Yumi Strong Blong Talem “Yu Kam.”
1 Ol samting we i stap hapen long wol oli spid nomo naoia. Samting ya i soemaot gud se yumi laef long ol “las dei.” (2 Tim. 3:1-5) Ol fasin blong kilim man oli go antap, ekonomi i no stanap strong mo ol strong sik we i tekemaot laef blong plante man oli mekem ol trabol blong ol man i kam bigwan moa. Ol man oli harem nogud tumas from ol trabol we oli kasem. Be speret, mo waef blong Kraes tufala i singaot long olgeta blong jenisim laef blong olgeta blong olwe. Tufala i no stop blong talem se: “Yu kam.” Mo “wan bigfala kampani” i kam joen long olgeta blong singaot ol man blong olgeta ples oli kam mo oli tekem i fri nomo wora blong laef.—Rev. 7:9; 22:17.
2 Tede, ol man we oli tosta long stret fasin oli ansa kwiktaem nomo long tok ya. Las yia, plante milyan long olgeta oli joen long ol distrik asembli we oli kamaot long olgeta ples long wol, mo kolosap 10 milyan man oli stap long Memoriol. Sam milyan bakegen oli gat tangkyu from we Jeova i wantem givhan long ol, ale oli lesin long mesej blong Kingdom we ol Wetnes oli talem taem oli pas long haos blong olgeta. Taswe hem i impoten tumas we yumi yusumgud taem blong yumi blong talemaot mesej ya long ol pablik ples mo long ol haos wanwan.—Wok 5:42; Efes. 5:15, 16.
YUMI GAT STRONG TINGTING
3 Ol faswan Kristin oli kasem trabol from we oli wok strong long wok blong prij. (Wok 16:19-21; 17:2-8) Be nating, oli no kam slak long ol bigfala hadwok we oli mekem blong talemaot gud nyus. Yumi tu, yumi mas gat strong tingting olsem olgeta, mo yumi mas gohed nomo long ol hadwok we yumi mekem blong talemaot gud nyus.
4 Long ol kantri we gavman i putum tabu long wok ya, ol man blong wol oli mekem i strong tumas long ol brata blong yumi. Be nating, samting ya i no blokem olgeta mo olgeta oli hapi nomo blong mekem wok blong prij. Sam long ol trabol we oli kasem oli olsem: Oli save lusum wok no haos blong olgeta, mo oli no moa fri blong mekem wanem oli wantem. Nambawan eksampel blong olgeta i mas pusum yumi blong singaot long ol man se: “Yu kam.”—2 Tes. 3:9.
5 Taem we hem i kasem trutok, wan sista blong yumi i wantem tumas blong mekem wok blong paenia. Ale long 35 yia, hem i stap tingting long wok blong paenia, be hem i no gat rod blong mekem olsem. Laef blong hem i jenis taem hem i kasem 70 yia. Ale, hem i kam fultaem paenia. Tede, ol man we i rere blong mekem narafala wok taem oli olfala olsem oli no plante tumas. Be nating, sista ya i mekem fultaem paenia. Plante yia i pas, be sista ya i stap yet long fultaem minista wok mo hem i glad tumas blong mekem wok ya. Hem i talem se: “Evri dei i gud moa.” Fasin blong hem i leftemap tingting blong ol narafala, from we Jeova i singaot hem blong mekem moa long wok blong Kingdom, mo hem i agri nomo blong mekem wok ya.
6 Tede, sem mak long faswan handred yia, samfala man oli obei long mesej ya, oli jenisim tingting blong olgeta, oli lego ol rabis fasin we i sakem doti long nem blong God. Oli mekem kampani wetem intenasnal famle blong ol Wetnes we i givim laef blong ol long God mo oli wok tugeta wetem speret mo wetem waef blong Kraes. Olgeta tu oli singaot long ol nararala man we oli intres long trutok mo oli talem long ol se: “Yu kam.”
7 Wok blong Kingdom we i gru bigwan mo bigfala namba blong ol brenj-ofis we Sosaete i bildim bakegen long plante ples long wol i pruvum gud se Jeova i stap blesem wok we i stap gohed. Be nating, en blong wol ya i kam kolosap finis. Taswe, naoia i stret taem blong yumi no fraet mo yumi mas strong blong talem se: “Yu kam.” Ale, sam man bakegen bambae oli save kam kwik, mo oli save stretem laef blong ol.—Wok 20:26, 27; Rom 12:11.