Yusum Baebol Long Wok Blong Prij
1 Ol tok we God i givim long ol man blong raetemdaon long Baebol, i save gat bigfala paoa long ol man. From samting ya, ol Kristin long faswan handred yia oli yusumgud ol vas blong Baebol, taem oli stap talemaot gud nyus. Pol i ‘mekem plante toktok from ol tok blong Baebol.’ Hem i soemaotgud ol tok blong Baebol blong eksplenem mo pruvum ol tok blong hem. (Wok 17:2, 3) Apolos tu i prij long ol man Isrel. Hem i “soemaotgud, se from ol tok blong Baebol, i klia we Jisas i Mesaea.”—Wok 18:24-28.
2 Tede, ol Wetnes blong Jeova oli folem eksampel blong ol man ya bifo. Wajtaoa, Maj 1, 1986, (Engglis, Franis) pej 26, i talem se: “Taem oli stap prij, oli wantem we ol man oli luksave se mesej blong olgeta i no kamaot long tingting blong olgeta. Hem i kamaot long Tok blong God nomo. Taswe oli yusum Baebol. Oli ridim sam vas long ol man we oli rere blong lesin.” ?Yu yu stap yusum Baebol oltaem long minista wok blong yu?
?FROM WANEM I MOA GUD?
3 ?From wanem i moa gud blong yusum Baebol? From we hem i Tok blong God. Hem i save “jajem olgeta tingting blong man, mo ol samting we man i wantem long tingting blong hem.” (Hib. 4:12) Taem man i harem trutok blong Baebol, samting ya i save mekem ol tingting we oli pusum man ya mo ol samting we hem i wantem i kam long klia ples. Sipos hat blong man ya i gud, ol trutok ya bambae oli pulum hem. Eksampel: Wan man wetem waef blong hem, tufala i bin gohed gud long wosip blong Jeova. Nao wan man i askem long tufala from wanem tufala i gohed kwik, taem tufala i harem gud nyus. ?Tufala i ansa olsem wanem? “From Baebol.” Ol pablisa we oli kam long haos blong tufala oli ridim sam vas blong Baebol, nao tufala i harem voes blong “gudfala man blong lukaot long sipsip.”—Jon 10:14, NW; w78 6/1 [1/9] pej 22, 23.
4 ?Ating yu yu harem we yu no naf blong yusum Baebol long wok blong prij? Yu mas folem wan gudfala program blong stadi, yu wan. Ale, bambae yu save gat evri samting blong mekem ol gudfala wok we i stap, mo yu save harem se yu naf. Yu mas mekemrere ol miting, mo joen long ol miting blong kongregesen. (2 Tim. 3:16, 17) Olgeta long famle mo olgeta we oli prij tugeta, oli save mekem sam pleplei long haos blong savegud stampa tok blong prij. Mo tu, bighaf blong ol fas tok long pej 9 kasem 15 blong Reasoning buk, oli gat wan vas insaed long olgeta. I gud yu mekem sam pleplei blong traem lanem sam long olgeta ya. Yusum olgeta we oli stret long ples blong yu, mo we oli save pulum tingting blong ol man long ples blong yu.
YUSUM FASIN LUKSAVE
5 Samtaem maet yu save askem long man we yu stap storeyan wetem hem blong karem Baebol blong hem, nao hem i save jekemaot vas we yumi soemaot. Long saed ya, yumi mas yusum fasin luksave. (Lukluk Reasoning buk pej 67, haf 3, mo pej 279, haf 2 [pej 411, haf 2].) Sipos man ya i gat smoltaem nomo, maet yumi ridim wan vas nomo long stampa tok blong prij. No sipos i klia se man ya i bisi, maet yumi talemaot nomo sam tok blong Baebol we i stret long poen ya we yumi storebaot. Mo yumi save talem long man ya se tok ya i kamaot long Baebol. Taem Jisas mo ol aposol blong hem oli prij, oli no karem wan buk we i gat ol Hibru vas blong Baebol i stap long hem. Be oltaem oli stap talemaot ol vas ya. Yumi tu, yumi mas traehad blong save gud sam vas blong Baebol, nao yumi save holem olgeta long tingting blong yumi mo yusum olgeta long wok blong prij.
6 Pol i talem long Timote se hem i mas traehad blong kam wan man we i ‘stap tijim ol man long trutok blong God, long stret fasin nomo.’ (2 Tim. 2:15) Advaes ya i stret long yumi tede tu. Yumi wantem folem Jisas mo ol aposol, taswe yumi mas yusum Baebol oltaem long wok blong prij. Traem soemaot sam vas long evri man. Sipos no, talemaot sam vas we oli stap long tingting blong yu. Sipos yumi traehad blong mekem samting ya, bambae yumi soemaot klia se yumi minista blong God, mo mesej blong yumi i stanap long Tok blong God nomo.