Yumi Mekem Laef Blong Yumi i Tabu, i Klin Gud
1 Sem mak long taem bifo, God i wantem we ol man blong hem tede oli tabu. From samting ya, i impoten we yumi wanwan i kasem save long fasin blong mekem laef blong yumi i tabu. Mo tu, yumi mas save olsem wanem mo from wanem yumi mas mekem ol fasin blong yumi oli tabu, mo olsem wanem samting ya i makemgud wosip we yumi mekem i go long Jeova. Taswe, long tiokratik yia 1991, stampa tok blong spesel dei blong asembli bambae i olsem: “Yumi mekem laef blong yumi i tabu, i klin gud.”—1 Pita 1:15, NW.
2 Jeova i wan God we i tabu, hem i klin gud. Ol loa mo ol rul we ol Kristin oli mas folem oli kam long hem. Taswe, sipos yumi wantem we hem i tingbaot yumi olsem wan stret man, yumi wanwan i mas joengud wetem hem. Program blong dei ya bambae i soemaot ol defren samting we yumi save mekem blong joengud wetem God. Wan blong olgeta wei blong kasem mak ya i olsem: Yumi mas obei oltaem long ol hae rul blong hem. Samting ya i tru, nating we yumi stap mekem sam samting we oli smol nomo. (Luk 16:10) Asembli ya bambae i halpem yumi blong yumi glad oltaem long ol rul mo ol loa blong Jeova. Mo bambae hem i mekem yumi tingbaot bakegen from wanem yumi mas letem ol samting ya oli rulum ol tingting mo ol fasin blong yumi.
3 Hemia stampa tok blong tufala impoten tok we bambae oli kamaot long taem ya: “Yumi letem Jeova i klinim yumi sloslou” mo “ol man blong Jeova oli mekem wok blong hem i kam bigwan moa.” Tede, yumi intres tumas long ol samting we oli stap hapen raonabaot long wol from we olgeta samting ya oli pruvum we yumi stap laef long wan taem we i impoten tumas. Asembli we bambae i kamaot long nyufala tiokratik yia blong yumi i save givhan long yumi blong yumi lukluk oltaem i go long Jeova blong hem i lidim yumi. Ale, bambae yumi traehad blong mekem ol fasin blong yumi long laef oli tabu.—1 Pita 1:14, 16.