Yu Kasem Wan Bigfala Sik

Linda we i gat 71 yia, i talem se: “Taem dokta i talem se mi kasem kansa long bel blong mi, mi sua se bambae mi ded. Be taem mi gobak long haos, mi stap tingting se: ‘I tru se hemia wan trabol we mi no tingbaot, be mi mas faenem wan rod blong gotru long hem.’”

Elis we i gat 49 yia, i talem se: “Mi gat wan sik we i mekem se ol string long wansaed fes blong mi oli soa we oli soa. Sam samtaem, tingting blong mi i foldaon olgeta. Plante taem, mi harem se i no gat man i kea, mo mi tingbaot blong kilim mi wan i ded.”

Ol famle blong wan we i sik oli joen wetem hem

SIPOS yu o wan famle blong yu i kasem wan bigfala sik, ating yu save ol wari we i kamaot from. Yu stap traehad blong winim sik ya, mo antap long hemia, ol filing blong yu oli fasfas mo olgeta we oli lukaot long yu tu, oli harem nogud. Mo tu, taem yu go luk dokta yu fraet mo wari, maet i had blong kasem mo pem stret meresin, o meresin i mekem yu yu slak. Ol wari ya oli save mekem yu yu harem nogud tumas.

?Wanem i save givhan? Plante oli luk se taem oli prea mo ridim ol gudfala vas long Baebol, hemia i leftemap tingting blong olgeta. Taem ol famle mo fren oli soemaot lav mo sapotem yu, hemia tu i save givhan.

SAMTING WE I GIVHAN LONG SAMFALA

Robet we i gat 58 yia, i talem se: “Yu mas bilif strong long God, nao hem bambae i givhan long yu. Talemaot ol filing blong yu long hem. Prea from tabu spirit, blong yu save gat kwaet tingting mo yu no mekem famle blong yu i wari tumas.

“I gud tumas taem famle i glad blong givhan mo sapotem yu. Evri dei, wan o tu famle i ring blong jekem mi. Ol fren we oli stap olbaot long ol defdefren ples, oli leftemap tingting blong mi. Oli mekem mi mi harem gud, mo tingting blong mi i kam strong bakegen.”

Sipos yu visitim wan fren we i sik, traem folem advaes ya blong Linda se: “I gud yu tokbaot ol samting we yu stap tokbaot oltaem, from we taem man i sik, plante taem hem i no wantem tokbaot sik blong hem, be hem i wantem save yet long ol samting we i stap hapen raonabaot long hem.”

Sipos yu kasem wan bigfala sik, God i save givim paoa long yu, mo ol tok blong Baebol i save leftemap tingting blong yu. Ol famle mo fren we oli lavem yu, olgeta tu oli save mekem tingting blong yu i strong se laef i no blong nating nomo.

Advaes Blong Baebol

Dipen Long God.

‘Mi mi prea long Jehova, nao hem i ansa long mi, i tekemaot fraet. Mi singaot i go long Hae God, nao hem i harem mi.’—Ol Sam 34:4, 6.

Linda we yumi tokbaot finis, i talem se: “Taem mi prea, mi no stap askem long God blong i hilim mi. Be mi askem blong hem i givim paoa blong mi save gotru long hadtaem ya.”

Ridim Baebol.

‘Bambae i no moa gat man i save talem se hem i sik.’—Aesea 33:24.

Tingting dip long ol promes blong God long fiuja. Hemia i save givim hop, mo paoa blong stanap strong.

Askem help.

‘Fren blong yu, oltaem hem i stap soemaot we hem i lavem yu, mo ol brata blong yumi oli save givhan long taem blong trabol.’—Ol Proveb 17:17.

Elis, we yumi tokbaot finis, i givim advaes se: “Yu no mas stap yu wan oltaem. Letem ol fren blong yu oli halpem yu. Maet i gat sam taem we tingting i foldaon, mo yu ting se God tu i no stap lesin long yu. Be yu no mas stap yu wan.”