?From Wanem Yumi Nidim Buk Stadi Blong Kongregesen?
1. ?Fastaem, Buk Stadi blong Kongregesen i olsem wanem?
1 Long yia 1895, ol grup blong Baebol Studen, hemia ol Witnes blong Jeova tede, oli joen wanples blong stadi long ol buk blong Millennial Dawn. Oli bin kolem ol grup ya se Grup Blong Dawn We Oli Stadi Baebol. Biaen, oli kolem ol miting ya se Grup Blong Ol Man Berea We Oli Stadi Baebol. (Wok 17:11) Ol grup ya oli no bigwan tumas, mo oli miting long haos blong wan man long wan naet we i stret long evriwan long grup. Tede yumi kolem ol miting ya se Ol Buk Stadi Blong Kongregesen.
2. ?Olsem wanem ‘bilif blong yu i save givhan long narafala’ long buk stadi?
2 Lefleftemap Tingting Mo Givgivhan: From we ol buk stadi oli smol nomo, yumi gat moa janis blong givim ansa blong soemaot bilif blong yumi. Samting ya i mekem se, ‘bilif blong yu i save givhan long narafala, olsem we bilif blong narafala tu i save givhan long yu.’—Rom 1:12.
3, 4. ?Olsem wanem buk stadi i givhan long yumi blong mekemgud wok blong prij?
3 Sipos yumi luklukgud long fasin blong tij we brata blong lukaot long buk stadi i yusum, samting ya i save halpem yumi blong “tijim ol man long trutok blong God long fasin we i stret gud.” (2 Tim. 2:15) Makemgud olsem wanem hem i yusum Baebol blong pruvum ol save we i stap long buk. Long en blong stadi tu, maet hem i yusum Baebol nomo blong mekem tingtingbak long ol bigfala poen blong stadi, sipos hem i luk se fasin ya i stret long save we yumi stap stadi long hem. Gudfala fasin blong hem blong tijim yumi i save givhan long yumi blong kamgud moa long fasin blong tijim narafala long Kristin wok blong prij.—1 Kor. 11:1.
4 Brata we i lukaot long buk stadi, i lidim grup blong hem long wok blong prij tu. Hem wetem elda we i lukaot long wok blong prij, tufala i mekem ol gudfala plan blong wok blong prij. Hem i traehad blong givhan long olgeta evriwan long grup blong hem, blong oli mekemgud Kristin wok blong olgeta blong talemaot gud nius mo pulum ol man oli kam disaepol.—Mat. 28:19, 20; 1 Kor. 9:16.
5. ?Olsem wanem buk stadi i save givhan long yumi wanwan?
5 Brata we i lukaot long buk stadi i wantem se evriwan long grup blong hem oli kam strong long saed blong spirit. Hem i soemaot samting ya long ol miting blong kongregesen mo taem hem i prij wetem olgeta. Mo tu, hem i go visitim ol brata long haos blong olgeta blong leftemap tingting blong olgeta long saed blong spirit. Yumi evriwan i mas harem se i isi long yumi blong go toktok wetem brata ya we i stap lukaot long buk stadi blong yumi taem yumi nidim help.—Aes. 32:1, 2.
6. (a) ?Long sam kantri, olsem wanem ol miting long ol smosmol grup oli bin mekem ol brata oli kam strong? (b) ?Olsem wanem buk stadi i bin givhan long yu wan?
6 Mekem Narafala i Kam Strong: Long plante kantri we ol man blong God oli no fri blong mekem wok blong God, ol brata sista oli miting long ol smosmol grup nomo. Wan brata i tingtingbak long taem ya we oli no fri blong wosip long ples blong hem, i se: “Nating se gavman i putum tabu long ol Kristin wok blong mifala, be taem mifala i gat janis mifala i mekem ol miting long ol smosmol grup blong 10 kasem 15 man. Ol miting ya oli mekem mifala i strong long saed blong spirit, from we mifala i stadi Baebol tugeta mo tu, mifala i storian gud tugeta afta long stadi. Mifala i storian long ol samting we i stap hapen long mifala, nao mifala i luksave se mifala evriwan i stap kasem semfala trabol.” (1 Pita 5:9) I gud we yu tu yu joen oltaem long Buk Stadi blong Kongregesen. Long rod ya, yu save mekem ol narafala oli kam strong, mo olgeta oli save mekem yu yu kam strong.—Efes. 4:16.