Fasin Blong Tingbaot Narafala—Wan Samting We i Makemaot Ol Man Blong God
1 Long taem blong yumi, ol fasin blong tingbaot narafala oli stap lus. ?From wanem? From we ol man oli hareap tumas long laef, mo oli no tingbaot blong soem respek mo talem ol gudfala toktok, olsem “Plis,” “Tangkiu,” mo “Sore.” Tok blong God i bin talemaot se long ol las dei, fasin blong ol man bambae i kam moa nogud, mo long taem ya bambae ol man oli ‘tingbaot olgeta nomo, oli man blong tok flas, we tingting blong olgeta i go antap tumas, oli no man blong talem tangkiu, oli no man blong gat sore long man, oli man blong lusum hed, oli no wantem ol fasin ya we i gud, mo oli man we oli no kea.’ (2 Tim. 3:1-4) Olgeta samting ya i min se man i no gat fasin blong tingbaot narafala. From we ol Kristin oli wantem folem fasin blong God, oli mas lukaot gud blong no tekem fasin blong ol man blong wol we oli no gat respek long narafala.
2 ?Fasin Blong Tingbaot Narafala i Minim Wanem? Fasin blong tingbaot narafala i minim se yu traehad blong kasem save long filing blong narafala, mo yu traem laef wetem ol narafala long wan fasin we i gat pis. Sam defren rod blong soem fasin blong tingbaot narafala, hemia blong respektem tingting blong hem, mekem i gud long hem, soem kaen fasin, no tok strong mo long fasin we i save spolem filing blong hem, be tingtinggud fastaem bifo we yumi toktok. Stamba blong ol fasin olsem, hemia lav we yumi gat long God mo long ol man raonabaot long yumi. (Luk 10:27) Blong soem ol fasin ya yumi no nidim mane, be olgeta ya oli impoten tumas blong halpem yumi joengud wetem ol narafala.
3 Jisas Kraes i soemaot beswan eksampol long yumi. Oltaem hem i folem Golden Rul ya, se: “Yufala i mas mekem i gud long ol narafala man, olsem we yufala i wantem blong olgeta oli mekem long yufala.” (Luk 6:31) Yumi sapraes tumas long fasin blong Jisas blong tingbaot mo soem lav long ol disaepol blong hem. (Mat. 11:28-30) Hem i no soemaot fasin blong tingbaot narafala from we wan buk i talem se hem i mas mekem olsem. Hem i soemaot fasin ya from we hat blong hem i tru mo i wantem givhan long narafala. Yumi mas traem folem gudfala eksampol blong hem.
4 ?Wetaem i stret blong yumi soemaot fasin blong tingbaot narafala? ?Yumi mekem long ol taem we oli spesel nomo, olsem taem we yumi wantem se narafala i tingting gud long yumi? ?Yumi nidim fasin ya nomo long taem we yumi wantem switim narafala? !No gat! Yumi mas gat fasin blong tingbaot narafala oltaem. ?Taem yumi joen wetem ol brata sista long kongregesen, wanem sam rod we yumi save soemaot fasin ya?
5 Long Haos Kingdom: Haos Kingdom hem i ples we yumi go long hem blong mekem wosip. Jeova God nao i singaot yumi blong kam long Haos Kingdom. From samting ya, yumi olsem ol visita. (Sam 15:1) ?Yumi stap soemaot gudfala fasin taem yumi visitim Haos Kingdom? ?Yumi meksua se klos mo hea blong yumi oli stret? Yumi no wantem werem klos blong spel, no putum klos mo mekem hea long stael we i bitim mak. Nating se yumi stap long wan asembli no long wan kongregesen miting olsem yumi mekem evri wik, ol man oli makem se ol man blong Jeova oli luk olsem ol man we oli onagud long God. (1 Tim. 2:9, 10) Taswe, yumi mas soemaot fasin blong tingbaot mo respektem Papa blong yumi long heven we i singaot yumi i kam long miting, mo ol narafala man we hem i singaotem olgeta tu.
6 Wan narafala rod blong yumi soemaot fasin blong tingbaot narafala long ol miting, hemia blong kam long stret taem. I tru, samtaem i no isi blong mekem olsem. Maet haos blong samfala i longwe long Haos Kingdom, no maet sam famle oli gat plante pikinini. Be long sam kongregesen, 25 pesen long ol pablisa oli stap kam evritaem afta long faswan singsing mo prea. Samting ya i impoten tumas. Yumi mas tingbaot we fasin blong tingbaot narafala i min se yumi no wantem spolem filing blong hem. Jeova, gudfala Man we i Singaotem yumi i kam long miting, hem i mekemrere kakae ya long saed blong spirit, blong mekem i gud long yumi. Sipos yumi kam long miting long stret taem, yumi soemaot we yumi gat tangkiu mo se yumi tingbaot filing blong hem. Mo tu, sipos yumi stap kam let long ol miting, yumi pulum ae blong olgeta we oli stap traehad blong lesingud mo yumi no soem respek.
7 ?Taem yumi stap long miting, yumi toktok long ol niuwan we oli kam? Fasin blong welkamem olgeta i wan rod blong soem se yumi tingbaot olgeta. (Mat. 5:47; Rom 15:7) Talem halo, sekhan, mo smael—hemia ol smosmol samting nomo, be hemia sam long ol samting we oli makemaot yumi se yumi trufala Kristin. (Jon 13:35) Faswan taem we wan man i kam long Haos Kingdom, hem i talem se: “Nating we mi mi no save olgeta, be long wan dei nomo, mi mitim fulap man we oli soem trufala lav, i bitim we mi bin mitim long ful laef blong mi long jos we mi mi gruap long hem. I klia nomo se mi faenem trutok.” From samting ya, hem i jenisim plante samting long laef blong hem, mo seven manis biaen hem i tekem baptaes. !Yes, fasin blong tingbaot narafala i save karem gudfala frut!
8 Sipos yumi soem fasin blong tingbaot narafala long olgeta we yumi no save olgeta, be “antap moa, yumi mas mekem olsem long olgeta ya we oli brata mo sista blong yumi.” (Gal. 6:10) I stret we yumi folem rul ya: ‘Yufala i mas ona gud long ol olfala.’ (Lev. 19:32) Yumi no mas fogetem olgeta ya long ol miting blong yumi.
9 Lesin Gud: Long ol miting blong kongregesen, taem ol Kristin minista blong God oli toktok, oli givim presen long yumi long saed blong spirit we i save leftemap tingting blong yumi. (Rom 1:11) Sipos yumi slip, mekem noes wetem jinggom, toktok slou long wan we i sidaon klosap long yumi, stap go long toelet we yumi no rili nidim, stap ridim ol narafala buk, no mekem wan narafala wok taem miting i gohed, ale yumi soemaot we yumi no gat fasin blong tingbaot narafala. Ol elda oli mas soemaot gudfala eksampol long saed ya. Kristin fasin blong tingbaot narafala bambae i pusum yumi blong soem respek long brata we i mekem tok mo long mesej blong hem we i kamaot long Baebol, ale bambae yumi lesingud long hem.
10 Mo tu, blong soem se yumi tingbaot brata we i mekem tok mo olgeta we oli lesin, bambae yumi no letem olkaen telefon we man i save wokbaot wetem, oli spolem ol miting.
11 Ol Pikinini Mo Fasin Blong Tingbaot Narafala: Oltaem ol papa mama oli mas lukaot gud long fasin blong ol pikinini blong olgeta. Sipos wan pikinini i krakrae no i muvmuf tumas we i save blokem narafala blong i no moa lesingud, i waes blong tekem pikinini i go afsaed kwiktaem gogo hem i kam kwaet. Samtaem i no isi blong mekem olsem, be tingbaot, samting ya i soemaot se yu yu kasem save gud long filing blong narafala. Plante papa mama we oli gat ol smosmol pikinini, oli sidaon long ol jea biaen long Haos Kingdom, blong oli no spolem narafala sipos oli mas tekem pikinini i go afsaed. Mo tu, i stret we ol narafala we oli stap long miting oli tingbaot ol famle we oli gat plante pikinini, nao oli lego ol jea we oli stap biaen, blong ol famle ya oli save yusum.
12 Ol papa mama oli mas lukaot gud long fasin blong pikinini blong olgeta bifo mo afta long ol miting tu. Ol pikinini oli no mas ronron insaed long Haos Kingdom, from we oli save foldaon no mekem narafala i foldaon. Sipos oli ronron olbaot afsaed long Haos Kingdom, hemia tu i denja, antap moa long sava taem ples i tudak. Sipos yumi toktok strong afsaed long Haos Kingdom, samting ya i save spolem ol man we oli stap raonabaot, mo mekem oli tingting nogud long wosip blong yumi. Ol papa mama we oli traehad blong wajem gud ol pikinini blong olgeta insaed mo afsaed long Haos Kingdom, oli mekem wan gudfala wok, from we samting ya i mekem yumi moa glad blong joen wanples.—Sam 133:1.
13 Long Buk Stadi: Yumi gat bigfala tangkiu long ol brata sista we oli letem yumi yusum haos blong olgeta blong mekem miting. Taem yumi go long haos blong olgeta, yumi mas soem respek long olting blong olgeta. Bifo we yumi go insaed long haos, yumi mas tekemaot sus blong yumi blong no spolem floa no mat blong olgeta. Ol papa mama oli mas wajem gud pikinini blong olgeta, mo meksua se oli wokbaot nomo long rum we stadi i stap long hem, i no long ol narafala rum tu. Nating sipos grup i smol, mo i no wan miting long Haos Kingdom, be yumi mas gat respek mo no mekem olsem we haos blong narafala i haos blong yumi. Papa no mama blong smosmol pikinini i mas go wetem hem sipos hem i wantem go long toelet. Mo tu, yumi mas putum klos olsem we yumi putum blong go long Haos Kingdom, from we buk stadi ya i wan miting blong kongregesen.
14 Fasin Blong Tingbaot Narafala i Impoten Tumas: Kristin fasin ya blong tingbaot narafala i save pulum ol man blong tinghae long minista wok blong yumi, mo antap long hemia, i mekem se yumi joengud moa wetem ol narafala. (2 Kor. 6:3, 4, 6) Yumi stap wosip long God ya we i hapi, taswe i mas isi long yumi blong smael, soem fasin fren, mo tu, blong mekem ol smosmol samting we oli soem kaen fasin mo mekem ol narafala oli glad long yumi. Ol gudfala fasin olsem bambae oli mekem yumi moa naes long ae blong ol narafala, olsem ol man blong God.