Talemaot Gud Nyus Long Taem Blong Ol Lafet

¹ Nating se lafet blong Nuyia mo Krismis oli hiten lafet, be moa long wan taosen milyan “Kristin” oli gohed nomo blong mekem ol lafet olsem evri yia. Fulap man oli gat strong tingting se God i laekem ol lafet ya. ?Taswe, long taem blong ol lafet, bambae yumi mekem wanem blong tajem hat blong olgeta wetem gud nyus?

Kaengud Fasin Mo Respek

² Ol elda bambae oli putumap sam miting blong prij long taem blong ol lafet from we plante long yumi bambae oli spel long taem ya. Taem we yumi putum wan taem we i stret blong go prij long olgeta haos wanwan, yumi no mas foget se ol man oli stap girap let long ol dei ya.

³ Long minista wok, maet bambae yumi mitim samfala man we oli stap rerem kakae no oli stap lukaot long ol man we oli kam visitim olgeta. Taem ya i impoten long ol man blong wol, taswe bambae yumi soemaot res­pek long olgeta, yumi no tekem tumas taem blong olgeta mo yumi no mekem longfala toktok. Sipos yumi gat kaen gud fasin long taem ya, maet bambae oli glad blong harem gud nyus sam taem afta.

⁴ Yumi no stap joen long ol lafet we ol narafala jyos oli mekem mo yumi no talemaot ol blesing we ol man blong wol oli stap taltalemaot long olgeta long taem ya. Be yumi mas rere blong givim gudfala ansa long ol man we oli talemaot blesing olsem long yumi. I no nid blong soemaot we fasin ya i no stret. I moa gud blong talem tangkyu nomo long man ya we i kaen gud long yumi. Sipos samfala man oli gat kwestin long saed blong ol bilif blong yumi, yumi save soemaot long olgeta se yumi ona long Jisas Kraes, from we man we i wantem ona long God i mas ona long Jisas. (Jon 5:23) Be i klia nomo se fulap kastom we oli joen long ol lafet ya oli no ona nating long Kraes no long God. Sipos samfala oli wantem save moa, stret long taem ya no sam taem afta, yumi save yusum ol gudfala poen we i stap long Reasoning buk, ol pej 176-8 mo 180 [161-4 mo 166].

Ol Fas Tok

⁵ Plante jyos oli mekem ol lafet blong en blong yia, taswe maet yumi mitim sam man we oli rere moa blong tokbaot God long taem ya, i bitim long ol narafala taem blong yia. From samting ya, yu save rere gud long ol fas tok blong yu no maet yu save talem se: “Long taem naoia, plante milyan man raonabaot long wol oli stap mekem lafet blong Krismis mo Nuyia. ?Yu yu ting se ol lafet ya oli mekem ol man oli kam kolosap moa long God?” Fastaem, lesin gud long ansa we man ya bambae i mekem long kwestin blong yu, ale biaen, maet yu gohed long tok blong yu olsem: “Plante man oli wantem kam kolosap moa long God, maet from we long tingting blong olgeta, God i stap longwe lelebet long ol. Be God hem wan i talem se yumi mas lukaotem hem.” Afta, yufala i save yusum stampa tok blong prij.

⁶ Yumi save talem tu se: “Long taem blong Krismis, plante man oli stap talem long yumi se sipos wan dei i gat pis long wol mo ol man oli stap mekem i gud nomo long ol narafala man, bambae oli save glad tumas. ?Yu yu bilif se God bambae i putum pis long wol long taem blong yumi?” Biaen, yumi save storebaot profet blong Baebol we i talem se Jisas Kraes i “Jif blong Pis.” (Aes. 9:​6, 7) From we hem i Jif we God i jusumaot blong rul long gavman blong hem, bambae i no longtaem, hem i putum pis blong olwe long wol.​—⁠Dan. 2:44; Rev. 21:​3-5.

⁷ Fulap man oli no kea long mesej blong Kingdom mo oli stap glad nomo long ol hiten lafet blong olgeta. Be nating, Jeova bambae i blesem ol hadwok we yumi mekem blong faenem ol man we oli lukaot trutok. Yes, God i “lukaot ol man we i wosip long hem olsem,” mo bambae hem i lidim olgeta i go long ogenaesesen blong hem.​—⁠Jon 4:​23, 24, NW.