Stat Long Namba 2 Eprel, Bambae Yumi Seremaot Pepa Blong Singaot Ol Man Oli Kam Long Memoriol
1. ?Wetaem bambae yumi seremaot pepa blong singaot ol man oli kam long Memoriol? ?Mo wanem gudfala samting i kamaot from spesel wok ya?
1 Stat long namba 2 Eprel go kasem namba 17 Eprel, bambae yumi seremaot pepa blong singaot ol man oli kam long Memoriol. Hemia wan taem blong tingbaot ded blong Kraes, we i moa impoten i bitim ol narafala taem long yia. Long ol yia we oli pas, plante man we yumi singaot olgeta, oli glad blong kam. Yu traem tingbaot, long dei blong Memoriol, wan woman i ring i go long wan branj ofis, i talem se: “Mi mi jes kambak long haos, mo mi luk wan pepa we i stap klosap long doa. Mi mi wantem tumas blong go long spesel miting ya, be mi no save stret taem blong hem.” Ale brata long branj ofis i talem se, insaed long pepa ya, yu save faenem stret ples mo stret taem blong Memoriol ya. Long las tok blong woman ya, hem i promes se: “!Tede long naet, bambae mi kam long miting ya blong yufala!”
2. ?Taem yumi seremaot pepa ya, yumi save talem wanem?
2 ?Bambae Yumi Seremaot Pepa Ya Olsem Wanem?: From we yumi gat smol taem nomo blong seremaot pepa ya long ol teritori blong yumi, i gud yumi mekem storian blong yumi i sot nomo. Yumi save talem se: “Halo. Mifala i wantem givim wan pepa long yu mo famle blong yu. Pepa ya i blong singaot yufala i kam long wan impoten miting we bambae i kamaot long olgeta ples blong wol long Sande, 17 Eprel. [Yu givim pepa long man blong haos.] Long kalenda blong yumi, dei ya, hemia stret dei we Jisas i ded long hem. Long taem ya, bambae i gat wan tok we i stanap long Baebol, blong eksplenem ol gudfala samting we yumi save kasem from ded blong Kraes. I fri nomo blong yu kam lesin. Insaed long pepa ya, yu save faenem stret taem mo stret ples we bambae yumi holem miting ya long hem.”
3. ?Yumi save mekem wanem blong singaot plante man oli kam?
3 Sipos teritori blong kongregesen i bigwan, ol elda oli save talem long ol pablisa blong oli lego pepa ya long ol haos, taem ol man oli no stap. Be oli mas putum pepa ya long wan ples we narafala man i no save luk. Sipos yu mekem plan blong go prij long wan aelan we i longwe, yu save givimaot pepa ya wetem buklet ya, !Yu Yu Save Harem Gud Blong Olwe Long Wol! Yu mas gat strong tingting blong singaot ol Baebol stadi, ol visit, ol famle blong yu, ol fren blong yu long wok no long skul, mo ol narafala man tu we yu yu save olgeta. Long wiken, taem yu stap seremaot pepa ya, yu save seremaot ol magasin tu, sipos yu luk se i stret blong mekem olsem. ?Olsem wanem? ?Yu yu naf blong mekem wok blong haftaem paenia long manis Eprel, mo joen fulwan long spesel wok ya?
4. ?From wanem yumi wantem tumas se ol man we oli wantem save moa, oli kam long Memoriol?
4 !Yu traem tingbaot bigfala witnes we ol man bambae oli kasem, sipos oli stap long taem ya! Bambae oli kasem save moa se Jehova i lavem tumas ol man, taswe hem i givim pikinini blong hem blong i ded olsem wan sakrefaes, blong pemaot yumi. (Jon 3:16) Bambae oli lanem tu, ol blesing we bambae ol man oli kasem from Kingdom blong God. (Aesea 65:21-23) Mo tu, bambae oli harem tok i kamaot se oli save talem long ol man blong welkam, se oli wantem stadi Baebol blong lanem moa samting. !Yumi prea se spesel wok ya bambae i pulum plante moa man we hat blong olgeta i stret, blong oli kam joen wetem yumi long taem blong Memoriol!