?Yu Yu Glad Blong Gat Buk Stadi Long Haos Blong Yu?

¹ Long faswan handred yia, plante Kristin oli letem haos blong olgeta blong i gat miting blong kongregesen long hem. (1 Kor. 16:19; Kol. 2:15; Flm. 1, 2) Long sam kongregesen tede, i no gat naf ples blong mekem ol Buk Stadi mo miting blong prij. From samting ya, long sam buk stadi grup, i gat bitim 30 man hemia i plante tumas, i moagud sipos i gat samwe long 15 man nomo.

² Wan Bigfala Blesing: ?Yu yu tingbaot finis blong letem haos blong yu blong oli mekem Buk Stadi long hem? Wan rum we i bigwan lelebet, i klin, i gat laet mo windo blong letem win i pas, hem i stret long buk stadi. I wan bigfala blesing blong gat buk stadi long haos blong yumi, from we hem i wan miting blong kongregesen, mo hem i wan haf blong plan blong Jeova blong tijim ol man blong hem. Plante we oli gat buk stadi long haos blong olgeta, oli talem se oli bin kasem blesing long saed blong spirit from samting ya.

³ Sipos yu yu ting se haos blong yu i stret blong mekem buk stadi long hem, yu no mas wet blong talemaot samting ya long ol elda. Maet oli stap lukaot sam ples blong mekem buk stadi. ?Sipos yu no save gat wan buk stadi long haos blong yu, olsem wanem long sam miting blong prij? Nating sipos i no nidim ples naoia, be ol elda bambae oli glad blong save se oli save yusum haos blong yu taem i gat nid. Maet long fiuja yu yu kasem blesing ya.

⁴ Soem Respek: Taem yumi joen wanples long haos blong wan brata, yumi evriwan i mas gat respek long haos blong brata ya. Ol papa mama oli mas meksua se ol pikinini blong olgeta oli stap long rum blong buk stadi nomo, oli no go olbaot long ol narafala rum blong haos. Mo tu, yumi mas tingbaot ol man we oli stap raonabaot, yumi mas lukaot blong no mekem samting we i save spolem olgeta.—2 Kor. 6:3, 4; 1 Pita 2:12.

⁵ Hibrus 13:16 (NW ) i pulum yumi blong no foget blong ‘mekem ol gudfala fasin, mo blong seraot olting blong yumi wetem ol narafala, from we ol kaen sakrefaes ya, God i harem gud long olgeta.’ Taem yu letem haos blong yu blong oli mekem wan miting blong kongregesen long hem, hemia wan gudfala rod blong serem ol gudfala samting wetem narafala mo blong “ona long Jeova wetem ol sas samting blong yu.”—Proveb 3:9, NW.