Baebol i Ansa
?From wanem i gat ol profet tok long Baebol?
?From wanem Baebol i tokbaot ol samting we i kamaot long wol tede?—Luk 21:10, 11.
Long Baebol, i gat plante profet tok. Be i no gat wan man we i save talemaot fiuja. Taswe, ol profet tok blong Baebol we oli kamtru finis, oli soemaot se Baebol i kamaot long God.—Ridim Josua 23:14; 2 Pita 1:20, 21.
Ol profet tok blong Baebol we oli kamtru finis, oli mekem se yumi bilif long ol samting we God i talem. (Hibrus 11:1) Mo ol profet tok ya oli mekem we yumi trastem ol gudfala promes blong God long fiuja. Taswe, yumi putum tingting blong yumi i stap strong long ol promes ya.—Ridim Ol Sam 37:29; Rom 15:4.
?Ol profet tok ya oli givhan long yumi olsem wanem?
Sam profet tok blong Baebol oli givim woning long ol man blong God se oli mas mekem wan samting. Yu traem tingbaot ol Kristin bifo. Taem oli luk we sam profet tok oli kamtru, oli aot long Jerusalem oli ronwe. Nao taem ol ami oli kam spolem taon ya from we plante man oli no wantem folem Jisas, be ol Kristin oli stap sef nomo long wan ples we i longwe long Jerusalem.—Ridim Luk 21:20-22.
Long taem blong yumi, ol profet tok we oli kamtru oli soemaot se i no longtaem, Kingdom blong God bambae i finisim ol gavman blong man. (Daniel 2:44; Luk 21:31) Taswe, i impoten tumas we yumi evriwan i mas mekem wan samting kwiktaem, nao Jisas Kraes, King ya we God i putumap, bambae i glad long yumi.—Ridim Luk 21:34-36.