?Bambae Yu Mekem Wanem Blong Lanem Wan Samting Long Ol Miting?
1 Ol miting oli givhan long yumi blong yumi save gud Jeova. Oli halpem yumi blong kasem save long ol loa mo ol rul blong Baebol. Be moa yet, oli leftemap tingting blong yumi blong mekem ol samting we yumi lanem oli wok long laef blong yumi. Oli trenem yumi blong yumi nafgud blong mekem wok blong prij. Mo oli lidim yumi blong go kasem mak ya se, laef we i no save finis long nyufala wol we God i promes long hem. Wan samting i mas klia long tingting blong yumi: Sipos yumi wantem lanem wan samting long ol miting, yumi mas rere gud long olgeta fastaem.
2 Yumi mas folem 3 rul blong lanem wan samting long ol miting: Fastaem, yumi mas mekem olgeta oli rere, yumi mas go long ol miting mo yumi mas mekem ol samting we yumi lanem oli wok long laef blong yumi. Trifala poen ya oli joengud tugeta. Sipos yumi reregud, bambae i isi nomo blong givim ansa, bambae yumi no seksek nating. Taem yumi givim wan gudfala ansa, samting ya i leftemap tingting blong ol narafala mo i pusum olgeta blong oli mekem wan samting. (Efes. 4:29) Olgeta we oli stap long ol miting oli save yusum olgeta tok we oli harem sipos oli kasem save long olgeta. Be tu, ol miting oli givhan long evriwan blong oli luksave olsem wanem blong mekem ol rul blong Baebol oli wok blong laef blong olgeta, mo olsem wanem oli save yusum ol tok ya blong mekem disaepol.
Wajtaoa Stadi Mo Buk Stadi
3 Wajtaoa stadi mo buk stadi, tufala miting ya tufala i impoten tumas from we long rod ya nao, “slef we i stret mo waes” i stap givimaot ol kakae long saed blong speret long haos blong God. (Mat. 24:45-47) ?Yu yu mekem rere ol haf we bambae oli kamaot long ol miting? ?Yu yu reregud blong givim ansa? Yes, samting ya i dipen long yufala nomo.
4 Sipos yufala i reregud long ol haf blong Wajtaoa stadi mo ol haf blong buk stadi, bambae yufala i glad tumas from we i olsem we yufala i givim presen i go long narafala long saed blong speret. (Ol Wok 20:35) Taem oli rere long ol miting, plante brata sista oli ting se i gud blong putum ol mak aninit long ol stampa tok. Sipos yufala i jekemap evri vas blong ol haf mo yufala i tingtinggud long olgeta, bambae yufala i luksave olsem wanem ol vas ya oli laenap wetem ansa we bambae yufala i givim. ?Taswe, olsem wanem long yu? ?Yu yu yusum ol prapa tok blong yu blong ansa, no yu yu ridim ansa blong yu nomo? Taem yumi mekem wan stadi, yumi mas gat plan olsem: Yumi mas wantem save long sam moa samting bakegen, mo biaen yumi mas letem ol rul ya oli lidim yumi. Olsemia nao, yumi save harem gud tumas from ol samting we yumi lanem.—Prov. 2:5; 4:7,8.
Tiokratik Skul Mo Miting Blong Kingdom Wok
5 ?Olsem wanem long ol tok we yu mas mekem long Tiokratik skul? ?Yu yu glad blong givim ol tok ya from we Jeova i askem yu blong mekem olsem? ?Yu yu pruvum se yu gat tingting olsem taem yu rere long tok blong yu? Fastaem, yu mas kasem save gud long ol save insaed long tok ya, nao yu save mekem tok ya long fasin we ol brata oli glad blong lesin long hem. Nating se yufala i no gat tok blong givim, yufala i mas ridim olgeta japta blong Baebol we i stap long program blong yia. Yes, yufala i mas reregud long miting blong halpem yumi blong mekem disaepol tu. Sipos yufala i mekem olsem, bambae yufala i save lanem wan samting bakegen. Be sipos yufala i no mekem olsem, bambae yufala i hadwok blong kasem save long ol tok we oli kamaot, mo tingting blong yufala bambae i trabol tumas.
6 Ol pleplei mo ol tok we oli kamaot long miting blong halpem yumi blong mekem disaepol oli mas stret wetem sam samting we oli hapen long teritori blong yumi. Yufala i mas talemaot bakegen ol pleplei we yufala i mas mekem long miting blong halpem yumi blong mekem disaepol. Yufala i mas putum sam klos we oli stret gud long ol Kristin from we long fasin olsem bambae yufala i soemaot gudfala rod long ol narafala.
7 Taem yufala i gat wan tok blong givim, yufala i mas reregud mo biaen yufala i no mas fraet blong talemaot tok ya. Ol papa mama, yufala i mas givhan long ol pikinini blong yufala blong oli reregud mo yufala i save helpem olgeta blong oli ansa long ol prapa tok blong olgeta. Yes, sipos evriwan oli kam long stret taem mo oli reregud, bambae yumi save lanem plante moa samting from we ol tok we oli kamaot long ol miting ya oli rili pulum tingting blong man. ?Olsem wanem long yu? ?Yu tu yu traehad blong mekem se “ol memba blong jyos oli kam strong moa?”—1 Korin 14:26.