Gat Stret Tingting Long Ol Mastik

Don mo Makreta i glad tumas we gel blong tufala mo famle blong hem, oli kam visitim tufala. Long laswan taem we oli kakae tugeta, Makret we i wan jif kuk bifo, i wantem kukum pasta mo jis, beswan kakae blong tufala bubu blong hem.

Taem evriwan long famle oli sidaon raon long tebol, Makret i karem kakae ya i kam, mo i putum long medel blong tebol. Be taem hem i openem lid blong sospen ya, hem i harem nogud from we hem i faenemaot se i gat sos blong jis nomo. !Hem i fogetem blong putum pasta!b

Nating se yumi gat hamas yia o yumi gat plante save, be yumi evriwan i mekem mastik. Maet yumi mestem long toktok blong yumi, yumi mekem wan gudfala samting be long wan rong taem, o maet yumi foget blong mekem wan samting. ?From wanem yumi mekem mastik? ?Olsem wanem blong winim? ?Yumi save blokem? Blong ansa long ol kwestin ya, yumi mas gat stret tingting long ol mastik.

GAT TINGTING BLONG GOD LONG OL MASTIK

Taem yumi mekem wan gudfala samting, yumi glad we narafala i presem yumi from. Be taem yumi mekem mastik, nating sipos ol narafala oli no luk, ?bae yumi talemaot se yumi mekem wan mastik? Blong mekem olsem, yumi mas gat tingting daon.

Sipos yumi tingbaot yumi nomo, bae yumi haedem ol mastik blong yumi, yumi blemem ol narafala from, o giaman se yumi no mekem. Fasin olsem i save mekem se yu kasem nogud frut, yu no stretem problem ya, mo bae ol narafala oli save blemem man we i no mekem mastik, be blong nating nomo. Nating sipos yumi no kasem nogud frut blong ol mastik blong yumi naoia, be yumi mas tingbaot se long en, “yumi wanwan i mas talemaot olgeta fasin blong yumi long God.”—Rom 14:12.

God i gat stret tingting long ol mastik. Buk blong Ol Sam i tokbaot God se, “hem i gat sore, mo oltaem hem i glad tumas blong mekem i gud long man” mo hem i “no save gohed oltaem blong tok strong long man, mo kros blong hem i no save stap olwe.” God i save se ol man oli no stret gud olgeta, taswe hem i kasemsave se yumi no naf blong mekem fasin we i stret gud olgeta, from we “oltaem hem i stap tingbaot we yumi kamaot long asis nomo.”—Ol Sam 103:8, 9, 14.

From we Jehova i olsem wan Papa we i sore long yumi, hem i wantem se yumi ol pikinini blong hem, yumi tu yumi gat stret tingting long ol mastik, olsem we hem i gat. (Ol Sam 130:3) Hem i yusum Tok blong hem Baebol, blong i givim plante advaes we oli save givhan long yumi taem yumi mekem mastik, o taem narafala i mekem mastik.

ROD BLONG STRETEM OL MASTIK

Taem wan man i mekem mastik, hem i save spenem plante taem o paoa blong blemem narafala o blong stretem mastik ya. Sipos yu mekem wan mastik olsem maet yu talem wan tok we i no stret, i gud yu talem sore blong stretem mastik ya, mo gohed blong stap fren gud. ?Yu yu mekem wan samting we i rong we i mekem yu o narafala i harem nogud? I bitim we yu kros long yu wan o blemem narafala, i gud yu mekem bes blong yu blong stretem problem ya. Sipos yu stap blemem narafala bae samting ya i mekem se evriwan i wari mo bae i mekem se trabol ya i kam bigwan moa. I gud yu lanem lesen long mastik blong yu, yu stretem, mo yu gohed blong mekem samting we yu mas mekem.

Taem wan narafala i mekem mastik, i isi nomo blong yumi soem se yumi no glad long mastik ya. Be i gud moa blong folem advaes blong Jisas we i se: “Fasin we yufala i wantem blong ol narafala oli mekem long yufala, yufala i mas mekem long olgeta.” (Matiu 7:12) Taem yu mekem mastik, maet wan smol wan nomo, yu wantem se ol narafala oli mekem i gud long yu, mo oli no tingbaot mastik ya. Taswe i gud we yu mekem sem mak tu long ol narafala.—Efesas 4:32.

OL ADVAES BLONG NO MEKEM TUMAS MASTIK

Wan diksonari i eksplenem se ol mastik oli kamaot from “jajmen we i no stret, man i no gat i naf save long wan samting, o man i no tingting gud bifo i mekem wan samting.” Yumi evriwan i mekem sam long ol mastik ya wan o tu taem. Be, sipos yumi folem sam impoten advaes blong Baebol, bae yumi no mekem tumas mastik.

Wan long ol advaes ya i stap long Ol Proveb 18:13, we i se: “Yu mas lesin long tok blong ol man fastaem, nao biaen bambae yu save givim ansa long olgeta. Sipos no, fasin ya i soemaot we yu yu no gat hed, mo bambae yu sem bigwan from.” Yes, sipos yu tekem smoltaem blong lesin gud fastaem mo tingting gud long wanem we bae yu talem, bae yu no talem wan krangke tok o tekem wan aksen we i no stret. Ol save we yu kasem taem yu lesin gud i save givhan long yu blong no mekem jajmen we i no stret, mo blong no mekem mastik.

Wan narafala advaes blong Baebol i se: “Sipos i gat rod, yufala i mas mekem bes blong yufala blong yufala i gat pis wetem olgeta man.” (Rom 12:18) Mekem bes blong yu blong gat pis mo fasin joen gud. Taem yu wok wetem ol narafala, yu mas tingbaot olgeta, respektem olgeta, mo talem ol gudfala tok long olgeta mo leftemap tingting blong olgeta. Sipos yu mekem olsem, i isi blong narafala i fogivim yu o i no tingbaot mastik blong yu. Mo tu, sipos yu mekem olsem bae i isi blong winim ol bigfala problem.

Yu traem blong lanem wan gudfala samting long wan mastik. I bitim we yu mekem eskius from samting we yu talem o mekem, i gud yu luk mastik ya olsem wan janis blong wokem sam gudfala fasin. ?Yu luksave se yu nidim blong gat longfala tingting, kaen fasin, bos long tingting? ?Olsem wanem long kwaet fasin, pis, mo lav? (Galesia 5:22, 23) Antap long hemia, yu save lanem tu blong no moa mekem mastik ya nekis taem. Yu no mas ting nogud long yu wan, o tingbaot filing blong yu wan tumas. Sipos yu mekem wan fani samting blong laf, hemia i save givhan blong daonem wari.

BLESING WE YUMI SAVE KASEM

Taem yumi gat stret tingting long ol mastik, bae hemia i givhan long yumi blong save samting we yumi mas mekem taem i gat wan mastik. Mo bae yumi gat pis long tingting mo gat pis wetem ol narafala. Sipos yumi traehad blong lanem lesen from mastik blong yumi, bae yumi waes moa, mo bae ol narafala oli laekem yumi. Bae yumi no harem nogud tumas mo tingting nogud long yumi wan. Sipos yumi tingbaot se ol narafala tu oli stap traehad blong stretem ol mastik blong olgeta, bae yumi kam klosap long olgeta. Samting we i impoten moa, hemia se, yumi save lanem blong folem fasin blong God blong lavem ol narafala mo rere blong fogivim olgeta.—Kolosi 3:13.

?Mastik blong Makret we yumi bin tokbaot i spolem visit blong famle blong hem? Nogat. Evriwan oli luk mastik ya olsem wan fani samting, speseli Makret. !Mo oli glad nomo blong kakae, nating se i no gat pasta! Biaen, tufala bubu blong Makret i talem stori ya bakegen long ol pikinini blong tufala, mo oli tingbaot bakegen ol gudfala taem we oli gat wetem abu blong tufala. !I jes wan mastik nomo!