Ansa Long Wan Kwestin

● ?Taem yumi stap long Bukstadi blong kongregesen, yumi mas gat wanem gudfala fasin?

Plante taem, ol man we i stap raonabaot long ples blong yumi, oli lukluk yumi, mo samtaem oli makem sam samting. (Lukluk 1 Korin 4:9) Yumi man blong Jeova, taswe yumi wantem we oli makem sam gudfala poen nomo, mo yumi wantem we oli harem gud long ol fasin blong yumi. (1 Pita 2:12) Samting ya i tru tu, taem yumi go long Bukstadi blong kongregesen. Bighaf blong ol bukstadi i stap long haos blong wan brata no wan sista. Taswe yumi mas lukaot long ol fasin blong yumi, blong oli leftemap ol wok we yumi stap mekem. Sipos i no gat plante ples blong putum ol trak, sam famle i save joen long wan trak nomo. Fasin ya i save halpem ol man we i stap raonabaot long ples blong bukstadi, blong oli no kam kros long yumi. Yumi no wantem putum trak blong yumi long wan ples we i save blokem ol man no ol trak, no long wan ples we i save mekem wan aksiden. Ol man we i mekem ol samting ya, oli no tingbaot ol narafala.

Evritaem we yumi mekem wan miting tugeta, yumi glad from we yumi save gat sam gudfala toktok wetem ol brata mo sista bifo mo afta long ol miting. (Maeka 2:12) Be ol gudfala fasin, mo fasin blong tingbaot ol narafala, oli pulum yumi blong no toktok long bigfala voes. (Mat.7:12; Gal.6:10) Kristin lav i mas pulum yumi blong blokem ol pikinini blong oli no go resis afsaed, mo blong oli no spolem olting blong ol man raonabaot long ples ya. (Prov. 29:15; 1 Korin 13:4, 5) Taem yumi stap insaed long haos we bukstadi i stap long hem, yumi mas gat respek long haos blong Kristin brata blong yumi. Sipos wan brata i no gat gudfala fasin, kwiktaem ol elda oli save givim sam advaes we oli kaen, be oli klia tu, blong hem i stretem ol fasin ya blong hem. Long fasin ya, i no gat wan samting we i save pulum ol man blong toktok smol biaen long yumi. Mo i no gat wan samting we i save mekem trabol long brata we i gat bukstadi long haos blong hem. Bambae olgeta we oli kam long miting ya oli harem gud nomo.