Stadi Blong Yumi Wan—Yumi Mas Tingtinggud Long Hem
1 ?Wanem Samting i mekem se yumi tingtinggud? Yumi mas rili tingtinggud blong gat gudfala fasin fren wetem Jeova. Stadi blong yumi wan i impoten tumas blong mekem se fasin fren ya i stanap. Tede, i no gat tumas man long medel blong yumi we oli gat jans blong spenem plante taem blong tingting dip mo stadi Baebol. Be sipos yumi no stap ridim Tok blong God oltaem, yumi save kam slak we yumi no moa gat paoa blong agensem speret blong wol mo ol nogud fasin blong bodi.
2 Yumi wantem tumas Tok blong God: Taem we yumi lanem ol plan blong God fastaem, ating yumi wantem tumas blong kasem moa save. Be taem i pas, nao maet yumi no moa hanggri long kakae blong speret olsem bifo. Be yumi mas “wantem tumas” ol kakae long saed blong speret. (1 Pita 2:2) ?Olsem wanem yumi save wantem tumas ol kakae blong speret?
3 Smel blong wan kakae we yumi laekem tumas i save wekemap hanggri from we yumi rimemba ol gudfala kakae ya. Sipos yumi bin stadi smol bifo, samting ya i save gat sem paoa long yumi long saed blong speret. Taem yumi tekem smol kakae long saed blong speret we i gat tes, samting ya i save wekemap hanggri blong yumi long ol trutok we oli moa dip. Fasin glad we i kamaot from we yumi stap lanem sam gud samting, i save leftemap tingting blong yumi blong digim moa long Tok blong Jeova.
4 Wokem Wan Fasin We i Wokgud Moa long Yu: Samfala oli holem wan ful sapa blong stadi, be sam narafala oli laekem moa blong holem plante defren sotfala taem blong stadi. Sipos yu ting se i moa isi blong stadi gud long eli moning, yu save mekem disisen blong stadi bifo brekfas. Sipos yu no taed tumas long sapa, ating yu save stadi bifo we yu spel long naet. Nomata wanem jus blong yu, samting we i impoten tumas i blong stadi evri wik mo blong fasgud long prapa plan blong yu.
5 Taem ol brata oli leftemap tingting blong yumi blong stadi moa, ating yumi kwik blong talem se program blong yumi i bisi tumas. Be yumi evriwan i mas tru, taem yumi skelem fasin blong yusum ol taem blong yumi. ?Yumi stap holem plante haoa evri dei blong lukluk ol program long televisin? ?Yumi rere blong mekem sakrifaes long sam samting we yumi wanwan i intres long ol? Sipos yumi jekem fasin blong yusum taem blong yumi, bambae samting ya i soem ol taem we yumi save yusum evri dei blong mekem wan gudfala stadi.—Efes. 5:15, 16.
6 Yumi mas tingbaot stadi blong Tok blong God long fulhat blong yumi. Sipos yumi traem mekem wan narafala samting taem yumi stap stadi, be yumi no save kasem plante samting from stadi ya. Sipos yumi wantem stadi taem yumi kakae, no sipos yumi lesin long radyo mo televisin, yumi no save tingtinggud long ol samting we yumi traem lanem. (1 Tim. 4:15) Taswe yumi mas blokem ol samting we oli save pulum tingting blong yumi.—Lukluk Theocratic Ministry School Guidebook, pej 33-4.
7 Fasin blong stadi Baebol evri dei, blong ona long ol advaes blong God, hemia wan fasin we i impoten tumas. Jeova i yusum fasin ya blong lidim yumi. Yumi wantem kasem mak ya, se: Lanem trutok long ol pej we oli prentem mo putum ol trutok ya long hat blong yumi. Yumi mas holem ol jans blong rid, blong lukluk bakegen, mo blong tingting dip long ol samting long saed blong speret, nomata hamas taem yumi pas long ol wok ya.—Dut. 6:6-8; Kol. 1:9, 10.