Yumi Mas Tinghae Long Ol Paenia

¹ Ol pablisa blong Kingdom blong God oli toktok tugeta blong leftemap tingting blong olgeta. (Kol. 4:11) From we stampa wok blong Kristin kongregesen hem i wok blong talemaot gud nyus, yumi gat plante gudfala risen blong soemaot se yumi tinghae long olgeta we oli joen long fultaem wok.​—⁠Mak 13:10; Rom 16:2; Fil. 4:⁠3.

?FROM WANEM?

² Ol paenia oli joen long wok blong mekem kongregesen i stanap strong long saed blong bilif. Oli mekem olsem taem oli prij wetem ol pablisa we oli no gat tumas ekspiryens long minista wok, mo samting ya i tru long plante narafala haf blong wok blong prij: Long wok blong seremaot ol magasin, taem oli rere no oli mekem ol visit, taem we oli statem mo oli mekem ol Baebol–stadi long gudfala fasin. Oli save soemaot gudfala rod tu, taem we oli traehad blong tekem evri jans blong talemaot gud nyus. Oli joen long olgeta miting blong prij we i stap long medel wik, mo rod ya i givim jans long olgeta blong oli givhan long ol narafala. Sipos oli joen long wok we i gohed long wiken, oli save givhan long plante moa pablisa blong oli kam gud long minis­ta wok from we long taem ya nao, olgeta ya oli gat jans blong joen long minista wok.

³ Ol paenia oli givhan long kongregesen from we oli prij oltaem long sem ples mo oli traem faenem olgeta man. Samting ya i givhan long ol man blong oli savegud long mesej blong yumi mo oli trastem moa yumi taem yumi visitim olgeta from we oli savegud se yumi hu. Ol paenia oli spenem plante haoa long ol ples we yumi stap prij long hem, oli livim ol buk long ol man we oli intres, oli visitim bakegen ol man. Long olgeta fasin blong olgeta, oli wasem ol sid we oli saksakem olgeta fastaem. Samting ya i mekem we ples blong prij blong yumi i karem plante moa frut from wok blong ol paenia.​—⁠1 Korin 3:⁠6.

LONG KONGREGESEN

⁴ Plante pablisa oli joen long fultaem minista wok from we oli luk hadwok mo gudfala speret we ol paenia oli soemaot long ol. Wan sista i wantem mekem wok blong fultaem paenia, be hem i fraet lelebet from we i no gat paenia long kongregesen blong hem. Nao seket elda i givim ol gudfala advaes long hem. Ale sista i gohed long mak blong ol advaes we brata ya i givim long hem mo hem i joen long fultaem wok. Smoltaem afta, sam narafala pablisa oli mekem sem mak long hem, mo naoia kongregesen ya i gat plante moa paenia we i wok strong long wok blong Jeova.

⁵ Maet samtaem ol elda oli askem long wan paenia blong hem i go givhan long wan pablisa we i no moa joen nating long wok blong prij, no i joen long hem samtaem nomo. Maet hem i save mekem wan ­Baebol-stadi wetem hem. Bilif mo gudfala wok we paenia ya i stap mekem i save leftemap tingting blong Wetnes ya, ale hem i save laekem trutok bakegen. Mo tu, samting ya i save givhan long hem blong holem ol promes we hem i mekem long Jeova taem hem i givim laef blong hem long Jeova.​—⁠1 Tes. 5:⁠14.

YUMI LEFTEMAP TINGTING BLONG OL PAENIA

⁶ Ol paenia oli givhan bigwan mo oli wok had blong leftemap tingting blong ol narafala. Be olgeta tu oli nidim blong yumi enkarajem olgeta blong oli stap glad blong mekem wok blong olgeta. (Rom 1:12) ?Taem yu tokbaot wok blong paenia, yu yu leftemap wok ya no olsem wanem? ?Wetaem yu talemaot long wan paenia se wok we hem i mekem i gudfala wok mo we yu sapotem fulwan fasin we olgeta i no stap tingbaot olgeta nomo? Ol paenia oli glad tumas blong joen wetem ol narafala pablisa long dei taem, from we bighaf blong ol pablisa oli no gat jans blong prij long taem ya. ?Yu yu gat rod blong joen wetem olgeta, mo yu save spenem moa taem wetem olgeta long wok blong prij?

⁷ ?Olsem wanem yu yu save givhan long ol paenia? Tru tumas, yu save talem long ol paenia se oli mekem gudfala wok. Be i gat sam narafala samting bakegen we yu save mekem. Ol paenia oli wok strong, taswe yu save singaot long olgeta blong yufala i kakae wanples, yu save halpem olgeta blong oli pem pasis blong olgeta long wok blong prij, mo yu save halpem olgeta long plante narafala wei bakegen, olsem we yu yu naf blong mekem.​—⁠Ridim 1 Tes. 5:​12, 13.

⁸ Ol paenia mo ol pablisa oli save joen wanples wetem ol elda mo ol man blong givhan, we oli soemaot gudfala rod long kongregesen. Ale, olgeta evriwan i save kam long ol miting blong prij we kon­gregesen i putumap. Yes, yumi evriwan bambae i yusum ol samting we God i givim long yumi blong yumi ‘givhan long yumi evriwan.’​—⁠1 Pita 4:​10, 11.