!Singaot Ol Man Long Olgeta Ples Long Wol, Blong Oli Kam Long Memoriol!
1. ?Bifo long Memoriol, wanem spesel kampen we yumi plan blong mekem long olgeta ples long wol?
1 “Oltaem yufala i mas mekem samting ya blong tingbaot mi bakegen.” (Luk 22:19) Ol man we oli wosipim Jeova, oli wantem obei long oda ya blong Jisas. Taswe long Maj 30, 2010, bambae oli kam wanples wetem ol man we oli intres, blong tingbaot ded blong Jisas. Stat long Maj 13 kasem Maj 30, bambae yumi seremaot wan spesel pepa blong singaot ol man long olgeta ples long wol, blong oli kam long Memoriol.
2. ?Olsem wanem yumi save seremaot pepa ya long ol man?
2 ?Olsem Wanem Blong Seremaot?: Yu save givim pepa ya long man blong haos, blong hem i lukluk pija we i stap long fored, nao biaen, talem long hem se: “Long naet blong Maj 30, plante milian man long olgeta ples long wol bambae oli joen wanples blong tingbaot ded blong Jisas. Mi mi kam blong givim pepa ya long yu mo famle blong yu, blong yufala i kam long miting ya. Ol fren blong yu oli save kam tu. Plis makem taem mo ples we miting ya bambae i stap long hem.” Sipos yu luk se i stret, yu save ridim Luk 22:19 long Baebol blong yu, blong soem oda ya we Jisas i givim. Yumi mas tingbaot se yumi gat smol taem nomo blong seremaot pepa ya long ol teritori, taswe i gud we storian blong yumi i sot nomo.
3. ?Yumi save singaotem hu?
3 Sipos teritori blong kongregesen i bigwan, ol elda oli save talem long yu blong lego wan pepa long ol haos we i no gat man long olgeta. Taem yu stap seremaot pepa ya, yu save seremaot ol magasin tu, sipos yu luk se i stret blong mekem olsem. Yu mas traehad blong singaotem ol visit blong yu, ol Baebol stadi, ol man long ples blong wok, ol fren long skul, ol famle, ol man we oli stap raonabaot long yu, mo sam narafala we yu save olgeta.
4. ?Sipos yumi kasem save mo yumi gat tangkiu from lav blong Jeova taem hem i givim ransom, samting ya bambae i pusum yumi blong mekem wanem?
4 Rere Blong Joen Fulwan: Taem blong Memoriol i wan gudfala taem blong mekem moa wok. ?Olsem wanem long yu? ?Yu save jenisim program blong yu blong mekem wok blong haftaem paenia? ?Yu yu gat ol pikinini mo ol Baebol stadi we oli stap gohed gud? Sipos yes, i gud yu luk ol elda, blong oli luk sipos olgeta ya oli naf blong joen long spesel kampen ya olsem ol pablisa we oli no baptaes yet. Sipos yumi kasem save mo gat tangkiu from lav blong Jeova taem hem i givim ransom, samting ya bambae i pusum yumi blong stap long taem blong Memoriol, mo bambae i pusum yumi tu blong singaotem plante moa man blong oli kam joenem yumi long taem ya.—Jon 3:16.