Spesel Wok Blong Talemaot Memoriol i Stat Long Namba 1 Maj
1. ?Wok blong singaot ol man oli kam long Memoriol bambae i stat wetaem? ?From wanem wok ya i longfala moa long yia ya?
1 Evri yia, yumi mekem wan spesel wok blong singaot ol man oli kam joen wetem yumi long Memoriol. Long yia ya, bambae yumi statem wok ya long Fraede, namba 1 Maj. Bambae wok ya i longfala moa i bitim ol narafala yia. Bambae yumi gohed long wok ya gogo kasem Memoriol long 26 Maj. Hemia bambae i givim janis long yumi blong singaot plante moa man. Mo tu, ol kongregesen we oli gat plante teritori, oli gat janis blong finisim.
2. ?Wanem plan we yumi mas folem long saed blong teritori mo ol pepa we yumi seremaot?
2 Yumi Mekem Gudfala Plan: Ol elda bambae oli talem long yumi wanem teritori we yumi mas wok long hem, mo bambae oli talem tu sipos yumi save lego pepa i stap long ol haos we i no gat man. Sipos yumi finisim olgeta teritori blong yumi, nao i gat sam pepa i stap yet, yumi save givimaot ol pepa ya long ol man long pablik ples. Elda we i lukaot long wok blong prij, bambae i meksua se i gat plante pepa i stap, we oli raetem finis adres mo taem blong Memoriol long olgeta. Bambae hem i putum ol pepa ya oli stap long ples blong ol buk mo ol magasin. Bambae hem i no putum olgeta pepa oli stap long ples ya, evriwan wantaem. Wan pablisa i mas tekem nomo ol pepa we hem i naf blong seremaot long wan wik.
3. ?Yumi save mekem olsem wanem, taem yumi givimaot ol pepa?
3 ?Bambae Yumi Talem Wanem? I moa gud yumi toktok blong smoltaem nomo long evri haos. Olsem nao, yumi save kasem plante moa man. Long pej 4, bambae yu luk wan fastok we yu save yusum. Yu save jenisim smol blong mekem i stret long ples blong yu. Sipos wan man i wantem storian no i wantem askem sam kwestin, yumi no mas hareap blong ronwe long hem. Taem yumi givimaot ol pepa long wiken, i gud yumi soemaot ol magasin tu. Long namba 2 Maj, bambae yumi traehad moa blong givimaot ol pepa i bitim we yumi statem Baebol stadi.
4. ?From wanem yumi mas traehad blong joen fulwan long wok blong singaot ol man?
4 Yumi wantem se plante man oli joen wetem yumi long Memoriol. Tok blong Memoriol bambae i eksplenem stret se Jisas hem i hu. (1 Kor. 11:26) Mo bambae tok ya i eksplenem se ded blong Jisas i givhan long yumi olsem wanem. (Rom 6:23) Mo bakegen, tok ya bambae i soemaot from wanem yumi mas tingbaot Jisas. (Jon 17:3) !I gud yumi joen fulwan long wok ya blong singaot ol man!