Yumi Kam Naf Moa Blong Tij—Nao Yumi Askem Ol Gudfala Kwestin
1 “Jisas i luk we plante man oli stap, nao hem i go antap long wan hil. Hem i sidaon mo ol man blong hem oli kam sidaon raon long hem, no hem i stap tijim olgeta.” (Mat. 5:1, 2) Jisas i hae moa long ol narafala tija mo hem i save gud long fasin blong tijim ol man. Hem i askem plante gudfala kwestin long ol man we oli harem hem, ale olgeta oli tingtinggud long ol tok blong hem. Rod ya we hem i yusum blong tij i mekem se trutok i fasgud long tingting mo long hat blong ol man ya. From we yumi disaepol blong hem, yumi tu bambae yumi folem ol fasin blong Jisas taem yumi tijim ol man.—Mat. 17:5–7, 24–26; 18:12; Mak 11:29, 30.
WOK BLONG OL KWESTIN
2 Ol gudfala frut we yumi save kasem long wok blong tijim ol man oli dipen bigwan long fasin blong yumi, taem yumi askem kwestin long olgeta. Sipos yumi gat gudfala fasin blong yusum ol kwestin, ol kwestin bambae oli olsem wan impoten tul we yumi yusum blong tijim ol man. Ol kwestin oli save givhan long wan man we i stadi blong hem i luksave olsem wanem tufala tingting oli joen gud tugeta, ale hem nomo i faenem ol samting we hem i mas mekem. Ol kwestin oli givhan gud long yumi long 3 defren fasin.
3 Fastaem, ol kwestin oli halpem man blong yusum ol prapa tok blong hem taem hem i givim ansa. Long fasin olsem, man we i tijim wan narafala i gat rod blong luksave sipos stadi blong hem i kasem save long poen we i stap long buk we tufala i stadi long hem, no no gat. Maet yufala i makem long buk Joen Tugeta Long Wosip Blong Trufala God se i gat ol kwestin oli stap long en blong ol japta long bokis “Tingtingbak”. Rod ya i nyufala from we bifo, i gat kwestin long ol haf mo long botom blong ol pej nomo. Ol kwestin ya oli pulum tingting blong man long ol stampa poen blong japta mo oli givhan gud long ol man we oli stadi blong oli mekem ol samting ya i wok long laef blong olgeta. Be tu, i gat plante kwestin long sam bokis blong buk ya. Tingbaot ol eksampel we i stap long ol pej 24 mo 94 (buk 1).
4 Namba tu samting, se ol kwestin oli givhan long man blong hem i tingtinggud mo blong hem i luksave from wanem ol samting oli olsem. Ale ol man ya oli save gat gudfala tingting mo oli save skelem gud ol samting we oli bilif long hem wetem ol trutok we oli lanem long Tok blong God, Baebol. Yufala i save tingbaot ol kwestin long ol haf 13 kasem 19, pej 61 kasem 63, no ol haf 13 kasem 17, pej 95 mo 96 blong buk Laef Foreva.
5 Namba tri samting: Ol kwestin bambae oli halpem man we i stadi blong talemaot tingting blong hem long saed blong ol trutok blong Baebol. Taem yufala i mekem Baebol–stadi, yufala i save tekem jans blong askem kwestin olsem: “?Wanem tingting blong yu long saed ya? ?Tingting olsem i stret, hem i tru? ?I impoten we yumi mekem advaes ya i wok long laef blong yumi?” Yumi mas lesin gud long ol ansa we ol man oli save givim long yumi, ale bambae yumi save olsem wanem blong mekem se man ya i laekem Jeova wetem ‘ful hat blong hem.’—Mat. 22:37.
OL DEFREN KAEN KWESTIN
6 Taem yumi askem kwestin long wan man, oli mas ansa stret long kwestin blong yumi: ?Hu? ?Wanem? ?Wetaem? ?Weples? Samfala kwestin oli pulum man blong talemaot tingting blong hem, no oli givhan long hem blong faenemaot lesen we i stap: ?Olsem wanem? ?From wanem? Haf 5 i soemaot sam kwestin we yumi save askem long ol man blong oli talemaot tingting blong olgeta. I gat sam kaen kwestin we yumi talem tu tri samting long wan man, nao hem i mas talem weswan i gud. I gat sam narafala kwestin bakegen we man i save ansa wetem yes no no. I gat ol kwestin blong tingtingbak, ol kwestin we oli makemgud ol stampa poen, mo sam narafala kwestin bakegen. Plante taem ol kwestin we oli sot mo ol kwestin we oli laenap long wan samting nomo oli gud moa from we man i gat wan ansa nomo blong givim.
7 Taem we yumi askem kwestin long ol man, yumi wantem we oli kasem save long trutok. Ol ansa we bambae oli givim oli halpem yumi, nao yumi save sipos oli stap gru long saed blong speret mo sipos ol tok ya oli kasem hat blong ol. (Efes. 3:17–19) Ol gudfala kwestin oli save trenem tingting blong ol studen, nao oli save faenem ol ansa we oli kam long Baebol. Nao samting ya i save mekem se oli tijim gud voes blong hat blong olgeta. (Traem tingbaot ol rod we Pol i yusum long Galesia 3:1-6 mo ol 17 kwestin we hem i askem long 1 Korin 9:11–14.) Sipos yumi yusum gud ol kwestin, bambae yumi givhan long ol studen blong oli mekem ol trutok we oli lanem oli wok long laef blong olgeta.—Aes. 25:9.
8 Sipos yumi tijim gud olgeta man, bambae yumi save kasem fulap blesing from. Taem we yumi tijim ol man, yumi stap serem wan gudfala samting wetem ol. Yumi yusum ol samting we yumi gat blong halpem ol narafala. ?Yu yu wantem traehad blong kam wan tija we i naf gud? Wok ya i save mekem man i rili harem gud. Sipos yumi mekem wok olsem, bambae yumi save glad long laef blong yumi mo yumi save harem gud from we yumi mekem wan wok we i gudwan.