Yumi Trastem Jeova, Mo Yumi Mekem Wok Blong Paenia
1 Sipos yumi wantem putum Kingdom long fas ples, yumi mas trastem Jeova. (Sam 56:11; Prov. 3:5; Mat. 6:33) Yumi mas tanem baksaed long ol samting we ol man blong wol oli tinghae long olgeta, mo yumi mas traehad blong mekem ol wok blong speret. Ol man blong wol oli wantem tumas ol samting blong bodi, be Jeova i pulum yumi blong harem gud from we yumi gat ol samting we oli impoten moa.— 1 Tim. 6:8; Fil. 1:10.
2 Ol yang Kristin we oli wantem folem ol rul blong God, oli faenem we i hadwok. Sam tija mo sam pikinini long skul oli traem pulum tingting blong ol, blong oli go long hae skul. Ol yang Kristin oli luksave ol samting we oli nidim long saed blong bodi. Be oli waes tu, from we oli no letem ol narafala oli pulum olgeta. Oli wantem mekem wok blong paenia. Oli trastem ol promes blong Jeova, mo oli save se bambae hem i givim olgeta samting we oli nidim.—Sam 62:2; 68:19; 1 Tim 5:8; 6:9, 10.
Skelem Ol Bisnes Blong Yumi Wanwan
3 Wajtaoa blong Febuwari 15, 1983, i pulum yumi blong tingbaot wan kwestin, olsem: “?Sipos mi mi no mekem wok blong paenia, wanem risen mi mi save givim long Jeova from?” I tru we long yia 1983, plante yangfala oli no gat rod blong mekem wok blong paenia. Be tingting blong olgeta i no kam slak, from we oli save se sipos oli mekem wok blong olgeta long fulhat blong olgeta, Jeova i laekem fasin ya. (Maeka 6:8; 2 Kor. 8:12) Biaen, taem ol yangfala ya oli skelem bakegen ol bisnes blong olgeta wetem ol tok blong Wajtaoa ya blong 1983, oli luksave we laef blong olgeta i jenis, mo oli stat mekem wok blong paenia. Plante taosen pablisa long wol oli mekem olsem.
4 Sipos ol bisnes blong laef blong yu i no letem yu yu mekem wok blong paenia long yia 1983, ating naoia ol samting oli defren. Tisyia long Wol, plante taosen brata oli stat mekem wok blong paenia. Fulap long olgeta oli wantem mekem wok ya bifo, be oli no gat rod blong mekem. Taswe oli wet kam kasem ol bisnes blong laef blong olgeta i jenis.
5 Samfala oli mas jenisim tingting blong olgeta long wok blong paenia. Sam narafala oli mas mekem wan gudfala program nomo. Samtaem yumi mas jenisim sam wok mo sam responsabiliti blong yumi, nao yumi save kam paenia. Taswe yumi mas stap tokbaot kwestin ya long Jeova long ol prea we yumi mekem. Mo yumi mas skelem gud ol wok mo ol narafala bisnes blong laef blong yumi. Plante taosen pablisa oli mekem olsem finis, mo naoia oli glad tumas blong mekem wok blong paenia.
6 Ating yu jes skelem laef blong yu, mo yu luksave se bambae i no longtaem yu save gat rod blong kam paenia. Oraet, be naoia yu save kam haftaem paenia long olgeta manis. Long sam manis nomo, bambae yu yu gat plante visit mo Baebol stadi we yu mas mekem. Ale, taem bambae yu yu stat long wok blong fultaem paenia, bambae i isi moa blong mekem wok ya. ?Ating yu save mekem olsem bifo we nyufala tiokratik yia i stat?
7 Jeova i stap mekem sam bigfala samting long ol lasdei blong rabis fasin ya blong wol. I stret taem naoia blong yumi evriwan i kam kolosap long hem, mo i leftemap nem blong hem ‘evri dei.’ (Sam 145:2; Jem. 4:8) Sipos ol fasin blong laef blong yu oli jenis, mo yu gat rod blong kam paenia from we yu yu gat ol gudfala fasin blong wan paenia, ale, bambae yu yu save soemaot gud long Jeova olsem wanem yu yu stap trastem hem.—Sam 94:18.