Yusumgud Trutok Buk
1 Jeova i givim long yumi plante gudfala kakae long saed blong speret. Long manis Janewari, bambae yumi givimaot Trutok buk long 80 VT. ?Yu yu gat sam buk olsem long haos we ol buk ya oli klin yet? ?Kongregesen i gat sam i stap long ples blong ol buk? Sipos yes, i gud blong lukluk bakegen ol tok we oli stap long buk ya, mo jusum sam gudfala poen we yumi save yusum blong toktok wetem ol man.
2 Ating yu save stat wetem ol tok ya se:
◼ “I gat kolosap 2,000 yia nao, we ol Kristin oli stap prea blong Kingdom blong God i kam. Long tingting blong yu, ?Kingdom ya bambae i givhan long ol man olsem wanem? [Wet long ansa. Openem buk long pej 103, haf 4, mo tokbaot sam long ol blesing we bambae oli kamtru aninit long rul blong Kingdom.] Buk ya i tokbaot ol samting we bambae Kingdom ya i mekem. Hem i eksplenem olsem wanem yu mo olgeta we yu laekem, yufala i save kasem blesing from. Sipos yu wantem ridim buk ya, mi glad blong givim wan long yu long 80 VT.”
3 Maet yu save traem wan narafala rod:
◼ “Plante man oli faenem se i had blong haremgud long wol ya from we i gat tumas trabol. ?Yu yu ting se yumi save haremgud nating se i gat ol problem we oli stap hapen tede? [Letem hem i ansa. Openem buk long pej 6 mo tokbaot sam trabol we ol man oli kasem mo i mekem yumi wari.] Baebol i soem olsem wanem yumi save winim ol trabol ya. Hem i soemaot tu olsem yumi save haremgud blong olwe long wan nyufala wol we i gat pis long hem. [Go long pej 7, mo rid Revelesen 21:4, 5.] Baebol i givim stret advaes, we i save givhan long yumi blong haremgud moa long laef. Buk ya i yusum ol advaes ya mo i eksplenem olsem wanem yumi save ona long ol advaes ya long laef blong yumi.”
4 No maet yu laekem traem hemia:
◼ “Evriwan i wantem laef long wan wol we i gat pis mo seftaem long hem. Sore tumas, be yumi no kasem ol samting ya long laef blong yumi. ?Yu yu ting se yumi mas mekem wanem blong pis mo seftaem i save kamtru? [Letem hem i ansa.] God i gat paoa blong putum pis long wol ya mo hem i promes se bambae hem i mekem olsem.” Soem pija long pej 4, mo afta ridim Maeka 4:3, 4. Eksplenem moa long saed blong hop blong Kingdom, givimaot buk ya, mo mekem plan blong kambak bakegen blong mekem wan visit.
5 Maet yu laekem blong yusum buklet ya “?God i Rili Kea Long Yumi?” Sipos yes, ating yu save talem, se:
◼ “Plante man oli askem from wanem God i letem ol man oli harem nogud tumas long wol. ?God i gat olgeta paoa, be from wanem hem i no mekem wan samting blong finisim ol trabol blong yumi? ?Yu yu ting wanem? [Letem hem i ansa.] Baebol i talemgud long yumi se God i no lego yumi.” Openem buk long pej 27, haf 22, mo ridim Ol Sam 37:11, 29. Soem naesfala pija we i soemaot ol samting we yumi save wet blong kasem. Sipos man blong haos i tekem buklet ya, talem se bambae yu kambak blong soem long hem olsem wanem hem i save yusum buklet ya blong stadi Baebol.
6 Trutok buk i pusum plante taosen man blong oli luklukgud long Baebol. Ol samting we oli lanem i givim hop long olgeta blong wan hapi fyuja. (Sam 146:5) Hem i wok blong yumi blong halpem olgeta.