Ol Papa Mama—Soem Gudfala Eksampel Long Ol Pikinini Blong Yufala
1 Tok blong God i talem se, “pikinini we fasin blong hem i stret, papa [mo mama] blong hem i save glad tumas from.” (Prov. 23:24, 25) !Hemia wan blesing long ol papa mama we oli bin soem wan gudfala eksampel long pikinini blong olgeta! Wan memba blong wan Branj Komiti i talem long saed blong papa mama blong hem, se: “Bigfala samting long ful laef blong tufala hemia trutok, mo mi tu mi wantem mekem olsem long ful laef blong mi.” ?Wanem ol fasin we pikinini i mas luk long papa mama blong olgeta?
2 Gudfala Fasin Mo Dip Respek: Hem i wok blong papa mama blong givhan long pikinini blong tufala blong gat ol gudfala fasin. Ol pikinini oli no save lanem ol gudfala fasin, sipos papa mama i talem nomo long olgeta se oli mas gat gudfala fasin ya. Papa mama tufala i mas soemaot ol gudfala fasin ya tu, mo biaen ol pikinini oli save folem olgeta. Taswe, ?wanem fasin we yu yu soemaot? ?Ol pikinini blong yu, oli harem se yu yu talem “sore,” “plis,” mo “tangkiu”? Long famle blong yu, ?yufala i soem dip respek long yufala? ?Yu yu lesingud taem ol narafala oli toktok? ?Yu yu lesin taem pikinini blong yu i toktok long yu? ?Yufala i soemaot ol gudfala fasin ya long Haos Kingdom mo long haos tu?
3 Strong Long Saed Blong Spirit Mo Strong Blong Wok: Wan brata we i stap bitim 50 yia long fultaem wok i tingtingbak se: “Mama mo papa blong mi tufala i givim wan gudfala eksampel long mi taem tufala i soemaot se tufala i laekem tumas ol miting mo taem tufala i wok strong long wok blong prij.” ?Olsem wanem yu yu soemaot long pikinini blong yu se yu yu wantem we ol wanwan memba blong famle blong yu oli stap strong long saed blong spirit? ?Yufala i stap ridim vas blong dei tugeta? ?Yufala i stap mekem famle stadi oltaem? ?Ol pikinini blong yu oli luk we yu stap ridim Baebol mo ol buk blong Sosaeti? Taem yu prea long saed blong famle, ?oli harem se yu tokbaot wanem? Yu mo pikinini blong yu, ?yufala i storeyan long saed blong ol samting we i mekem se famle i strong moa long saed blong spirit, ol gudfala samting long saed blong trutok mo kongregesen? ?Yu yu glad blong go long ol miting mo blong joen long wok blong prij wetem ful famle?
4 Papa mama, tingbaot eksampel we yu yu soemaot long ol pikinini blong yu. Givim wan nambawan eksampel, nao long ful laef blong ol pikinini blong yu bambae oli tinghae long eksampel ya we yu bin soem. Wan waef blong wan seket elda, we naoia hem i bitim 70 yia, i talem se: “Mi stap karem frut yet from gudfala eksampel blong nambawan Kristin papa mama blong mi. Mo mi mi prea se oltaem bambae mi yusumgud laef blong mi long ol yia we oli kam, blong pruvum fulwan se mi gat tangkiu long fasin blong laef we tufala i livim long mi.”