Wok Gud Long Wok Blong Prij

¹ Lav blong Jeova mo blong ol man raonabaot long yumi i pusum yumi blong talemaot gud nyus blong Kingdom. Sipos yumi gat gudhan blong talemaot trutok, yumi save “pulumdaon olgeta samting we ol man oli stap stanemap long flas blong olgeta, we oli blong blokem ol man blong oli no save God.” (2 Korin 10:⁠5) Indeks blong ol Wajtaoa i blong givhan long yumi long saed ya.

² Haf ya we i tokbaot wok blong prij blong yumi hemia: “Minista Wok” (“Field Ministry”). Insaed long haf ya, hem i tokbaot olgeta samting long saed blong wok blong prij blong yumi. Hem i tokbaot tingting blong yumi wanwan, ol fas tok, ol tok we man i save yusum blong traem blokem yumi, toktok we i stret long ol buk wanwan, ol visit, mo Baebol stadi. ?Yu yu wantem yusum sam gud ekspiryens blong makem wan poen? Oraet, yu save faenem olgeta aninit long haf ya “Ol Ekspiryens.”

³ ?Yu yu storeyan wetem wan man we hem i talem se ol tok blong Baebol oli agensem olgeta nomo? Maet hem i bin talemaot sam vas long yu we i luk olsem we oli agensem sam narafala vas. Long haf ya “Ol Samting Blong Pruvum Se Baebol i Tru” (“Bible Authentic­ity”), i gat sam smol haf bakegen: “ol tok we oli agensem narafala tok” (“contradictions”) mo “fasin joen” (“harmony”). Ol haf ya oli givim plante refrens long saed ya. Long haf ya “ol vas oli joen gud” (“scriptures harmonized”), i gat wan bigfala lis blong ol vas we i luk olsem we oli agensem sam narafala vas long Baebol. Mo i givim ol refrens blong pruvum se i no olsem.

⁴ Long sam ples, yumi mas pulumdaon ol toktok we man i stanemap long saed blong ol gyaman tijing blong Krisendom, olsem Triniti, helfaea, sol we i no save ded. Long Indeks i gat sam stampa tok long saed blong olgeta ya. Long haf ya “Triniti” mo “Sol We i No Save Ded,” i gat wan smol haf: “ol vas we oli yusum long rong fasin blong traem sapotem bilif blong ol.” Haf ya i lidim yu long ol save we i eksplenem ol vas ya wanwan. Haf ya “Hel,” hem tu i gat wan smol haf blong hem: “ol vas we oli putum rong mining long ol.”

⁵ ?Yu yu wantem tumas blong statem wan Baebol stadi? ?No yu yu stap mekem wan Baebol stadi we i no gru long saed blong speret? Long haf ya “Ol Baebol Stadi” i gat ol smol haf: “blong statem,” “blong givhan long ol,” mo “blong tijim.” Ol haf ya wanwan oli talem sam refrens we oli save givhan long yu blong mekem ol Baebol stadi blong yu oli gohed gud. Samtaem yu mas stopem wan Baebol stadi. Blong givhan long yu blong save wetaem yu mas mekem olsem, yu save ridim ol smol haf ya: “stopem olgeta we oli no karem frut” (“terminating unfruitful”) mo “stopem” (“discontinuing”).

⁶ ?Yu yu wantem kasem moa blesing long wok blong prij? Ol haf ya “Fultaem Minista Wok,” “Haftaem Paenia,” “Ol Paenia,” “Ol Misinari,” mo “Wok Long Ples We i Gat Moa Nid,” oli save givhan long yu. Oli save lidim yu long gudfala save blong kasem ol mak ya mo blong harem gud long plante ekspiryens we fulap brata mo sista oli kasem finis.

⁷ Taem yumi wok gud long wok blong prij yumi harem gud tumas. (Jon 4⁠:34) Indeks blong ol Wajtaoa i save givhan long yu, taem yu stap gohed long wok ya we i givim glad.