Wokem Fasin Fren Wetem Jeova
1. ?Wan sista i luksave wanem long saed blong ol Kristin wok blong hem?
1 Wan Kristin sista i talem se: “Long samwe 20 yia we mi stap long trutok, mi go long ol miting mo mi joen long wok blong prij, hemia nomo.” Be hem i gohed se: “Naoia mi kasem save se ol samting ya oli impoten, be oli no save mekem mi mi stanap strong taem trabol i kamaot. . . . Naoia mi luksave se mi mas stretem tingting blong mi, mo folem wan gudfala program blong stadi. Long rod ya, bambae mi rili kasem save long Jeova, mo bambae mi laekem hem mo mi gat tangkiu from ol samting we Pikinini blong hem i givim long yumi.”
2. ?From wanem i impoten we yumi wokem fasin fren wetem Jeova?
2 I nidim blong wokhad blong kam gud fren blong Jeova. I no naf blong mekem ol Kristin wok evri wik. Sipos yumi no toktok evri dei wetem Jeova, bambae hem i kam olsem wan fren we i go long narafala kantri, nao yumi no moa raetem leta mo toktok long hem. (Rev. 2:4) I gud yumi tingbaot olsem wanem fasin blong stadi Baebol mo prea oli save halpem yumi blong wokem fasin fren wetem Jeova.—Sam 25:14.
3. ?Wanem fasin blong stadi wanwan, we bambae i halpem yumi blong kam klosap long God?
3 I Impoten Blong Prea Mo Tingting Dip: Stadi we yumi mekem yumi wan, i blong mekem hat blong yumi i helti. Be, stadi ya i no save mekem olsem, sipos yumi putum mak nomo aninit long ol bigfala poen long wan buk, mo ridim nomo ol wanwan vas we oli stap. Yumi mas mekem moa. Yumi mas tingting dip long samting we yumi ridim blong faenemaot ol rod blong Jeova, ol rul blong hem, mo ol fasin blong hem. (Eks. 33:13) Taem yumi kasem save long ol samting long saed blong spirit, samting ya i save tajem hat blong yumi mo pulum yumi blong tingbaot laef blong yumi wanwan. (Sam 119:35, 111) Taem yumi stadi, mak we yumi wantem kasem hemia blong kam klosap long Jeova. (Jem. 4:8) Blong stadi gud, yumi mas tekem taem mo jusum wan ples we i gud tu blong mekem olsem. Mo blong folem wan program blong stadi oltaem, i nidim blong yumi stretem yumi wan. (Dan. 6:10) Nating sipos laef blong yu i bisi tumas, i gud yu putum smol taem evri dei blong tingting dip long ol nambawan fasin blong Jeova.—Sam 119:147, 148; 143:5.
4. ?Olsem wanem prea long taem blong stadi i halpem yumi blong wokem fasin fren wetem Jeova?
4 Prea we i kamaot long hat, i wan impoten haf blong stadi. Yumi wantem we ol trutok blong Baebol oli tajem hat blong yumi mo oli pulum yumi blong ‘mekem wosip long God long fasin we hem i glad long hem, we yumi ona long hem, mo yumi fraet long hem tu.’ Blong mekem olsem, yumi nidim tabu spirit blong God. (Hib. 12:28) Taswe, evri taem we yumi sidaon blong stadi, yumi mas prea fastaem blong askem tabu spirit long Jeova. (Mat. 5:3) Taem yumi tingting gud long ol vas blong Baebol mo yumi yusum ol tul blong stadi we ogenaesesen blong Jeova i givim, i olsem we yumi openem hat blong yumi long Jeova. (Sam 62:8) Fasin blong stadi olsem, i pat blong wosip we yumi mekem blong soem se yumi fasgud long Jeova, mo i halpem yumi blong holem strong moa long Jeova.—Jud 20, 21.
5. ?From wanem i impoten we yumi tingting dip long Tok blong God evri dei?
5 Yumi mas wok blong mekem se fasin fren blong yumi wetem Jeova i gohed blong gru long ful laef blong yumi. Hemia samting we yumi mas mekem long evri fren we yumi gat. Taswe, i gud yumi pemaot taem evri dei blong kam klosap long God. Mo yumi save se taem yumi mekem olsem, bambae hem tu i stap klosap long yumi.—Sam 1:2, 3; Efes. 5:15, 16.