Yumi Askem Stret

1. ?Wetaem bambae yumi stat blong singaot ol man oli kam long ol asembli?

¹ Sipos yu spenem plante taem mo plante mane, blong yu rerem wan gudfala kakae, bambae yu glad blong singaot ol fren mo ol famle blong yu blong oli kam kakae. Long sem fasin, ol brata oli wok had blong mekemrere bigfala kakae we bambae i kamaot long asembli blong tri dei we i stap kam. Tri wik bifo we asembli blong yumi i stat, Jehova i wantem se yumi gat janis blong singaot ol man oli kam. ?Wanem samting bambae i givhan long yumi blong yumi glad blong singaot olgeta?

2. ?Wanem samting bambae i mekem se yumi wantem joen fulwan long spesel wok ya?

² Sipos yumi tingbaot ol gudfala kakae we yumi kasem long ol asembli, bambae yumi wantem joen fulwan blong singaot ol man oli kam long asembli ya. (Aes. 65:13, 14) Yumi mas tingbaot tu se, evri yia, spesel wok ya blong singaot ol man oli kam long asembli, i stap karem plante gudfala frut. (Yu luk bokis ya “Gudfala Frut We i Kamaot.”) Sam long ol man we yumi singaot olgeta, oli kam, be samfala bambae oli no kam. Nating se plante man, no smol man nomo oli kam long asembli, be gudfala wok we yumi mekem i leftemap nem blong Jehova, mo i soemaot se hem i stap givim samting long gladhat blong hem.—Sam 145:3, 7; Rev. 22:17.

3. ?Bambae yumi seremaot pepa blong singaot ol man olsem wanem?

³ Long olgeta kongregesen wanwan, kampani blong ol elda bambae i talemaot, olsem wanem blong seremaot pepa blong singaot ol man. Bambae oli talem long yumi sipos yumi save lego pepa ya long ol haos blong man we i no stap, no sipos yumi save seremaot, taem yumi prij long pablik ples. Long ol wiken, sipos yumi luk se i stret yumi save seremaot ol magasin tu wetem pepa ya. Taem wok ya i finis, bambae yumi glad tumas we yumi singaot plante man, blong oli kam joen wetem yumi long bigfala kakae we Jehova i givim long yumi.

Gudfala Frut We i Kamaot

Sam yia i pas, wan sista i joen long spesel wok ya blong singaot ol man i kam long asembli. Be hem i wari se, ol wok we hem i traehad blong mekem bambae i karem frut, no nogat. Hem i stap tingting se, ‘?Ol man bambae oli glad blong kam long asembli ya?’ Ale long Sarede moning long taem blong asembli, hem i luk wan man we i memba blong wan skul blong Hindu we i stap long asembli ya. Nao hem i go talem halo long man ya. Biaen hem i tingbaot se man ya i kam long asembli, from we hem i kasem wan invetesen. Man ya i askem sam kwestin mo sista ya i ansa long hem. Hem i glad tumas long asembli ya, mo hem i talem ol gudfala toktok from ol klos mo ol fasin blong ol brata mo sista. Biaen, long sem dei nomo, sista ya i storian wetem wan man mo woman blong hem we i sidaon klosap long hem. Tufala tu i kasem invetesen blong asembli, mo tufala i tekem wan bas blong kam long asembli. Tufala i glad tumas long asembli ya mo tufala i plan blong kambak long Sande blong asembli. Yes, sista ya i luksave se i impoten tumas blong singaot ol man i kam long ol asembli blong yumi evri yia.
Long wan asembli we i jes pas, wan man mo woman blong hem we tufala i fultaem paenia, tufala storian wetem wan olfala man mo woman blong hem. Tufala olfala ya i talem se hemia fastaem blong tufala blong kam long asembli. Tufala paenia i askem se: “?Hu i singaot yutufala i kam?” Tufala olfala ya i ansa se: “Wan dei, taem mitufala i gobak long haos, mifala i luk wan pepa i stap aninit long doa.” Tufala i ridim pepa ya mo fulumap ol spes we i stap long laswan pej blong pepa ya. Long medel dei, ol narafala brata mo sista we oli stap long asembli ya oli serem kakae blong olgeta wetem tufala. Tufala i glad tumas long program blong asembli mo tufala i plan blong kambak long nekis dei. Ale, ol brata oli mekem plan blong go visitim tufala.