Talemaot Gud Nyus—Yusum Ol Magasin Long Ol Teritori We Yumi Wokem Oltaem
1 Ol Wok 8:25 i talem se Pita mo Jon tufala i prij gud long Sameria. Nao tufala i talemaot “gud nyus long plante velej.” (NW) Tede tu, yumi mas traehad blong wokem olgeta teritori long kongregesen blong yumi. Olsem nao, yumi save givim wan gudfala wetnes long ol man.
2 Naoia namba blong ol pablisa i stap god antap kwiktaem nomo. Taswe plante kongregesen oli mas wokem sem teritori bakegen, bakegen, bakegen. From samting ya, maet tingting blong yumi i nogud long saed blong teritori blong yumi. Be yumi no mas letem tingting blong yumi i kam nogud. Wajtaoa mo Wekap!, oltaem tufala magasin ya i gat sam nyufala gudfala store we yumi save soemaot long ol man. Mo tu, from we yumi stap gobak long sem teritori oltaem, samting ya i givim jans long yumi blong storeyan longtaem lelebet long evri haos wanwan.
STOREYAN WETEM OL MAN
3 Taem yumi seremaot magasin nomo long ol teritori blong yumi, yumi storeyan smol nomo long olgeta haos. Be ol pablisa we oli wok bakegen long sem teritori oltaem oli mas spenem moa taem blong storeyan wetem ol man wanwan. Ol pikinini tu oli save storeyan moa long samting insaed long magasin we oli intres long hem. ?Olsem wanem yumi save mekem olsem? Yumi mas save gud ol store long ol magasin. Samting ya i minim se yumi mas spenem taem blong ridim mo blong tingtinggud long ol magasin ya. Taem yumi stap ridim ol magasin, traem lukaot sam poen we ol man long teritori blong yu oli intres long hem. Nao bifo we yu go long wok blong prij, lukluk bakegen long ol magasin mo jusumaot sam stampa poen we yu save soemaot long ol man. Tingbaot ol defren samting we oli save hapen long ol haos wanwan, mo jusumaot wan haf long magasin we i stret long samting ya. Yu save yusum wan long ol gudfala store blong magasin long fas tok blong yu, blong pulum tingting blong man. Traem frengud wetem man ya we yu storeyan wetem hem mo pulum hem blong talemaot tingting blong hem.
NO FOGETEM FROM WANEM YUMI PRIJ
4 ?From wanem yumi go long olgeta haos wanwan? I no blong seremaot bigfala namba blong ol magasin mo buk nomo. No gat. Yumi wantem givhan long narafala blong hem i kasem stret save long saed blong trutok. Pita mo Jon tufala i talemaot tok blong Jeova long ol man Sameria long fasin we i stret gud nomo. Yumi tu, yumi spenem taem blong storeyan wetem ol man long teritori blong yumi, blong givim jans long olgeta blong kasem trutok.
5 Sipos yumi yusum ol magasin olsem wan stampa blong ol storeyan blong yumi, yumi save pulum man blong hem i lesin blong trutok. Yumi mas prea blong bambae God i givim ‘jans long yumi blong tok . . . blong yumi save mekem tingting blong yumi i strong, blong talemaot gud nyus ya.’—Efesas 6:18-20.