Talemaot Gud Nyus—Long Taem Blong Ol Holede
1 Long manis ya plante man oli stap traehad blong harem gud long laef blong wol ya. ?Olsem wanem long yu, yu yu harem se yu yu no save toktok wetem ol man ya we i luk olsem we oli bisi tumas? Nating se ol man oli yusum nogud alkol oli dring tumas long holede ya, be plante long olgeta oli tanem tingting blong olgeta long tok ya we yumi stap harem oltaem se “Pis i stap wetem ol man we God i glad long olgeta.”
2 I tru se bambae yumi mitim plante man we oli bisi long ol holede ya. Taswe i nidim blong yumi tingtinggud long saed ya. Taem Jisas i stap long wol, hem i no luksave ol filing blong ol narafala man nomo no hem i harem sore long olgeta, be hem i luksave nid blong olgeta mo hem i traehad blong givhan long olgeta. Tede ol man we oli fraetgud long God oli mas harem mesej blong Kingdom.—Mat. 9:36, 37.
3 Taem man blong haos i kam long doa, traem luksave wanem samting i stap long haos blong hem mo tingbaot. ?Olsem wanem, hem i bisi wetem ol fren blong hem no hem i stap rere long lafet? From samting ya ating i gud blong mekem tok blong yu i sot nomo. Be maet yu save ting se man ya i no rili bisi, nao wetem kaen fasin mo fasin blong tingbaot narafala maet yu save soem wan gudfala rod blong wetnes long man ya.
4 ?Bambae Yu Save Talem Wanem?: Afta we yu talem halo long man ya, maet yu save talem se: “Naoia plante man oli tokbaot pis long wol long ol man we God i glad long olgeta. ?Wanem tingting blong yu, yu ting se trufala pis bambae i stap, sipos olsem, bambae i kamaot olsem wanem?” Letem man blong haos i ansa, mo yusum Stampa Tok Blong Prij mo buk we yu seremaot.
5 Sipos yu harem se i moa gud we toktok i sot moa, maet yu save talem se: “Long taem ya blong yia, mifala i faenem se plante man oli tingbaot dei we Jisas i bon long hem. Hem i impoten taem. ?Yu wantem bambae mi soemaot long yu long Baebol wan narafala taem we i impoten—hemia dei we Kingdom blong God bambae i kam? Jisas hem wan i talem samting ya . . . [Ridim Matyu 6:33.].” Afta, yu save soemaot long man blong haos buk we yumi seremaot long manis ya, mo tokbaot poen we i stret long Kingdom.
6 Sipos ol man oli talem hapi Krismas no hapi Nyu Yia long yumi, i no nid blong yumi toktok plante long bisnes ya. Be, yumi save talem tangkyu long olgeta from kaen fasin blong olgeta mo taem we oli yusum blong lesin long yumi. Be, sipos oli askem yumi wanem tingting blong yumi long ol holede, bambae yumi save ansa long trutok mo wetem fasin blong respek. Reasoning buk i givhan long yumi wetem ol gudfala tok long pej 176-178 (161-178).
7 Tingbaot Narafala Man: Long dei blong Krismas mo Nyu Yia yumi save soemaot se yumi stap tingbaot ol narafala man, taem yumi no go long haos blong olgeta long moning tumas. From we yumi no wantem spolem slip blong ol man ya we oli wantem slip let long ol dei ya, i gud yumi statem wok blong prij let lelebet. No yumi save statem miting blong yumi wetem ol visit. Mekem visit long olgeta we yumi save se bambae oli glad long yumi. Yumi luksave waes we aposol Pol i givim long advaes ya se: “Long olgeta samting we mifala i mekem, mifala i stap soemaot we mifala i man blong wok blong God.”—2 Kor. 6:4.
8 I gat ol gudfala ekspiryens we oli kamaot from wok blong prij long ol dei blong holede. Yes, bambae yumi nidim blong yusum wan gud rod blong soemaot mesej blong trutok long wan fasin we hat no tingting blong man blong haos i save glad long hem. Tingbaot advaes blong Pol long Kolosi 4:6 se: “Yufala i mas save rod blong givim ansa long evri man, we i stret gud long olgeta evriwan.” Advaes ya i stret long taem blong ol holede.