Talemaot Gud Nyus—Wetem Fasin Luksave
1 Wan proveb we God i givim i talem se: “Man we hem i lukaotgud long fasin luksave, bambae hem i kasem ol gudfala samting.” (Prov. 19:8) Plante taem waes tok ya i tru long wok blong prij. Olsem nao, plante pablisa we oli yusum fasin luksave mo oli keful long toktok blong ol, oli save jenisim tok we man i talem blong blokem yumi, i kam wan jans blong go moa long storeyan blong ol. Sipos no, oli putum wan gudfala faondesen blong man ya i lesin nekis taem. ?Olsem wanem yumi save mekem olsemia?
TAEM MAN I TALEM WAN TOK BLONG BLOKEM YUMI
2 Plante taem yumi mitim ol man we oli talem se: “Mi mi bisi tumas.” ?Be man ya i rili bisi, no hem i talem tok ya from we hem i no wantem storeyan longtaem nomo? Yumi mas traem luksave. Sipos i luk olsem we hem i no rili bisi, maet yumi traem go moa long storeyan blong yumi. Ating yumi save talem se: “Oraet, bambae mi storeyan smoltaem nomo.” Nao yumi save talem ol stampa poen we yumi stap storeyan long ol. Be yumi no mas fogetem promes blong yumi se yumi storeyan smoltaem nomo. From we yumi soemaot se yumi respektem toktok blong man ya mo yumi talem sam smol samting blong pulum tingting blong hem, maet man ya i wantem gohed moa long storeyan ya.
3 ?Be olsem wanem sipos i klia se man ya i bisi? I tru se yumi glad sipos yumi save storeyan smol wetem hem, be sipos yumi strong tumas, man ya i save tingting nogud long yumi biaen. Sipos man ya i holem wan samting long han blong hem we i soemaot se hem i stap kuk, no yu harem smel blong kakae, ating i tru se hem i rili bisi. Taswe yumi mas yusum fasin luksave mo mekem gudfala disisin. Sipos yumi strong blong gohed long storeyan long taem ya, yumi no stap soemaot respek. I moa gud we yumi givim wan traket long hem, mo talem long hem se bambae yumi kambak bakegen. Olsemia, man ya i tingting gud long yumi, mo nekis taem wan Wetnes i kam, maet hem i storeyan gud wetem man ya.
ANSA LONG GUDFALA FASIN
4 Taem yumi stap prij long evri haos, samtaem yumi mitim man we hem i tok strong long yumi. ?Yumi mas mekem wanem? Proveb 17:27 i givim advaes ya se: “Man we i gat fasin luksave, speret blong hem i kwaet.” !Hemia i gudfala advaes! Sipos voes blong yumi i smol mo yumi soemaot kaen fasin, man ya i save kam kwaet tu. Mo tu, sipos yumi traem pulum hem long kaen fasin blong talemaot ol samting we hem i stap tingting long ol, maet man ya i no moa wantem agyu. Nating we man ya i blokem toktok blong yumi kwiktaem, be sipos yumi ansa long kwaet fasin, ating biaen bambae hem i tingting gud smol long wok blong ol Wetnes blong Jeova. Sipos i olsem, hemia wan gudfala frut. Be sipos man ya i rili kros, i moa gud blong talem tata long hem long kwaet fasin, mo ating yumi save traem storeyan wetem hem nekis taem.
5 I gat sam narafala man we oli wantem agyu, be i no blong flas, oli rili wantem faenemaot ansa long sam kwestin. Blong storeyan wetem olgeta yumi mas gat longfala tingting. Be sipos yumi gat fasin luksave, bambae yumi no ting se ol man ya oli no intres taem oli strong blong talemaot wan defren tingting. Ating yumi save askem sam gudfala kwestin blong traem faenemaot from wanem oli tingting olsemia. Nao yumi save soemaot sam vas long Baebol long saed ya. (Prov. 20:5) From ansa blong olgeta, yumi save luksave sipos i gud blong gohed moa long storeyan ya, no no gat.
6 Wan pablisa we hem i gat fasin luksave, hem i save se maet nekis taem tingting blong wan man long saed blong mesej blong Kingdom i save jenis. Ating dei ya i stret moa, no sam samting i hapen. Nekis taem maet fasin blong hem i defren olgeta. Yumi mas lukaot we yumi no jajem wan man from samting we hem i bin talem long yumi lastaem.
7 Samtaem i strong blong luksave sipos yumi mas go moa long storeyan blong yumi, no no gat. Be sipos yumi traehad blong kam wan gudfala tija, bambae yumi gat gudhan blong talemaot gud nyus wetem fasin luksave. Long semtaem, bambae yumi wet long Jeova blong blesem wok blong yumi.—1 Korin 3:6; Taetas 1:9.