Fasin Blong Yu Blong Tij i Mas Pulum Tingting Blong Man
1. ?Sipos yumi wantem karem gudfala frut long wok blong prij, yumi mas yusum Baebol olsem wanem?
1 Ol man blong talemaot gud nius we oli karem gudfala frut long wok blong prij, olsem aposol Pol, oli savegud se sipos oli wantem ‘tijim trutok blong God long fasin we i stret gud,’ i no naf blong ridim ol vas blong Baebol nomo long man. (2 Tim. 2:15) Taem yumi tijim ol man, ?olsem wanem yumi save yusum Tok blong God blong “pulum” tingting blong olgeta?—Wok 28:23.
2. ?Olsem wanem yumi save pulum man blong tinghae long Baebol?
2 Letem Baebol i Toktok: Fastaem, i gud blong pulum man blong tinghae long waes blong God we i stap long Baebol. Taem man we i lesin long yumi i luk we yumi trastem Tok blong God, samting ya i save pulum hem blong wantem lesin gud long vas we bambae yumi ridim long hem. (Hib. 4:12) Maet yumi save talem nomo se: “I gud blong save tingting blong God long saed ya. Traem luk wanem we Tok blong Hem i talem.” Taem yu gat janis, yu mas openem Baebol mo ridim ol tok blong hem stret long man. Samting ya i olsem we yu letem Baebol i toktok long man.
3. ?Afta we yu ridim wan vas, yu save mekem wanem blong halpem man blong kasem save long vas ya?
3 Nambatu samting, i gud blong eksplenem vas we yu ridim. Plante man bambae oli no kasem save long wan vas long faswan taem we yu ridim long olgeta. I gud blong talem sam samting we oli save halpem hem blong luksave olsem wanem vas ya i joen long storian blong yutufala. (Luk 24:26, 27) Soem ol impoten haf no tok insaed long vas ya we oli sapotem tingting ya we yu wantem eksplenem long hem. Maet i gud yu askem wan kwestin long hem blong meksua se hem i kasem save poen ya we vas i soemaot.—Prov. 20:5; Wok 8:30.
4. ?Wanem namba tri samting we yumi save mekem blong tijim man long fasin we i pulum tingting blong hem?
4 Mekem Man i Tingting Gud Long Ol Vas: Namba tri samting, traem mekem we tok blong vas ya i kasem tingting mo hat blong man. Halpem man blong luksave olsem wanem vas ya i stret long hem. Taem yu mekem man i tingting gud long wan vas, samting ya i save pulum hem blong jenisim tingting blong hem. (Wok 17:2-4, NW; 19:8, NW) Eksampol, maet yu yusum Baebol long Bislama mo yu ridim futnot long Eksodas 3:14 blong soemaot se nem blong God hem i Jeova. Ale maet yu save mekem man i tingbaot se taem hem i gat ol fren, hem i save nem blong ol fren ya. Hem i no save frengud wetem olgeta sipos hem i no save nem blong olgeta fastaem. Ale, maet yu save askem long man ya se, “?Naoia we yu yu save nem blong God, yu ting se taem yu prea long hem bambae yu tingbaot hem olsem wanem?” Taem yu halpem man blong tingbaot olsem wanem vas ya we hem i jes ridim, i stret long laef blong hem, man ya bambae i luksave se Baebol i save givhan bigwan long hem. Yes, fasin blong yusum Baebol blong pulum tingting blong ol man we yu stap tijim olgeta, i save halpem olgeta we hat blong olgeta i stret, blong oli kam wosipim Jeova, trufala God ya we i laef.—Jer. 10:10.