’—1 Pita 3:8.

15. ?Olsem wanem yumi save givhan long ol man we oli harem nogud tumas from wan trabol?

¹⁵ Ol samting we yumi mekem. Sipos yumi kaen long ol man, bambae yumi wantem givhan long olgeta, speseli taem oli harem nogud tumas from wan trabol we i kasem olgeta. ?Olsem wanem yumi save givhan long olgeta? Long Rom 12:15, i talem se: “Taem ol man oli stap harem nogud, oli stap krae, be yufala tu i mas krae wetem olgeta.” Plante taem ol man oli nidim we narafala i leftemap tingting blong olgeta, i bitim we oli tokbaot rod blong winim trabol blong olgeta. Oli nidim wan fren we i intres long olgeta, mo i glad blong lesin long olgeta. Wan sista we gel blong hem i ded, i harem gud bakegen taem ol brata mo sista oli leftemap tingting blong hem. Hem i talem se: “Mi mi glad tumas taem mi luk ol fren oli kam mo oli krae wetem mi.” Mo tu yumi soemaot se yumi kaen, taem yumi mekem wan samting blong givhan long narafala. Maet i gat wan wido we i nidim blong narafala i givhan long hem blong wokemgud haos blong hem. No maet i gat wan olfala Kristin we i nidim we narafala i tekem hem i go long ol miting, long wok blong prij, no blong go luk dokta. Nating se samting we yumi mekem i smol nomo, be hemia i save jenisim laef blong hem. (1 Jon 3:17, 18) Samting we i moa impoten se, yumi save soemaot se yumi kaen long narafala, taem yumi traehad blong talemaot gud nius long olgeta. !Hemia wan nambawan rod we i save jenisim laef blong ol man!

16. ?Yumi save talem wanem blong leftemap tingting blong olgeta we oli harem nogud?

¹⁶ Ol toktok blong yumi. From we yumi lavem narafala tumas mo yumi kaen long olgeta, samting ya bambae i pusum yumi blong “toktok gud blong leftemap tingting blong olgeta we oli harem nogud oltaem from we tingting blong olgeta i foldaon.” (1 Tesalonaeka 5:14, NW) ?Yumi save talem wanem blong leftemap tingting blong olgeta? Yumi save talem long olgeta, se yumi lavem olgeta bigwan. Yumi talem ol gudfala toktok long olgeta. Yumi givhan long olgeta blong oli luk ol gudfala fasin mo ol gudfala wok blong olgeta. Yumi save talem long olgeta se oli spesel long ae blong Jehova from we Jehova nao i givhan long olgeta blong oli faenem trutok. (Jon 6:44) Mo tu, yumi save talem long olgeta se, Jehova i kea bigwan long ol man blong hem we “tingting blong olgeta i kam nogud” no “tingting blong olgeta i foldaon olgeta.” (Ol Sam 34:18) Ol toktok blong yumi we oli kaen, oli save leftemap tingting blong man we i harem nogud.—Ol Proveb 16:24

17, 18. (1) ?Jehova i wantem se ol elda oli gat wanem fasin? (2) ?Long nekis stadi bambae yumi tokbaot wanem?

¹⁷ Ol elda, Jehova i wantem se yufala i kaen gud, taem yufala i stap lukaot ol sipsip blong hem. (Ol Wok 20:28, 29) Yufala i mas tingbaot se, hem i wok blong yufala blong tijim, leftemap tingting, mo mekem ol sipsip blong Jehova oli harem gud. (Aesea 32:1, 2; 1 Pita 5:2-4) Taswe wan elda we i kaen mo i gat sore, bambae i no traem blong bos long narafala, mo i mekem ol rul, no i fosem olgeta blong mekem samting we oli no naf blong mekem. Be, hem i wantem we ol brata mo sista oli glad. Mo hem i trastem se, lav we ol brata mo sista oli gat long Jehova, bambae i pusum olgeta blong givim beswan samting we oli gat long Jehova.—Matiu 22:37.

¹⁸ Taem yumi tingting dip long fasin blong Jisas we i gat tingting daon mo i kaen, yumi wantem tumas blong folem ol fasin ya. Long nekis stadi, bambae yumi tokbaot olsem wanem blong folem fasin blong Jisas blong gat strong tingting mo fasin luksave.