Dei Blong 1991 We i Moa Impoten
1 Tisyia, dei blong kalenda blong yumi we i moa impoten hem i Sarede Maj 30. Dei ya, afta we san i godaon, bambae yumi mekem Memoriol, lafet blong tingbaot ded blong Jisas. (1 Korin 11:20, 24) ?From wanem evri yia, ol Kristin oli mas tingbaot dei we Jisas i ded long hem?
MEMORIOL I IMPOTEN TUMAS
2 Ded blong Jisas i impoten blong olgeta man long wol. Aposol Pol i talem long ol memba blong Kristin kongregesen we tabu speret i makemaot, i se: “From samting ya, taem we yufala i kakae bred ya, mo yufala i dring long kap ya, be oltaem yufala i stap soemaot ded blong Masta ya blong yumi, gogo bambae hem i kambak bakegen.” (1 Korin 11:26) Jisas Kraes i ded blong mekem plan blong Jeova i kamtru. Taswe, Memoriol i halpem yumi blong tingbaot samting ya. Memoriol i soemaot from wanem Jisas i mekem sakrafaes long laef blong hem. Mo hem i soemaot olsem wanem Jisas i stanemap nyufala kontrak, mo i pemaot olgeta we bambae oli rul long Kingdom long heven.—Jon 14:2, 3; Hib. 9:15.
3 Jisas i obei long God oltaem nomo, go kasem ded blong hem. From samting ya, hem i mekem nem blong Papa blong hem i tabu mo hem i soemaot se wan man we i stret olgeta i naf blong stap tru long Jeova, nating se Setan i traem hem long plante samting. Sakrafaes blong hem we i stret olgeta i nafgud blong pemaot ol pikinini blong Adam, mekem se olgeta we oli gat bilif long hem oli save kasem laef blong olwe long wan paradaes long wol. Olgeta samting ya bambae oli kamtru from we Jisas i ded. Taswe i stret nomo we hem i talem long ol disaepol blong hem se oli mas mekem lafet blong tingbaot ded blong hem.—rs pej 266-267 [241-242].
?BAMBAE YUMI SOEM FASIN TANGKYU OLSEM WANEM?
4 Evri yia, ol man long wol oli stap mekem plante lafet, mo oli mekem bigfala wok blong ol man oli save long ol lafet ya. Ol disaepol blong Jisas oli kasem oda blong mekem Lodsapa nomo. Lafet ya i wan bigfala samting blong ol tru Kristin. Taswe long manis Maj, yumi mas mekem sam samting blong mekem hem i rere.
5 Sipos yumi mekem Baebol-stadi long wan man, yumi save mekem plan blong store lelebet long ol vas blong Baebol we i soem se ded blong Kraes i impoten. Mo tu, yumi save talem long olgeta from wanem yumi mekem lafet blong Memoriol. Antap bakegen, yumi save enkarajem olgeta blong oli folemgud program blong Baebol riding we i stat long Maj 25 kasem Maj 30. Program ya i stap long 1991 Calendar of Jehovah’s Witnesses. Fasin olsem i save pulum ol studen blong oli tinghae long Lodsapa.
6 Bambae yumi mekem Memoriol long Sarede. Taswe plante long yumi, bambae i moa isi blong yumi mekem rod blong stap long miting ya. Plante pablisa oli save mekem haftaem paenia long manis Maj from we i gat 5 wiken. Olgeta oli gat jans blong toktok moa long lafet blong tingbaot ded blong Masta. Mo tu, oli save givhan moa long ol nyufala disaepol blong oli mekem tingting blong olgeta i strong blong kam long spesel lafet ya.
7 Memoriol i impoten, taswe yumi mas mekem olgeta samting blong halpem ol narafala blong oli kam long miting ya. Ol elda oli save faenem sam gudfala advaes long Kingdom Wok blong Maj 1989 mo Epril 1990.
8 !Dei blong 1991 we i impoten moa i kam kolosap nomo nao! !Taswe yumi mas mekem tingting blong yumi i rere mo yumi mas gat tangkyu from olgeta samting we ded blong Jisas i givim long ol man! Yes, yumi evriwan i mas stap long naet blong Maj 30. Long naet ya, bambae ol man we oli wosip tru long Jeova oli obei wan taem moa long oda blong Jisas, we i talem se ‘yumi mas soemaot ded blong Masta ya blong yumi, gogo bambae hem i kambak bakegen.’