Winim Traem Long Wok Blong Prij Long Ol Haos Wanwan
1 Tingting blong go long ol haos wanwan, toktok long ol strenja, i rili wan traem blong olgeta we oli jes kam long klin wosip. Be trufala lav long Jeova i save halpem wan man blong winim traem ya, mo samfala we oli stap sem bigwan, oli gohed blong kasem mak ya blong pablisa we i prij fultaem.
2 Baebol i soemaot klia se ol kristin blong faswan handred yia oli stap talemaot gud nyus blong Kingdom blong God taem oli go long long ol haos wanwan. (Ol Wok 5:42; 20:20, 21) Olsem ol kristin long taem blong yumi, yumi mas joen long wok ya tu. Lav blong yumi long God mo ol narafala i mas pusum yumi blong mekem wok ya nating se ol man oli no glad long yumi, oli mekem yumi sem, oli no respektem yumi no oli mekem trabol long yumi.
3 Winim Traem i Kasem Wanem Frut: Evritaem we yumi prij, yumi traehad blong sakem sam sid blong trutok, from yumi save se sloslou maet hem i save karem frut blong Kingdom. (Ekl. 11:6) Ol man wanwan oli stap jenis folem ol samting we oli stap hapen. Maet wan samting we i kamaot i save mekem man blong haos i tingbaot wan samting we wan long yumi i talem long hem long haos blong hem, mo maet hem i save lesin moa nekis taem.
4 Wok blong yumi blong prij long ol haos wanwan i givim janis long olgeta we oli stap lukaotem tru tok mo stret fasin blong kasem save long saed blong Jeova mo ol plan blong hem, i mekem olgeta oli stat blong wokbaot long rod blong kasem laef we i no save finis. Olgeta we oli stap ronem ol samting blong wol blong haremgud long olgeta oli bin kasem woning se mas jenisim fasin blong olgeta sipos oli wantem haremgud long glad hat blong Jeova. Minista wok ya i mekem ol man oli save nem blong Jeova mo i givim ona long hem, nating se man blong haos i lesin no nogat.—Ezek. 3:11.
5 Minista wok i halpem yumi blong wokem ol frut blong speret, olsem, lav we i no tingbaot hem wan, glad, pis, mo longfala tingting. (Gal. 5:22) Hem i halpem yumi blong gat tingting daon mo gat filing long ol narafala, from we wok ya i joen long fasin blong mekem i gud long ol narafala. Stap bisi long wok blong Jeova i save blokem yumi long ol samting blong wol.—1 Kor. 15:58.
6 Help Blong Winim Traem: Ol nyuwan oli nidim blong lanem olsem wanem blong joen long nambawan wok ya. Plante taem oli no trastem olgeta, mo tingting blong go long ol haos wanwan i save mekem olgeta i fraet. Yumi save storeyan wetem olgeta long ol tok we ol man oli talem blong blokem yumi mo talem long olgeta wanem ansa yumi save givim. Yumi save lanem wan pleplei blong yusum sam long ol gudfala poen we oli stap long Reasoning buk blong ansa long ol tok we ol man oli talem blong blokem yumi. ?Ating i gud blong halpem olgeta blong rere long wok blong prij? Oli save kasem help tu taem oli go oltaem long ol miting blong prij mo taem oli wok wetem ol pablisa we oli gat moa ekspiryens. Sipos oli wok wetem wan grup samting ya i save halpem olgeta.
7 Taem yumi stap go long ol haos wanwan, yumi gat janis ya blong mekem wok long nem blong God blong yumi Jeova. ?Wanem bigfala ona man i save kasem i bitim ona we hem i save kasem taem hem i stap olsem man blong wok blong God? No gat. (1 Kor. 3:9) Sipos yumi trastem hem, speret blong hem bambae i givhan long yumi blong winim traem ya blong wok long prij long haos wanwan.—2 Kor. 3:5.