?Olsem Wanem Buk Stadi i Givhan Long Yumi?
1. ?Olsem wanem ol faef miting we yumi gat evri wik oli givhan long yumi?
1 Yumi gat faef miting evri wik. Be fasin blong ol wanwan miting ya i no sem mak mo wanwan long olgeta i givhan long yumi long defdefren fasin. Be evriwan long olgeta oli impoten from oli halpem yumi blong “yumi givgivhan long yumi blong mekem yumi strong blong lavem ol man, mo blong mekem ol gudfala fasin.” (Hib. 10:24, 25) ?Wanem sam gudfala samting long saed blong Buk Stadi we ol narafala miting blong kongregesen oli no gat, mo we oli save givhan long yumi?
2. ?Wanem gudfala samting i kamaot taem yumi joen wetem smol grup blong man long buk stadi?
2 Givhan Long Yumi Blong Gohed Gud Long Saed Blong Spirit: Plante taem, smol man nomo oli joen long buk stadi i bitim ol man we oli joen long ol narafala miting blong kongregesen. Hemia i mekem se i moa isi blong yumi kasem save mo frengud wetem ol narafala brata sista, nao yumi save givgivhan long yumi long saed blong spirit. (Prov. 18:24) ?Olsem wanem? ?Yu yu traehad blong save evriwan long buk stadi blong yu? ?Yu yu askem long wanwan long olgeta blong oli prij wetem yu? Mo tu, buk stadi i givhan long elda we i lukaot long grup blong i save ol problem blong wanwan man insaed long grup ya, nao hem i save leftemap tingting blong olgeta.—Prov. 27:23.
3. ?Olsem wanem buk stadi i halpem yumi blong givim ansa mo i givhan long ol Baebol studen tu blong oli joen long ol miting?
3 ?Olsem wanem? ?Yu yu askem finis long ol Baebol studen blong yu blong oli joen wetem yu long buk stadi? Ating olgeta we oli intres oli fraet blong joen long ol miting we i gat plante man long olgeta. Be maet bambae oli no fraet tumas sipos oli joen long wan miting we i gat smol man nomo long hem, antap moa sipos miting ya i stap long haos blong wan brata no sista. Fasin fren we olgeta long grup oli gat i mekem se i isi blong ol yangfala mo ol niuwan oli givim ansa. From we smol man nomo oli joen long buk stadi, yumi gat plante janis blong givim ansa, nao long rod ya yumi presem Jeova.—Sam 111:1.
4. ?Olsem wanem buk stadi i isi moa long yumi?
4 Plante taem buk stadi i stap long ol ples we i isi blong ol pablisa long kongregesen oli go long olgeta. I tru se i no evri pablisa we oli save joen long buk stadi we i stap klosap moa long ples blong olgeta. Be taem yumi joen long grup we nem blong yumi i stap long hem, maet i gud yet, from we yumi no wokbaot longwe olsem yumi mekem taem yumi joen long ol narafala miting blong kongregesen. Maet ples blong buk stadi i wan gudfala ples blong mekem miting blong prij tu.
5. ?Olsem wanem elda we i lukaot long buk stadi blong yumi i save givhan long yumi long wok blong prij?
5 Givhan Long Wok Blong Prij: Elda we i lukaot long buk stadi i wantem givhan long wanwan long yumi blong joen oltaem long wok blong prij, blong yumi karem gudfala frut long wok ya, mo blong yumi glad long wok ya. Taswe, hem i traehad blong prij wetem evriwan long buk stadi blong hem, mo i givhan long olgeta wanwan long ol defren haf blong wok blong prij. Sipos yu luk se i hadwok long yu blong mekem wan long ol haf blong wok blong prij, olsem gobak blong luk ol man we oli intres, i gud yu talemaot long elda we i lukaot long buk stadi blong yu. Maet hem i save mekem plan blong yu wok wetem wan pablisa long grup blong yu we i gat gudhan long saed ya. Sipos yu wajem gudfala fasin blong tij we elda we i lukaot long buk stadi blong yu i gat taem hem i lidim buk stadi, bambae yu tu yu kam gud moa long fasin blong yu blong tijim narafala.—1 Kor. 4:17.
6. ?From wanem yumi mas traehad blong kasem ol gudfala samting long buk stadi we oli save givhan fulwan long yumi?
6 !Buk stadi i wan blesing blong yumi! Jeova i mekem plan ya wetem lav, blong givhan long yumi blong stanap strong long saed blong spirit long ol hadtaem ya we yumi stap laef long hem.—Sam 26:12.