Pulum Tingting Blong Ol Narafala
1 Ol man oli presem aposol Pol from gudhan we hem i gat blong pulum tingting blong narafala long wok blong talemaot gud nius. (Wok 19:26) King Agripa, hem tu i talem long Pol se: “Long smol taem nomo, yu save pulum tingting blong mi blong kam wan Kristin.” (Wok 26:28, NW ) ?Wanem i mekem se Pol i gat gudhan blong pulum tingting blong narafala? Hem i tingting gud long ol tok blong Baebol, mo i rere blong jenisim toktok blong hem blong i laenap wetem wanem we narafala i intres long hem.—Wok 28:23.
2 Blong folem eksampol blong Pol, yumi tu, yumi mas pulum tingting blong narafala long wok blong prij. ?Olsem wanem yumi save pulum tingting blong narafala? Yumi mas gat fasin luksave taem yumi stap toktok mo lesin long ol narafala. (Prov. 16:23) I gat tri impoten rod we oli save halpem yumi blong pulum tingting blong narafala.
3 Lesingud: Taem narafala i toktok, yu mas lesingud long wanem we hem i talem, blong yu save mekem storian blong yu i stanap long wanem we man ya i intres long hem. Sipos hem i tok agensem yu, traem kasem save from wanem hem i agensem yu. I gud blong kasem save wanem we i stap long tingting blong hem, from wanem hem i bilif long samting ya, mo wanem we i pulum hem blong bilif olsem. (Prov. 18:13) Traem bes blong yu blong kasem save long ol samting ya.
4 Askem Ol Kwestin: Sipos wan man i talem se hem i bilif long Triniti, maet yu save talem se: “?Yu yu bilif long Triniti longtaem finis?” Biaen, yu save gohed se: “?Yu bin mekem dip stadi long Baebol blong luk wanem we Baebol i talem long saed ya?” Yu save askem tu se: “?Sipos God i haf blong wan Triniti, yu ting se bambae Baebol i talemaot klia samting ya long yumi?” Ansa we man ya i givim bambae i halpem yu blong pulum tingting blong hem i go long ol vas blong Baebol we i tokbaot poen ya.
5 Yusum Ol Gudfala Toktok Blong Mekem Man i Tingting: Wan Witnes i askem long wan woman we i bilif se Jisas i God, i se: ?Sipos yu traem blong tijim mi se tu man oli sem mak, mo yu yusum pija tok blong famle blong soemaot poen ya, bambae yu tokbaot wanem memba long famle?’ Woman ya i ansa se: “Maet mi save yusum tu brata.” Witnes ya i gohed se: “Yes, maet yu yusum tufala brata we tufala i twin. ?Be Jisas i minim wanem taem hem i tijim se God i Papa mo Jisas hem wan i Pikinini?” Woman ya i kasem poen se wan i moa olfala mo i gat moa paoa. (Mat. 20:23; Jon 14:28; 20:17) Gudhan blong pulum tingting blong narafala i mekem se Witnes ya i kasem hat mo tingting blong woman ya.
6 I tru se i no evri man we bambae oli lesin long trutok, nomata we yumi traem bes blong yumi blong talemaot trutok ya long olgeta long fasin we i stret nomo. Be olsem Pol, i gud we yumi wok strong long teritori blong yumi blong lukaot olgeta we hat blong olgeta i stret, mo pulum tingting blong olgeta blong lesin long mesej blong Kingdom.—Wok 19:8.