STORI BLONG FRAN PEJ | ?HU YA OL WITNES BLONG JEHOVA?
?From wanem ol Witnes blong Jehova oli prij?
Samting we i makemaot ol Witnes, hemia wok blong prij we oli mekem long ol haos wanwan, mo long ol pablik ples, mo long eni ples we oli faenem ol man. ?From wanem oli prij?
Ol Witnes blong Jehova oli prij blong presem God mo blong talemaot nem blong hem. (Hibrus 13:15) Oli obei long tok blong Jisas we i talem se: “Yufala i mas go long ol man long olgeta ples long wol, blong pulum olgeta oli kam man blong mi, . . . mo yufala i mas tijim olgeta blong oli folem olgeta tok ya we mi mi givim finis long yufala.”—Matiu 28:19, 20.
Ol Witnes blong Jehova oli lavem ol man. (Matiu 22:39) Oli save se klosap olgeta man oli gat prapa bilif blong olgeta, mo i no evri man we oli glad blong lesin long olgeta. Nating se i olsem, oli harem se oli mas tijim ol man long tok blong Baebol, from we i save sevem laef blong olgeta. Hemia nao from wanem oli gohed nomo blong ‘tijim ol man, mo blong talemaot gud nius ya blong Jisas,’ olsem ol Kristin long taem bifo.—Ol Wok 5:41, 42.
Toktok blong wan man we i stadi long fasin blong ol man, nem blong hem Antonio Cova Maduro, i kamaot long niuspepa blong Veneswela (El Universal): “Ol Witnes blong Jehova oli wok wetem ful paoa blong olgeta, . . . blong mekem tabu tok blong God i kasem olgeta ples long wol.”
Plante man we oli ridim ol buk blong ol Witnes blong Jehova, oli no Witnes. Mo plante milian man we ol Witnes oli mekem Baebol stadi long olgeta, oli blong narafala skul. Be oli glad we ol Witnes oli go luk olgeta.
Sipos yu gat sam narafala kwestin long saed blong ol Witnes blong Jehova, yu save faenem ansa blong olgeta taem yu mekem olsem:
Yu storian wetem wan Witnes blong Jehova.
Yu go long Websaet ya www.jw.org/bi.
Yu go long miting blong ol Witnes, we i fri mo eni man nomo i save go long hem.