Halpem Ol Nyuwan Blong Gohed Moa
1 Long Epril 17, 1992, kolosap 11.5 milian man we oli kam wanples blong mekem lafet blong Memoriol blong ded blong Kraes. Namba ya i tu mo haf taem antap moa total namba blong ol pablisa we oli stap long ol kongregesen blong ol Wetnes blong Jeova. Hem i wan bigfala glad blong luk plante man olsem we oli stap go antap “long hil blong Jeova!” (Maeka 4:2) Naoia i gat samting olsem seven milian man we oli stap soem sam intres long trufala wosip mo oli no kam yet olsem ol man blong wosip long Jeova we ol narafala man oli luk save olgeta. Neva bifo we ol tok blong Jisas se “i gat plante kakae tumas i stap long garen” i kamtru olsem ya!—Mat. 9:37, 38.
2 Long manis blong Epril, bambae yumi traehad moa blong halpem olgeta we oli kasem mak finis blong joen long wok blong prij. Brata we i lukaot long buk stadi long kongregesen, ol narafala pablisa mo ol paenia long grup blong hem, oli save givhan bigwan long saed ya. Ol trifala mak we yumi wantem kasem hemia (1) plan blong mekem Baebol stadi wetem ol nyuwan we oli bin kam long spesel pablik tok mo Memoriol long yia ya; (2) blong leftemap tingting blong olgeta we oli stadi blong oli kasem mak ya blong pablisa we i no baptaes yet; mo (3) blong joen moa long wok blong prij.
3 Yumi mas traehad moa blong welkam mo frengud wetem ol nyuwan we oli stap kam long ol miting blong yumi. ?Yumi save mekem wanem blong leftemap tingting long plante blong olgeta ya we oli intres blong oli stadi Baebol oltaem?
4 Wan medel namba blong 372 Baebol stadi we oli mekem long Vanuatu evri manis blong sevis yia 1992. Ol pablisa oli save askem brata we i lukaot long buk stadi blong olgeta blong go wetem olgeta long ol stadi blong savegud ol studen ya. (km 3/81 p. 4 long Engglis no km 6/81 p. 8 long Franis) Sam long ol Baebol studen ya maet oli stap kam long ol miting mo oli kasem mak blong joen long wok blong prij long ol haos wanwan. ?Olsem wanem, ol nyu wan ya oli gat fasin blong holem jans blong prij samtaem. ?Olsem wanem, oli kasem mak ya blong kam pablisa we i no baptaes yet olsem we i stap long pej 97-99 long buk ya Our Ministry. Sipos i olsem, eksplenem long olgeta olsem wanem oli save stat joen long wok blong prij long ol haos wanwan afta we oli agri long olgeta blong kam pablisa we i no baptaes yet.
5 Yumi no mas lego fasin blong leftemap tingting blong yumi wanwan insaed long kampani ya blong yumi ol kristin. (Hib. 10:24, 25) Sipos i gat sam we oli kam slak long minista wok blong olgeta, brata we i lukaot long buk stadi i mas mekem plan blong halpem mo leftemap tingting blong olgeta. Samtaem fasin blong askem olgeta blong kam wetem yumi long wok blong prij, maet hemia nomo oli nidim.
6 Blong mekem Epril olsem wan gudfala manis blong wok blong prij bambae i dipen long fasin joen blong evriwan. Sipos brata we i lukaot long buk stadi i glad taem hem i stap givhan long evri memba blong grup blong hem blong oli joen fulwan long wok blong prij, samting ya bambae i givhan bigwan long olgeta. Bambae i save gat plan blong gat sam moa miting blong prij. Yumi save tingbaotgud long ol olfala, mo yusum sam rod we oli save wok blong givhan long ol yangfala. Ol papa mama oli mas luk se evriwan long famle oli mas joen long minista wok long manis Epril. Sipos yumi wanwan i traehad long wok we yumi naf blong mekem i go long Jeova naoia long taem blong karem kakae long garen, bambae yumi kasem ol rij blesing blong hem.