Olgeta Man Oli Mas Save Se Seftaem Long Fulwol i Kolosap
1 I no longtaem, “Prins blong Pis” bambae i stanemap tru pis mo seftaem long fulwol. Bilif blong yumi long promes ya blong Baebol i mas pusum yumi blong talemaot long ol narafala man. (Aes. 9:6, 7; Maeka 4:3, 4) Long manis Janewari, bambae yumi seremaot ol buk we oli gat 192 pej mo oli wokem long 1983 no bifo finis. Ol kongregesen we oli gat ol buk olsem long stok oli save yusum moa buk ya Worldwide Security Under the “Prince of Peace.”
2 Long pej 8 long Kingdom Wok Blong Yumi, i gat sam fastok we maet yumi wantem yusum long wok blong prij long Janewari. I gat tri fasin blong toktok we maet oli save givhan blong pulum man blong haos long buk ya Worldwide Security. Oli stap long ol haf we bambae oli kam.
3 Fasin blong toktok No. 1: Afta long fastok, yu save openem buk long pej 13 mo talem se: “Ol tok long Aesea 9:6, 7 i stap long fas paragraf. Mi save ridim long yu.” Mo askem se: “?Hu i ‘Prins blong Pis’?” Letem hem i ansa, mo gohed blong talem se: “Buk ya i soemaot klia hu ya ‘Prins blong Pis’ mo i eksplenem olsem wanem bambae hem i mekem pis i kamaot long fulwol long taem blong yumi. ?Yu yu intres blong ridim, mo lanem moa long saed blong promes blong nyufala wol?” I dipen long ansa blong hem nao, yu luk sipos yu save livim buk wetem man ya.
4 Fasin blong toktok No. 2: Afta yu ridim Aesea 9:6, 7 openem buk long pej 4 mo askem long man blong haos se: “?Long pija ya wanem samting i soemaot se i gat pis?” Letem hem i ansa, biaen yu save gohed blong talem se: “I gat pis long medel blong ol man mo ol anamol tu. Sam man maet oli ting se ol gavman blong man bambae oli save mekem pis olsem. Be tru pis mo seftaem we Baebol i tokbaot God nomo i save mekem, ol man oli no save mekem. ?Wanem tingting blong yu?” Letem hem i ansa, mo biaen ridim haf 4 long pej 5 mo eksplenem se buk ya i givim ansa long plante kwestin long saed blong Kingdom mo pis long wol. Nao yu save askem hem sipos hem i wantem tekem buk ya.
5 Fasin blong toktok No. 3: Long sam ples we ol man oli wantem katem toktok blong yu, oli no letem yu yu finisim tok blong yu, maet yu save yusum fasin olsem se: “?Mi save askem wan kwestin long yu?” Sipos man blong haos i agri, yu save gohed: “Jisas i talem long Matyu 28:19, 20 se ol man blong hem bambae oli mekem disaepol long ol man long olgeta ples long wol. Kwestin se: ?Olgeta man long wol bambae oli mas jenisim laef blong olgeta bifo we Jisas i rul olsem ‘Prins blong Pis’? ?Wanem tingting blong yu?” Letem hem i ansa mo afta yu save talem se: “Baebol i givim ansa long kwestin ya mo yu save faenem long pej 21.” Mo biaen yu ridim paragraf 2 long pej 21, mo soemaot olsem wanem vas long Baebol we i stap long buk ya i ansa long kwestin ya mo plante moa kwestin long saed blong seftaem long fulwol mo long saed blong “Prins blong Pis.”
6 Maet yu jusum wan fastok we yu laekem long pej 8 long Kingdom Wok Blong Yumi. Biaen we yu lukluk finis long ol tri fasin blong toktok we oli stap long haf ya, maet yu save faenem wan we yu wantem yusum. Tekem taem blong lanem mo mekemrere fastok blong yu bifo we yu go long wok blong prij. Fasin blong rerem mo bilif se tru pis mo seftaem bambae oli kamtru from “Prins blong Pis” mo Kingdom blong hem, bambae i mekem se yu toktok moa wetem fasin blong pulum tingting blong man mo yu glad blong givimaot buk ya Worldwide Security.