Miting Blong Halpem Yumi Blong Mekem Disaepol
WIK WE I STAT LONG MAJ 4
Sing 157.
5 menet: Lokol mesej mo ol Advaes blong Kingdom Wok we oli stret long kongregesen. Talem bakegen ol miting blong prij long wiken.
25 menet: “Ol Pikinini Blong Yu Oli Rere Blong Gobak Long Skul Bakegen?”—Toktok wetem kwestin mo ansa. Mekem oli ridim ol haf mo ol vas blong Baebol. Sipos sam store we oli hapen long ples blong yufala oli stretgud wetem ol poen ya, mo sipos yufala i gat taem, talemaot ol store ya.
15 menet: “Talemaot Gud Nyus: Wetem Buk Revelation Climax”—Toktok wetem kwestin mo ansa. Long en blong haf 4, mekem wan pleplei we yufala i reregud long hem fastaem: Wan pablisa i seremaot buk long wan man we i soemaot intres long toktok we tufala i jes mekem long Baebol. Talem bakegen long ol yangfala pablisa se oli mas joen moa wetem papa mama blong ol long minista wok we oli mekem long olgeta haos wanwan gogo bambae oli nafgud blong toktok wetem ol man. Ol nyu pablisa mo olgeta we oli no gat tumas ekspiryens oli save go prij wetem ol pablisa we oli save trenem olgeta blong oli save yusumgud stampa tok blong prij. Bigfala wok blong yumi, yumi wantem faenem ol sipsip blong Masta, mo halpem olgeta blong oli save sevem laef blong ol, mo go insaed long nyufala wol we Jeova i promes long hem.
Sing 221 mo laswan prea.
WIK WE I STAT LONG MAJ 11
Sing 87.
10 menet: Lokol mesej mo ripot blong ol kaon. Talem tangkyu long kongregesen from ol presen mane we Sosaete i kasem. Talem bakegen long evriwan se Memoriol bambae i stap long Sarede Maj 30. Talem prapa ples mo stret taem blong miting ya. Askem long ol pablisa olsem wanem bambae oli singaot long ol nyufala man blong oli kam long Memoriol mo mekem wan pleplei blong soem rod blong mekem olsem. Talem long kongregesen se i gat sam pepa blong singaot man i stap yet.
15 menet: Wan tok we i stret long ol samting we kongregesen i nidim. No mekem wan tok long Wajtaoa blong Novemba 1, 1990, p. 29 (Engglis mo Franis): ‘Yumi Traehad Blong Kasem Fasin We i Stret Gud Olgeta.’
20 menet: “Dei Blong 1991 We i Impoten Moa”—Toktok wetem kwestin mo ansa. Mekem gudfala toktok mo leftemap tingting blong ol pablisa blong oli reregud long tingting blong olgeta blong mekem kakae blong Masta long dei ya blong yia we i moa impoten. Talem bakegen sam fasin blong halpem ol man we i fastaem blong olgeta we oli kam long Memoriol.
Sing 129 mo laswan prea.
WIK WE I STAT LONG MAJ 18
Sing 49.
10 menet: Lokol mesej. Tiokratik Nyus. Tokbaot ol miting blong prij mo talemaot ol gudfala poen we yufala i makem long ol laswan magasin. Yufala i save tokbaot ekspiryens blong sam pablisa we oli seremaot buk blong manis. Enkarajem ol pablisa blong oli mekem wok blong haftaem paenia long manis Epril.
20 menet: Rerem sam fas tok we oli wokgud. Wan elda we i kasem gud frut long wok blong prij i halpem ol pablisa blong oli rere long sam fas tok we i laenap long teritori blong yufala. Ol advaes we hem i givim oli stanap long Reasoning buk, ol pej 9 kasem 15. Talem 2 no 3 fas tok we oli joengud wetem stampa tok blong prij no wetem ol nyus we oli kamaot. Sam pablisa we oli gat ekspiryens bambae oli mekem 2 pleplei blong soem rod blong toktok long ol doa wanwan. Long ol pleplei ya, bambae oli folem ol advaes we i kamaot long Miting Blong Kingdom Wok, long wik blong Maj 4. Sipos i gat naf taem, talem from wanem yumi mas yusum ol fas tok we ol man oli intres long hem, mo talemaot sam ekspiryens long saed ya.
15 menet: Sipos yumi folemgud program blong Baebol riding blong Memoriol, i stat long Maj 25 kasem 30, long kalenda blong 1991, bambae yumi kasem plante gudfala frut long laef blong yumi. Maet sam famle oli laekem moa blong ridim Baebol tugeta mo toktok long saed blong ded blong Jisas. I gud olgeta long famle oli ridim haf “Lord’s Evening Meal” long Insight buk, Volyum 2, ol pej 268 kasem 271 (Auxiliaire, ol pej 1280 kasem 1283 long Franis). Sipos yumi reregud long Memoriol, bambae yumi tinghae long lafet ya mo ol famle bambae oli save joengud moa long tru wosip.
Sing 92 mo laswan prea.
WIK WE I STAT LONG MAJ 25
Sing 224.
10 menet: Lokol mesej. Talem stret taem mo prapa ples we Memoriol bambae i stap long hem. Talem bakegen long olgeta we oli stap se oli mas tekem ol memba blong famle blong ol mo ol man we oli intres long trutok oli kam moa eli, mekem se oli gat ples blong sidaon. Mekem we ol nyuwan oli save toktok wetem ol brata sista mo oli save visitim Haos-Kingdom sipos i fastaem blong olgeta we oli kam long wan miting. Talemaot ples we i gat miting blong prij Sarede mo Sande, mo pulum ol pablisa blong mekem ol wok blong speret long wiken ya.
15 menet: “?Yu Yu No Laekem Man i Tok Agens Long Yu?”—Tok ya i stanap long wan haf blong Wekap! blong Febuwari 8, 1991 (Engglis mo Franis). Brata we i givim tok ya bambae i talemaot 6 samting we yumi save mekem blong stap kwaet taem ol man oli tok agens long yumi.
20 menet: “Yumi Gohed Moa Long Minista Wok”—Wan elda we i gat ekspiryens i mekem toktok wetem wan brata we i mekem olsem we hem i stap longtaem finis long trutok, be hem i no gohed long saed blong speret. Tufala i mekem wan sot plei blong tren long wok blong prij. (Haf 3 i tokbaot plei ya.) Taem yufala i lukluk haf 4, wan paenia no wan pablisa we i mekem gud wok i mekem wan plei. Hem i soem long wan pablisa we i no gat tumas ekspiryens ol samting we hem i save mekem sipos wan man i traem hem no i mekem trabol long hem long teritori. Talemaot ol bigfala poen we i stap long Wajtaoa blong Ogis 1, 1985 (Franis mo Engglis) pej 15 kasem 20 blong tajem hat blong man. Antap bakegen, leftemap tingting blong evriwan blong oli mekem toktok we i gudwan moa mo oli mekem ol visit.
Sing 106 mo laswan prea.