Ansa Long Wan Kwestin

◼ ?Yumi save telefon i go long Sosaeti blong kasem ansa blong kwestin blong yumi long Baebol no blong kasem sam advaes?

Plante man oli yusum telefon blong kasem samting kwiktaem nomo, yumi save mekem moa kwik be i no blong hemia nomo. Long wol oltaem ol man oli wantem putum prapa intres blong olgeta fastaem; ol man oli no wantem traehad blong lukaotem samting olgeta nomo.

!Defren olgeta long advaes we God i givim! Hem i pulum yumi blong lukaot save olsem wan sas samting we i stap haed, we i mekem yumi wantem traehad blong lukaotem, yumi nomo. Ekspiryens i pruvum se taem yumi mekem olsem, yumi haremgud moa from.​—⁠Prov. 2:​1-4.

Fasin traehad olsem i gud sipos yumi kasem wan kwestin taem yumi stap mekemrere blong joen long ol miting no sipos yumi kasem wan trabol. Insted blong telefon long Sosaeti, bambae yumi kasem blesing sipos yumi nomo yumi lukaotem ansa long Baebol mo long ol buk blong yumi, olsem Watch Tower Publications Index, wetem ol gud vas insaed long hem mo ol haf blong indeks.

Afa we yumi kasem ‘sas samting ya we i haed,’ yumi save luk wan long ol elda sipos yumi nidim sam help yet. Ol elda oli gat gud save long Baebol mo ekspiryens long fasin blong lukaotem sam samting. Bambae oli save halpemgud yumi sipos yumi nidim advaes long ol prapa problem blong yumi no disisin, from oli stap kolosap long yumi.​—⁠Lukluk Ol Wok 8⁠:​30, 31.

Sipos i luk olsem se sam moa advaes i save kam stret long Sosaeti, i moa gud oltaem blong sanem wan leta. Ol elda oli save givhan tu blong rere long samting ya. Leta olsem bambae i letem taem blong ansa i save kamaot from i gat inaf taem blong faenem ansa mo skelem, be wetem telefon oli no save mekem olsem.