Mekemgud Minista Wok Blong Yumi Long Kongregesen
1 Jeova i yusum Jisas Kraes we hem i Hed blong Kristin kongregesen blong givim moa wok long “man blong wok we i gat hed” we i bos long haos blong hem. (Luk 12:42, 43) From samting ya, yumi save kasem ol buk we oli talemaot long yumi “wanem fasin i stret blong yumi holem, we yumi memba blong famle blong God.” (1 Tim. 3:15) Bigfala samting we yumi yusum blong faenemaot ol advaes long ol buk ya, hemia Watch Tower Publications Index. ?Olsem wanem buk ya i save givhan long yu?
2 ?Yu yu wan elda blong kongregesen? Buk ya i gat tu haf we i tokbaot ol wok blong elda: ‘Ol Elda’ mo ‘Ol Man Blong Lukaot.’ Long ‘Ol Elda,’ bighaf blong ol refrens oli talemaot olsem wanem blong givhan long olgeta long kongregesen, olsem wanem blong givim advaes, olsem wanem olgeta elda oli mas frengud, mo wanem wok blong ol elda tu. Haf ya ‘Ol Man Blong Lukaot’ i givim ol refrens we oli soemaot ol mak we man i mas kasem blong mekem wok ya. I stret nomo we haf ya i tokbaot ol mak ya from we Baebol i yusum tok ya “ol man blong lukaot” blong talemaot ol man ya. Mo tu, haf ya i tokbaot “presiden elda,” “elda we i lukaot long wok blong prij,” mo “sekretari.” Mo tu, bigfala nem ya “Ol Kongregesen” i gat fulap save we i givhan tu.
3 Yufala we i man blong givhan yufala i gat wan impoten wok blong mekem insaed long kongregesen. Haf ya “Ol Man Blong Givhan” i talem fulap save long saed blong ol mak we yufala i mas kasem mo ol wok blong yufala. Mo i gat sam refrens we yu save ridim moa blong save from wanem gudfala wok blong yu i impoten, mo olsem wanem yu save traehad blong kasem sam gudfala wok moa.
4 Ol elda mo ol man blong givhan oli gat plante gudfala wok long saed blong ol miting long kongregesen tu. Haf ya “Ol Miting” i givim plante refrens long evri saed blong bisnes ya. Mo i gat sam nambawan eksampel aninit long smol haf ya “traehad blong go long ol miting.” Mo i gat sam haf we oli tokbaot ol miting wanwan.
5 Sam 68:11 (NW) i talem se: “Ol woman we oli stap talemaot gud nyus ya oli olsem wan bigfala ami nomo.” Sem mak long ol brata long kongregesen, ol sista tu oli mas holem ol fasin we oli stret long memba blong famle blong God. Samtaem i gat kwestin i kamaot olsem: ?Sista i mas kavremap hed blong hem wetaem? ?Taem i no gat wan brata i stap we hem i naf blong lukaot long miting no blong mekem prea long kongregesen, olsem wanem nao? Haf ya “Woman” i save givim fulap ansa long ol kwestin ya. Mo tu ol haf ya “Sista,” “Kavremap Hed,” mo “Prea,” oli save givhan tu.
6 Las haf blong 1 Timote 3:15 (NW) i talem se Kristin kongregesen i “olsem bigfala pos blong mekem trutok i stap strong, mo i sapotem trutok.” Yes, yumi save sapotem trutok. Taswe yumi gohed blong mekem stret fasin long haos blong God, blong yumi save mekemgud minista wok blong yumi long kongregesen.