Ol Wetnes Blong Jeova Oli Mas Mekem Kingdom Wok
1 Yumi Wetnes blong Jeova, yumi mekem wan nambawan wok. God i stap mekem bigfala kot long heven mo long wol blong jajem olgeta we oli mekem man i wosip long olgeta. Mo yumi Wetnes blong Jeova, yumi stap glad nomo blong karem tok blong Jeova i go long ol man. (Aes. 41:1, 23; 43:12) Jeova i wantem givhan long yumi blong yumi save talemaot from wanem yumi gat hop olsem, taswe hem i givim plante buk long yumi. (1 Pita 3:15) Indeks blong ol buk blong Watch Tower Sosaete i nambawan blong faenem ol poen we yumi nidim. Sipos yumi savegud long ol fasin blong buk ya, bambae yumi gat moa jans blong yusum hem gud.
2 Yumi wanwan i mas savegud stampa haf “Jeova.” ?Long 1986-1989 Indeks, (1986-1988 long Franis) yu yu save faenem refrens we i talem from wanem Jeova i letem rabis fasin i stap yet? Long indeks ya wetem 1950-1985 Indeks, bambae yu yu save faenem tu, long smol haf “Nem” (Name) blong stampa haf ya, ol refrens blong olgeta tok we Sosaete i prentem long saed blong nem blong Jeova.
3 Stampa haf “Jehovah’s Witnesses” i impoten tu. Hem i givim fulap refrens we i laenap wetem ogenaesesen blong ol Wetnes blong Jeova. ?Yumi mas tingbaot hae skul olsem wanem? ?Yumi save letem dokta i katem bodi blong dedman blong faenem from wanem hem i ded? ?Sipos wan man i wantem kilim yumi i ded, yumi gat raet blong kilim hem i ded? ?Mo wanem tingting blong yumi long ol sosiol wok? Yu yu save faenem ol poen ya long smol haf “Olsem Wanem Oli Tingbaot—” (attitude toward) long 1986-1989 Indeks. Sam pej afta, yu save faenem histri blong ol Wetnes blong Jeova long olgeta kantri mo yu save faenem wan lis blong ol toktok we man i talemaot long smol haf “Statements by Others.”
4 Long sam narafala stampa haf bakegen, i gat sam moa tok long minista wok blong ol man blong Jeova tede. Long stampa haf “Ol Yia” (Dates) i gat wan smol haf, nem blong hem “Ol Bilif Ya Oli Kam Klia” (Clarification of Beliefs). Sosaete i putum long stret ples blong olgeta, yia afta yia, olgeta poen we sloslou ol brata oli kasem save long hem, olsem ol doktrin, ol profet tok mo ol store we oli olsem profet tok. Jes biaen, yumi save faenem stampa haf “Yia We Profet Tok i Kamtru Long Hem” (Dates of Prophetic Significance). Hemia ol yia we ol profet tok no ol pija blong profet tok oli kamtru, no oli stat kamtru long hem.
5 Ol store blong ol man we i stanap strong long Jeova oli halpem yumi bigwan mo oli tijim yumi long plante samting. Oli save givhan long yumi blong yumi mekem ol pikinini mo ol studen blong Baebol oli rere blong stanap strong long fyuja. Yu save faenem ol store ya long stampa haf “Store Blong Laef Blong Ol Wetnes Blong Jeova” (Life Stories of Jehovah’s Witnesses.) Yu save faenem nem blong ol brata we oli storeyan, mo nem blong store blong ol.
6 Samting we i makemgud ol Wetnes blong Jeova long ol narafala jyos, hemia tijing blong Baebol we i talem se Jeova i agri long tu kampani—sam bambae oli go long heven mo ol narafala bambae oli stap laef olwe long wol. Long stampa haf “Kongregesen Blong God” (Congregation of God), yumi save faenem plante refrens we i stret long olgeta we “God i singaot olgeta blong oli go long heven.” (Hib. 3:1, NW; Wok 20:28; 1 Tim. 3:15) Be yumi save faenem sam moa poen bakegen long ol stampa haf “Kampani We i Stap Yet” (Remnant) mo “144,000.” Ol stampa haf “Bigfala Kampani” (Great Crowd) mo “Narafala Sipsip” (Other Sheep) oli givim sam moa tok bakegen long saed blong olgeta we bambae oli kasem laef blong olwe long wol.—Rev. 7:9; Jon 10:16.
7 Nating se yumi yangfala no yumi olfala, be yumi mas Wetnes blong Jeova long evri haf blong laef blong yumi. Ol nekis Kingdom Wok bambae oli soemaot olsem wanem ol Indeks oli save halpem yumi long minista wok, long kongregesen, insaed long famle mo long wok blong prij.