Trenem Yu Wan Blong Kasem Mak Ya Blong Fasin Fasgud Long God
1 Tiokratik Skul i gohed oltaem blong trenem yumi blong “tijim ol man long trutok blong God, long stret fasin nomo.” (2 Tim. 2:15) ?Yu bin joenem? Sipos no mo yu yu naf finis blong joenem, ?from wanem yu no putum nem blong yu naoia blong yu tu yu save kasem gud samting from rod ya?
2 Wan impoten haf blong skul hem i program blong ridim Baebol evri wik. Ol japta ya blong Baebol riding evri wik oli mas stap tu long program blong stadi blong yu wan blong mekem se yu save ridim ful Baebol.
3 Stat long program blong skul blong 1993, Baebol riding we i olsem tok No. 2 bambae oli ridim fulwan we i no gat stop long hem long ol poen. Hemia i min se studen we i givim tok ya i save eksplenem poen long fastok blong hem mo long lastok blong hem nomo. Brata we i mekem poen blong Baebol riding i no mas kavremap tumas ol vas we tok No. 2 i stanap long hem, blong mekem se wan we i givim tok ya i save mekem tok blong hem i stanap long olgeta haf blong Baebol riding.
4 Elda we i lukaot long skul bambae i makem Pepa Blong Givim Advaes blong olgeta we oli givim tok No. 2, 3, mo 4. Hem i no nidim blong folem oda we i stap long Pepa Blong Givim Advaes, be hem i save givim sam stret poen we studen i nidim blong kam moa gud long hem. I no nidim blong makem Pepa Blong Advaes blong brata we i givim tok No. 1, be i save gat advaes i go long hem be no long fored blong kongregesen.
5 Olgeta we oli naf, oli mas tekem jans blong kasem ol samting blong speret we Jeova i stap givim, mo i gat trening tu we Tiokratik Skul i stap givim. Trening olsem i save lidim yu long wan minista wok we i karem frut.—1 Tim. 4:7.