Yumi Yusum Ol Indeks Blong Mekem Minista Wok Blong Yumi
1 From we yumi Kristin mo yumi givim laef blong yumi finis long God, yumi stap wok had blong mekem minista wok blong yumi long wan fasin we i gudwan moa. Blong givhan long yumi, Jeova i givim plante buk long yumi, mo ol buk ya oli gat ol gudfala advaes mo oli givhan gud long yumi. ?Yumi gat rod blong yusum gud ol buk ya? Ol Indeks Blong Ol Buk Blong Watch Tower Sosaete, oli kamaot evri yia, i stat long 1961 long Engglis, mo i stat long 1976 long Franis. Ol Indeks ya oli nambawan tul blong givhan long yumi.
2 ?Olsem wanem Indeks i save givhan long yumi blong mekem minista wok? Hem i soemaot long yumi weples blong faenem ol nambawan advaes mo ol tok blong givim save we oli kamaot finis. Taem we mifala i mekem ol Indeks oli rere, mifala i tingbaot ful famle blong ol brata raonabaot long wol. Ol pikinini wetem ol bubu, ol man we oli stadi i no longtaem wetem olgeta we oli stadi longtaem finis, evriwan bambae oli faenem sam gudfala poen we i save halpemgud olgeta.
OLSEM WANEM BLONG FAENEM OL POEN WE YU YU LUKAOT
3 Sipos yu lukaot mining blong wan vas no mining blong plante vas, bambae i moa gud yu luk bakegen indeks blong ol vas blong Baebol we i stap long en blong ol Indeks. ?Ating wan man i soemaot vas blong Jon 10:30 blong pruvum tijing blong Triniti? Ale, Indeks blong ol vas blong Baebol bambae i pulum yu blong lukluk sam haf we oli eksplenem from wanem Jisas i talemaot ol tok ya. Indeks ya bambae i mekem Baebol riding blong yu i kam gud moa mo i givhan long yu blong faenem mining blong ol vas we maet yu ting se oli no isi tumas blong eksplenem no oli no klia gud.
4 Indeks blong ol nem blong ol tok we i stap long buk ya i givhan long yumi blong folem sam narafala rod blong kasem save long ol gudfala poen ya. Maet yu wantem save wanem samting yu mas mekem sipos waef no hasban blong yu i no bilif, mo i no wantem we yu tekem ol pikinini i go long miting. Blong faenem ol advaes, yu save ridim ol haf “Hasban,” “Waef,” “Pikinini,” “Agensem,” no “Miting.” Nomata wanem poen yu lukaot, sipos yu no faenem wanem samting yu wantem faenem long faswan wod we yu lukluk long hem, yu save lukluk long wan narafala wod bakegen. Blong faenem wod ya, yu save askem long yu se: ‘?Wanem samting i joen long bisnes ya? ?Ples we samting ya i hapen long hem i impoten? ?Blong mekem samting ya, mi nidim wan spesel fasin? ?I gat wan filing we i joen moa long bisnes ya, i bitim ol narafala filing? ?Samting ya i blong kasem wan narafala mak?’ Sipos yu ting se yu faenem finis wan stampa wod we i stret gud long samting we yu stap lukaot, i gud fastaem yu ridim ol tok we oli stap aninit long wod ya, from we oli pulum yu blong ridim sam narafala wod bakegen. Plante taem, yu save winim taem sipos yu faenem wan narafala wod we i stret gud moa long bisnes ya.
5 Fasin blong yusum gud ol Indeks bambae i givhan long yumi bigwan blong mekem gudfala wok long tabu wok blong God. Sipos yumi yusum gud tul ya, samting ya bambae i givhan long famle blong yumi, long olgeta we yumi stadi Baebol wetem olgeta mo long kongregesen blong yumi. Long ol nekis Kingdom Wok, bambae yumi store moa long sam fasin we ol Indeks Blong Ol Buk Blong Sosaete Watch Tower oli tokbaot blong givhan long yumi long minista wok blong yumi.