Yumi Gohed Moa Long Minista Wok
1 Wan waes tok blong man i pulum ol man blong oli gohed moa, i se: “Stat mekem wok olsem yu save mekem naoia. Be no stap mekem olsemia blong olwe.” Tok ya i stretgud long ol hadwok we yumi mekem long minista wok. Taem yu stat blong prij ating yu yu naf blong givim sot toktok nomo long mesej blong Kingdom. ?Be sipos plante yia oli pas finis mo yu stap mekem sem mak nomo, bambae yu mekem wanem blong gohed moa?
2 Fastaem olgeta, yu mas prea long Jeova blong hem i givim waes we yu nidim blong tijimgud ol man. (Prov. 15:14; Jem. 1:5) Seken samting, yu mas mekem ol wok we oli stret long ol prea ya blong yu. Yu mas tektaem blong lukluk ol faswan tok we i stap long Reasoning buk. Jusum wan gudfala poen mo ridim bakegen ol tok ya, gogo evri samting i klia nomo long tingting blong yu. Namba tri samting, yu mas go prij wetem ol brata blong yu, blong traem ol poen we yu rere long hem fastaem.
SAM FREN WE OLI RERE NOMO BLONG HALPEM YU
3 Maet yu gat tingting se ‘i isi nomo blong talem, be i moa strong blong mekem.’ Tingting ya i tru. Be yu gat sam fren blong halpem yu. Sipos yu yu yangfala, yu save toktok wetem papa mama blong yu, no wetem sam pablisa we oli gat ekspiryens mo oli kasem gud frut long wok blong prij. Yu yu save askem olgeta blong oli givim sam moa advaes long yu, olsem wanem blong toktok wetem ol man long ol doa wanwan. Maet bambae oli mekem sam plei wetem yu fastaem, blong traem ol tok we bambae yu talem long ol man taem yu yu prij. Ating bambae oli mekem man blong haos no oli talem sam tok we ol man oli talem oltaem blong blokem toktok blong yumi. Sipos yu tren oltaem olsemia, bambae yu yu lan blong toktok wetem ol man.
4 Yu yu gat sam narafala fren we oli save halpem yu. I gat ol paenia, we oli lanem ol fasin blong prij from we oli prij plante mo from we oli go long miting blong ol paenia. Brata we i lukaot long buk stadi blong yu, mo elda we i lukaot long wok blong prij, tufala i save prij wetem yu mo tufala i save soem long yu olsem wanem blong mekem ol man oli tingtinggud long ol samting we yu stap talem long olgeta.
HALPEM MOA OLGETA WE OLI INTRES
5 Sam man oli tekem buk long yumi. Be yumi wantem halpem olgeta moa, taswe yumi kambak visitim olgeta blong mekem olgeta oli intres moa long trutok. Bifo we yu yu mekem wan visit, yu mas tingting bakegen long ol samting we yu bin talem long hem taem yu mitim hem fastaem, mekem se bambae yu save store moa long poen we hem i bin intres long hem. Yu no mas foget long poen ya: Sipos yumi planem mo yumi wasem sid, be Jeova nomo i stap mekem i gru. Bifo we yu yu go luk wan man, yu mas askem long Jeova blong hem i lidim yu. (1 Korin 3:6; 2 Korin 9:10) Taem yumi halpem ol narafala blong oli kasem save long sam poen, yumi tu yumi stap gohed moa.
6 Nekis samting, yumi mas statem mo yumi mas mekem wan Baebol-stadi wetem man. Sipos yu no kasem mak ya yet long Kristin minista wok blong yu, yu mas gohed blong prea long Jeova blong hem i halpem yu blong faenem wan “sipsip” mo givim kakae long hem. Ating bambae yu mas wajemgud olsem wanem wan gudfala tija i mekem Baebol-stadi long man. Afta, yu save folem fasin blong hem. Luklukgud ol poen we i stret long fasin blong tijim man, long Wajtaoa, (Engglis) Ogis 1, 1984, [Novemba 1, 1984] ol pej 8 kasem 17. Sipos yu folem ol advaes ya, bambae yu yu rere nomo blong mekem wan Baebol-stadi taem God i ansa long ol prea blong yu.
PUTUM SAM MAK MO TRAEM KASEM OLGETA
7 Taem yu wantem tijimgud ol man, mekem ol visit, mo mekem Baebol-stadi, yu no save kasem ol mak ya wantaem. Be yu yu save putum wan narafala mak, maet yu save mekem wok blong haftaem no fultaem paenia. Sipos yu yu gohed nomo blong gohed moa long minista wok, ol narafala bambae oli save harem gud long yu from we yu yu gohed strong oltaem. Jeova bambae i blesem yu bigwan sipos yu no stap sem mak nomo, be yu wok oltaem blong gohed moa long saed blong speret.