?Yu Yu Stap Leftemap Tok Blong God?
1 Long wol ya, plante man oli daonem Baebol, be ol trufala Kristin oli wok strong blong leftemap Tok blong God. Yumi bilif se “olgeta tok blong Baebol oli kamaot long God fastaem,” from samting ya yumi gat sem tingting olsem Jisas we i prea long Jeova se: “Tok blong yu i tru.” (2 Tim. 3:16; Jon 17:17) ?Olsem wanem yumi save leftemap Tok blong God?
2 Lanem Ol Vas Blong Baebol: I sua se Jisas i traehad blong lanem Tok blong God. Hemia i givhan long hem blong tijim ol man long Baebol taem we hem i stap prij. (Luk 4:16-21; 24:44-46) ?Olsem wanem yumi save rimemba plante vas blong Baebol? Yumi save mekem olsem sipos yumi ridim Baebol evri dei, nao biaen, yumi tingting dip long wan vas we yumi luk se i leftemap tingting blong yumi mo we i save givhan long wok blong prij. Taem yumi rerem ol miting, yumi mas jekem ol vas we oli stap mo ridim olgeta stret long Baebol. Maet yumi save rerem wan ansa long ol vas ya. Taem yumi joen long ol miting, nao brata we i mekem tok i ridim wan vas blong Baebol, yumi tu yumi mas folem vas ya long Baebol blong yumi. Sipos yumi lanem ol vas blong Baebol, hemia bambae i givhan long yumi blong “tijim ol man long trutok blong God long fasin we i stret gud.”—2 Tim. 2:15.
3 Letem Baebol i Toktok: Taem yumi prij, yumi mas letem Baebol i toktok. Olsem nao, sipos i gat rod, yumi mas traem blong ridim mo eksplenem wan vas blong Baebol long man blong haos. Sipos hem i askem wan kwestin no i talem wan tok blong blokem yu, i moagud blong yusum Baebol taem yu ansa long hem. Sipos man blong haos i bisi, be yumi save soemaot wan tingting we i kamaot long Baebol yet. Yumi save talem se: “Bifo we mi go, mi wantem ridim wan vas blong Baebol nomo long yu.” Sipos i gat rod, ridim vas ya stret long Baebol mo letem man blong haos i lukluk taem yu ridim.
4 Taem wan pablisa i soem ol vas blong Baebol long wan man blong pruvum se tijing blong Triniti i no tru, man ya i sek mo i talem se: “!Mi mi go long jos long ful laef blong mi, be mi no save nating se Baebol i talem samting ya!” Kwiktaem nomo man ya i agri blong stadi Baebol. Jisas i talem se ol sipsip blong hem bambae oli harem voes blong hem. (Jon 10:16, 27) Beswan rod blong mekem ol man we hat blong olgeta i stret oli luksave trutok, hemia blong letem olgeta oli ridim stret long Baebol. !Taswe, i gud we yumi leftemap trutok we i stap long Tok blong God!